BA GULIZAR baambile’mba: “Kimye kyonse pa kulomba namusanchila Yehoba pa kunkwasha kufunda pe aye mu mulaka wami wa kisemwa.”

Ba Gulizar bapwilanga pamo na Bakamonyi ba kwa Yehoba pa myaka itanu na isatu, bino babatizhiwetu kimye kyo batendekele kupwila mu kipwilo kya mulaka wabo. Bo bajinga pa bena Kurd batanshi baswile bukine mu kyalo kya Georgia mu myaka ya kulutwe kuno. Nga bano bena Kurd bo bañanyi?

Bena Kurd bekala mu byalo bya ku musela. Bashayuka bamo balanguluka’mba bano bajinga baana ba “bena Meda”  batongolwa mu Baibolo. (2 Mfu. 18:11; Byu. 2:9) Mulaka wabo uji pa milaka yo bamba mu kyalo kya Iran.

Lelo jino, bena Kurd bekala mu byalo byapusana pusana, kubikapotu ne Armenia, Iran, Iraq, Syria, ne Turkey. Mu kyalo kya Georgia muji bena Kurd nobe 20,000. Mwayila kisemwa kyabo, bano bantu bakamwa Lesa kabiji banemeka bingi kwingijila Lesa.

Mu kyalo kya Georgia muji basapwishi 500 bena Kurd, kabiji muji bipwilo bisatu bya uno mulaka. Mu mwaka wa 2014, banengezhezhe kushonkena kwa kijiiji kutanshi mu mulaka wa Kurd mu muzhi wa Tbilisi, kabiji kwataainwe bantu bafumine ku Armenia, Germany, Turkey, ne ku Ukraine.