Kusapwila ku Babipuluka ne Bafuma mu Byalo Bingi

Na mambo a babipuluka ne bantu bavula banyemena ku kyalo kya Germany, mwingilo wa kusapwila mu milaka ingi wayilako bingi palutwe. Katataka papo, mu bañondotu batanu na bana, mabumba 229 a milaka ya ku byalo bingi alengelwe. Kabiji basapwishi bafika ku 800 babena kufunda milaka 13 mu masukulu 30 o banengezha a kufunda milaka.

Balongo betu basapwila ku babipuluka pa mapunzha po bafikila. Batanchika mabuku akila pa 640,000 pa matebulu mu mapunzha kukila pa 200.

 Jibumba Jitangijila jaitabizhe mukwekele wa kusapwila ku bano bantu kutendeka mu May kufika mu July 2016. Basapwishi 700 bamba mulaka wa bena Alabya bayile ku mapunzha jikumi mu Austria ne mu Germany na kusapwila bantu bavula bingi bekalamo bamba mulaka wa bena Alabya.

Mali a Muwayawaya o Bataana mu Mikwakwa

Basapwishi 50 baji mu kipwilo kya Faber’s Road Kriol mu kyalo kya Belize javula bendatu panshi pa kusapwila mu nyaunda. Balongo bavula bayanji, bino baji bingi na muchima wa bumpanyi. Myaka icheche yapitapo, balongo batendekele kutola mali a muwayawaya o bataananga panshi mu mikwakwa inge babena kusapwila ku nzubo ku nzubo. Kufuma kyokya kimye, pa mwaka pa mwaka bekala panshi ne kubala mali onse o batolele.

Nangwa kya kuba ano mali achechetu (jali jimo jaesakana na K5), pa mwaka pa mwaka batola mali a muwayawaya kukila pa K2,000. Balongo bengijishapo kichika kimo kya ano mali kulipila ku byonse bibena kukebwa pa Nzubo ya Bufumu, bino ashala beatuma ku mwingilo wa ntanda yonse.

Bantu 4 Milyonyi Batelekelenga

Pa 5 March 2016, kwamwekele kintu kyanema bingi mu mwingilo wa Lesa mu Burundi. Mulongo Anthony Griffin kufuma ku ofweshi mukatampe wa ntanda yonse wafwakashijile musampi wa kino kyalo. Kwaikele kupwila kwa bipwilo byonse kabiji bekubikile pa waileshi wa kyalo. Bantu kukila pa 4 milyonyi batelekele ku kuno kupwila konse.

Kubika kuno kupwila pa waileshi kwalengejile mambo awama kumvwanyika ku bantu bavula, kabiji bantu baambile byawama bingi. Umo wingila ku nzubo ya mabilabila wakwashishe kubika kuno kupwila pa mwela waambile’mba: “Mwafwainwa kunengezhanga kuno kupwila kimye kyonse.” Mukwabo waambile’mba: “Mutwajijile [kunengezha ino mitanchi],  mambo ikapulusha bavula.” Bantu mu masakya avula ne mu tumyotoka bashinkwile mawaileshi na kuteleka ku kuno kupwila.

Bijimba Byalekele Kujila

Byo kwashajile juba jimo kufika juba ja Kivuluko mu 2016, balongo mu jibumba jicheche mu kyalo kya Nepal baumvwine bingi bulanda pa kumvwa’mba kukekala kusekelela ne kujizha bijimba pa sukulu walamankana na kishimikwa mo bakebelenga kwikela na Kivuluko.

Pa kuno kusekelela pekala bingi kyungwe. Balongo byo bawamishenga mu kishimikwa lukelo pa juba ja Kivuluko, umo pa banengezhezhenga bya kusekelela wibambijile’mba, “Kafwako kyo musakumvwako ne, kanatu bijimba byo tusakujizhanga.”

Kusekelela kwabo kwatendekele mute, kabiji baubilenga bingi kyungwe. Nangwa kya kuba balongo baingijishe bijimba bikatampe, bino byo bebyesekele, kechi byaumvwanyikilenga ne, na mambo a kyungwe. Balongo baumvwine bingi bulanda, bino balombelepo pa luno lukatazho. Balongo bavula byo batendekele kufika saka kwashalatu maminiti 30 Kivuluko kutendeka, baumvwinetu bijimba bya basekelelenga byaleka kujila. Kyalengejile ke kya kuba’mba bamo pa basekelejilenga ne kutoma maalwa batendekele kulwa, onkao mambo bakapokola baishile ne kulekesha kusekelela kwajingako. Na mambo a kino, balongo baikele na Kivuluko kwa kubula kyungwe.

Batakaikile Keyala wa jw.org

Giuseppe ke painiya wikala mu Italy. Wingila ku kampanyi kakwasha bantu na bya kwingijisha Intaneti, kabiji wingijilatu pa nzubo. Mwaka wapwa mu May, aye ne bamingilo bakwabo 70 bashinkilweko ku kusambakana kwa pa kampanyi ko besambile pa mashinda a katataka o bakonsha kwingijisha pa kampanyi. Mukulumpe wa kampanyi waambile’mba kuji  makeyala amo a pa Intaneti o banengezha bulongo kya kuba kampanyi wabo wakonsha kufunjilako. Waambwile kompyuta ne kwibamweshapo keyala umo wa pa Intaneti. Giuseppe byo atajile pa kompyuta, wakuminye bingi kumona keyala wa jw.org. Kepo mukulumpe wa kampanyi aambile’mba: “Uno ye keyala ye banengezha bulongo pa makeyala onse mwaya ntanda.” Kabiji watendekele kusabaula mashinda awama mo banengezhezha keyala wa jw.org. Waambile pa tumisabilo tulengela’mba muntu kimupeeleleko kutaana bintu byo akeba, ne pa bipikichala byawama bijipo.

Giuseppe washimikizhe’mba: “Bakwetu ku nkito bakuminye bingi pa kumona milaka yavula iji pa uno keyala. Mukulumpe wa kampanyi byo apwishishe kwamba, mukulumpe utala pa dipatimenti wetu waambijile bonse mu luonde amba: ‘Giuseppe ke Kamonyi wa kwa Yehoba.’ Ponkapo mukulumpe wa  kampanyi wañambijile’mba: ‘Jibumba jenu jaingila mwingilo mukatampe. Jishinda jo mwanengezhezhamo keyala wenu wa Intaneti jawama kya kuba makampanyi onse akonsha kufunjilako. Naketekela mwingila bingi na ngovu pa kuba’mba mutwajijile kubikapo bya katataka, ne kumunengezha bulongo pa kuba’mba bantu kibapeelelenga kuyapo ne kutaana byo bakeba.’ Naumvwine bumvu pa kuntakaika pa mwingilo ye nabujile kwingilako. Bino najinga na lusekelo mambo bino byonse byashimwine bukamonyi ku bavula babujile kuyuka bulongo Bakamonyi ba kwa Yehoba. Luno nesamba bingi pa bya mu Baibolo na bo twingila nabo, kabiji mbena kufunjisha ne basatu Baibolo.” Kampanyi wingilako Giuseppe watwajijila kufunjilako ku byalengwa keyala wa jw.org, kabiji Giuseppe watwajijila kwisamba na balunda nanji bintu bya mu Baibolo.

Walekele Kupama Mpila

Argentina: Jorge ubena kupama mpila na balongo

Jorge ke mwanyike wikala mu Argentina. Mu 2010, Jorge bamufunjisheko mambo awama ku mulunda nanji ku sukulu. Palutwe kacheche, watendekele kufunda Baibolo kwingijisha buku wa Nanchi Baibolo Kine Ufunjisha’mba Ka? Mu yoya myaka, wapamanga bingi mpila. Wayukile bingi kupama mpila kya kuba bamutwezhezhe ne mu jibumba ja mpila ya kwikyombesha. Mu April 2014, bamwichile ku kipanyi kya mpila mu Germany. Waumvwine bingi bulongo pa kumwita’mba akapamenga mpila mu kyalo kingi, onkao mambo waswile kuya. Byo kwashajiletu moba acheche kuba’mba Jorge aye ku Europe, mukulumpe wibafunjishanga kupama mpila wamubuujile’mba: “Nanchi kechi wi Kamonyi wa kwa Yehoba nenyi? Kange ukeonawine bwikalo inge waya ku kyalo kingi ne. Byo najinga mwanyike, najinga Kamonyi wa kwa Yehoba. Bangichile kuya na kupama mpila ku kipanyi kimo mu kyalo kya mu Asia. Bandayile’mba bakampa bintu byavula bingi, kabiji natemenwe. Nayile konka pamo na kisemi kyami, bino twapulwijilemotu mabuula.”  Jorge washimikizha’mba: “Byambo byaambile uno mukulumpe byandengejile kulangulukapo bulongo ne kufuukulapo kubula kuya ku Europe. Mu 2015, naikele musapwishi, kabiji palutwe kacheche nabatizhiwe.”

Mapesho a Kubula Kupota

Mu September 2015, kwajinga Kushonkena kwa Kijiiji mu muzhi wa Kampala mu Uganda kwajinga na mutwe wa kuba’mba “Londelainga Yesu!” Bantu mu luonde basangalele bingi kimye Mulongo Mark Sanderson wa mu Jibumba Jitangijila kyo alupwile Baibolo wa Binembelo bya Ntanda Ipya mu mulaka wa Luganda.

Muntu umo ufunda Baibolo waambile’mba: “Kutambula uno Baibolo wawama kwandetejile bingi lusekelo. Pa kyokya kimye, bantu benengezhezhenga ku kufwakasha kwa Papa wa Bakatolika. Pa kuba’mba bekale na mali a kunengezhezha, bapoteshenga malungo pa madola 30 (K300). Bantu bavula bakebelenga ano malungo mambo bebabuujile’mba ‘akebaletela mapesho,’ bino kechi bajinga na mali ne. Pakuba amiwa natambwijile mapesho a kubula kupota. Yehoba wapele bonse baishile ku kushonkena ano mapesho, kabiji muntu mwine ye wafwainwe kufuukulapo kupanako mali a bupetu kufuma panshi ya muchima. Moba onse o ntanga Mambo a Yehoba mu mulaka wami, mfunjilako bikwabo pe aye, kabiji ano ke mapesho. Namusanchila bingi Yehoba pa kumpa uno Baibolo.”

Nanchi Mabuku Beapulinta ku Mipashi Yatama Nyi?

Bantangi ba machechi bamo mu kibunji kimo mu kyalo Congo (Kinshasa) bakebelenga kulengulwisha keyala wa www.jw.org. Onkao mambo, batendekele kufunjisha bantu babo amba mabuku a Bakamonyi ba kwa Yehoba beapulinta ku mipashi yatama. Pa kuba’mba bashiine bantu na ino milanguluko yabo, baambile’mba bisopelo bya “www” bimenako nambala wa 666 watongolwa mu Lumwekesho. (Lum. 13:18) Na mambo a kino, bamo bafundanga Baibolo bekilekele.

 Bamulume ne mukazhi bapainiya byo balombelepo pa kino kintu, baichile bo bafunjishanga Baibolo kuya ku nzubo kwabo. Batanu na umo baswile kuya, kabiji byo bapwishishe kuja kajo, bano bamulume ne mukazhi batambishe vidyo wa Kizungu wa kuba’mba Jehovah’s Witnesses—Organized to Share the Good News. Bintu byamwene bano benyi babo mu uno vidyo bibalengejile kulengulula byambo bya bubela byo bebabuujile pa mabuku etu. Mulungu walondejilepo, kimye bano Bakamonyi kyo bayile na kufunjisha umo pa bano bantu Baibolo, mwatawanji wibakanjikizhe kutambula bupe bwa mali madola 100 (K1000) a kupana ku mwingilo wa ntanda yonse, nangwa kya kuba aye mwine kechi wafunjilenga Baibolo ne.

Kufunda Nyimbo ya Katataka

Balongo mu mpunzha ya mu mizhi mu kyalo kya Papua New Guinea kechi baji na Intaneti ne, bino bebikako bingi kufunda nyimbo ya Bufumu ya katataka. Onkao mambo, balongo mu kipwilo kya Mundip batuma mulongo umo kuya ku mpunzha kuji Intaneti, ko benda panshi maola abiji kufika pa kukanjijila sakya, ne maola akwabo abiji na sakya kufika ku yoyo mpunzha. Inge mulongo wafika, unemba byambo bya nyimbo ya katataka mu buku wanji ne kubwela jibiji ku kipwilo. Inge wafika ku kipwilo, unemba byambo bya nyimbo pa kipabi pa kuba’mba bonse mu Nzubo ya Bufumu bamonengapo. Bonse mu kipwilo banemba nyimbo yonse ya kwingijisha pa kupwila mu mabuku abo. Bomvwa bingi bulongo kukwatankena pamo na bipwilo byonse mwaya ntanda mu kwimba nyimbo ya kutota Yehoba.