BALONGO ne banyenga ba ku Kyrgyzstan kubikapotu ne bakwabo bafumine mu byalo bikwabo, baingijile na ngovu pa mwaka umo ne kichika kubayisha ne kuwamisha bishimikwa bya musampi mu muzhi wa Bishkek mu kino kyalo. Mutanchi wa kupana bino bishimikwa waikeleko pa 24 October, 2015, byo papichiletu ñondo umo kufuma kimye kyo bapwishishe mingilo. Bantu 3,000 bo batelekele ku uno mutanchi mu Mazubo a Bufumu 18 ne mu mapunzha akwabo 5, kabiji baumvwine bingi bulongo. Ba Stephen Lett ba mu Jibumba Jitangijila bo baambile jashi jajinga na kishina kya kuba’mba “Ingijilainga Yehoba na Muchima Yense.” Juba jalondejilepo, kwajinga mutanchi wa kukosesha lwitabilo lwa basapwishi bavula mu kino kyalo.

Musampi wa mu Kyrgyzstan

 Pa Kibelushi, pa 14 May, 2016, bantu 6,435 mu kyalo kya Armenia, bataainwe ku kupanwa kwa ofweshi wa musampi, uji na bibamba byavula byatentakana kuya mwiulu. Kabiji Nzubo ya Kubuñenamo ne bishimikwa bya Sukulu wa Basapwishi ba Bufumu nabyo byapainwe. Majashi alumbulwile byatendekele mwingilo wa bakalume ba Yehoba mu Armenia. Mwingilo wa bantu ba Lesa watendekele kimye bena Armenia bamo kyo bavilukijile ku United States mu myaka ya ma 1900, kabiji wafikile ne mwine mu Armenia mu ma 1970, kino kyalo saka kiji lubaji lwa Soviet Union. Katatakatu jibumba jetu po janembeshe ku kafulumende mwayila mizhilo ya kyalo kabiji ofweshi wa musampi walengelwe. Bavula bataainweko kechi balangulukangapo amba mwingilo wetu mu Armenia ukakoma ne. Bonse mu luonde baitabizhe kimye ba David Splane ba mu Jibumba Jitangijila kyo babijikile kuba’mba bapane bino bishimikwa byawama kwi Yehoba.

Armenia

Peulu: Kimye kyapainwenga ofweshi wa musampi

Pakachi: Balongo ne banyenga bataainwe ku kupwila kwajingako ku mpelo ya mulungu

Panshi: Balongo ne banyenga babena kuzha mazha a kisemwa a bena Armenia mabanga juba japainwe musampi