AKIMONA nkunda ubena kwikila pa mutwe wa muntu. Uno muntu ke Yesu. Pa kikye kimye wajinga na myaka ya kusemwa 30. Muntu mukwabo ye aji nanji ke Yoano. Kunyuma kwe twafunjile bintu bimo pe aye. Nanchi wavuluka kimye Maliya kyo ayile na kumona mulongo wanji Elisabeta, ne mwana munda mwa Elisabeta byo afunkile na lusekelo nyi? Awa mwana wakijinga munda wajinga Yoano. Pano nga ba Yoano ne Yesu baubilenga ka papo?

Lubatizhilo lwa kwa Yesu

Yoano po po afuminetu na kwibizha Yesu mu mema a Mukola wa Yodano. Bino byo byafwainwa kubatizwa muntu. Patanshi, wamwibizhe mu mema, apa bino wabwela wamutumpula. Na mambo a kuba’mba Yoano waubanga byonka bino ku bantu, watelwanga’mba Yoano Mubatishi. Pano mambo ka Yoano kyo abatizhe Yesu?

Yoano waubile kino mambo Yesu waishile ne kumwambila Yoano amba amubatizhe. Yoano wabatizhanga bantu bamweshanga’mba balapila ku bintu byatama byo baubanga. Pano nanchi Yesu waubilepo kintu kimo kyatama kyakonsheshe kumulengela’mba alapile nyi? Ine, Yesu kechi waubilepo kintu kimo kyatama ne, mambo wajinga Mwana Lesa wafumine mwiulu. Onkao mambo, waambijile Yoano kumubatizha na mambo a kintu kyapusanako. Leka twikimone kyonkakyo kintu.

Yesu saka akyangye kwiya kwi Yoano, wakijinga kalipentala. Kalipentala ke yewa muntu ulenga bintu nabiji matebulu, ne bipona. Mwata wanji Maliya, aye Yosefwa wajinga kalipentala kabiji wafunjishe ne Yesu naye kwikala kalipentala. Bino Yehoba kechi watumine Mwananji kwiya kwikala ke kalipentala panopantanda ne. Wamupele mwingilo wiikajila wa kuba kabiji kimye kyafikile kya kuba’mba Yesu atendeke kwingila uno mwingilo. Onkao mambo, pa kumwesha’mba waishile na kuba kyaswa muchima wa Shanji, Yesu waambijile Yoano amba amubatizhe. Nanchi kino kyamutokesheshe Lesa ku muchima nyi?

Ee, kyamutokesheshe ku muchima, mambo Yesu byo afuminetu mu mema, jiwi jafumine mwiulu ne kwamba’mba: ‘Uno ye Mwanami ye natemwa, mo namwena lusekelo.’ Kabiji mwiulu mwashinkukile ne uno nkunda wamwikijile Yesu. Pano bino kechi wajinga nkunda yenkawe ne. Wamwekelengatu nobe iye. Wajinga mupashi wazhila wa Lesa.

Yesu wajinga na bintu byavula bya kulangulukapo, onkao mambo, wayile kwa bunke bwanji pa moba 40. Byo ajinga kwa bunke, Satana waishile kwi aye. Satana waesekele Yesu pa bimye bisatu amba obe kintu kyabujile mu mizhilo ya Lesa. Bino Yesu wakaine kwikyuba.

Panyuma ya kumweseka, Yesu wabwelele kabiji wataine banabalume bamo baikele ke baana banji ba bwanga batanshi. Bamo mazhina abo bajinga ba Andeleo, Petelo (utelwa’mba Shimona), Filipa ne Natanela (utelwa ne kuba’mba Batolomo). Yesu ne bano baana banji ba bwanga bayile ku nkambi ya Ngalilea. Byo bafikile mu Ngalilea, baikeleko mu muzhi wa Kena mwaikalanga Natanela. Monkamwa mu muzhi, Yesu wayile ku kijiilo kikatampe kya masongola ne kuba kya kukumya kyanji kitanshi. Nanchi wikiyuka nyi? Waalwile mema ke binyu.

Mateo 3:13-17; 4:1-11; 13:55; Mako 6:3; Yoano 1:29-51; 2:1-12.



Mepuzho

  • Nga abo bantu babiji baji pa kipikichala bañanyi?
  • Nanchi muntu bamubatizha byepi?
  • Yoano wabatizhanga bantu ba mutundu ka?
  • Kishinka ka kyalengejile Yesu kwambila Yoano amba amubatizhe?
  • Lesa wamwesheshe byepi amba wasekelamo Yesu byo abatizwe?
  • Ki ka kyamumwekejile Yesu byo ayile bunke mungye pa moba 40?
  • Bañanyi bajinga baana ba bwanga batanshi ba kwa Yesu, kabiji kya kukumya ka kitanshi kyo aubile?

Mepuzho akwabo

  • Tanga Mateo 3:13-17.

    Kya kumwenako ka kyashile Yesu pa mambo a kubatizhiwa kwa baana banji ba bwanga? (Sala. 40:7, 8; Mat. 28:19, 20; Luka 3:21, 22)

  • Tanga Mateo 4:1-11.

    Nanchi Yesu byo aingijishanga bulongo Binembelo kyakonsha kwitutundaika byepi kutanganga Baibolo kimye kyonse? (Mat. 4:5-7; 2 Pe. 3:17, 18; 1 Yoa. 4:1)

  • Tanga Yoano 1:29-51.

    Kwi ñanyi Yoano Mubatishi ko atumine baana banji ba bwanga, kabiji twakonsha ku mulonda byepi lelo jino? (Yoa. 1:29, 35, 36; 3:30; Mat. 23:10)

  • Tanga Yoano 2:1-12.

    Nanchi kya kukumya kitanshi kyaubile Yesu kimwesha byepi amba Yehoba kechi ufya bintu byonse byawama ku bakalume banji ne? (Yoa. 2:9, 10; Sala. 84:11; Yako. 1:17)