Kuboko kubena kunemba pa lubumbu

KI KA kyamwekele pape? Bantu bajinga na kijiilo kikatampe. Mfumu wa bena Babilona waichile babinemanga kiumbi kimo. Baingijishenga makapu a ngolode ne a siliva ne michiba yo basendele mu nzubo ya Yehoba mu Yelusalema. Bino nobe mu kukopa kwa jiso minwe ya kuboko kwa muntu yamwekele ne kunemba pa lubumbu. Bonse baumvwine moyo.

Beleshaza ne benyi banji

Beleshaza munkana Nebukaneza, ye wajinga mfumu. Wabijikile amba balete ba maana. Mfumu waambile’mba: ‘Awa usakutanga bino binembelo ne kumbula mo byayila, bakamupa bya bupe byavula kabiji ukekala ke wa busatu mu bufumu.’ Pano bino kafwako wa maana nangwa umo wakonsheshe kutanga binembelo pa lubumbu nangwa kumubula mo byayila ne.

Ina mfumu waumvwine kyongo ne kutwela mu kibamba kya kujilamo. Waambijile mfumu amba: ‘Kechi mube kijikila ne. Monka mu bufumu bwenu muji muntu uji ne na maana a balesa. Kabiji nkambo yenu, mfumu Nebukaneza, wamupele bukulumpe bwa pa ba maana. Jizhina janji Danyela. Tumai ba kuya na kumwita, ne aye usakwimulumbulwila bino binembelo.’

Ponkapotu, Danyela bakamuletele. Panyuma ya kuba Danyela wakana kutambula bya bupe, watatwile kumubula ene mambo Yehoba kyo afumishe nkambo yanji Beleshaza aye Nebukaneza pa bufumu. Danyela waambile’mba ‘witotele ne Yehoba wamukabishishe.’

Danyela waambijile Beleshaza amba: ‘Pano obewa wayukile byonse byaubiwe kwi aye, ne obewa witota nobe Nebukaneza. Waleta makapu ne michiba kufuma mu nzubo ya Yehoba ne kutomenamo. Ubena kutota balesa ba bichi ne ba mabwe, kabiji kechi wa munemeka Mulenga Wakila ne. Lesa kyo kyo atumina kuboko kuba’mba kunembe bino byambo.

Danyela waambile’mba: ‘Bino byo binembelo byanembwa’mba: ‘MENE, MENE, TEKEL, ne PARSIN.’

‘MENE kilumbulula’mba Lesa wabala kala moba a bufumu bwenu ne kwibupwisha. TEKEL kilumbulula’mba anweba bemupima pa shikelu, kabiji mwapelelela. PARSIN kilumbulula’mba bufumu bwenu bebwabanya ne kwibupana ku bena Media ne bena Pelisha.’

Danyela byo akyambilenga, bena Media ne bena Pelisha baishile ne kulukuka Babilona. Balukukile muzhi ne kwipaya Beleshaza. Binembelo byanembelwe pa lubumbu byaikajile ke bya kine bonkabwa bufuku! Nanchi ki ka kyaubiwe ku bena Isalela? Katataka tukekiyuke, pano bino patanshi twaya tumone byaubiwe kwi Danyela.

Danyela 5:1-31.



Mepuzho

  • Ki ka kyamwekele kimye mfumu wa ku Babilona byo ajinga na kijiilo kikatampe ne kwingijisha makapu ne michiba yafumine ku nzubo ya Lesa ku Yelusalema?
  • Beleshaza waambile’mba ka ku bantu banji ba maana, bino ki ka kyo bakankelwe kuba?
  • Bansemi babakazhi babujile mfumu kuba ka?
  • Kwesakana na Danyela byo abujile mfumu, mambo ka Lesa kyo atumijile kuboko kunemba pa lubumbu?
  • Danyela walumbulwile byepi byambo byanembelwe pa lubumbu?
  • Ki ka kyamwekele Danyela byo akyambilenga?

Mepuzho akwabo

  • Tanga Danyela 5:1-31.

    Lupusano ka luji pa moyo wa kwakamwa Lesa ne moyo waumvwine Beleshaza kimye kyo amwene kuboko na kunemba pa lubumbu? (Da. 5:6, 7; Sala. 19:9; Loma 8:35-39)

    Danyela wamwesheshe byepi kuchinchika kukatampe kimye kyo esambilenga na Beleshaza ne babinemanga banji? (Da. 5:17, 18, 22, 26-28; Byu. 4:29)

    Mu ñanyi jishinda kitango 5 kya mu buku wa Danyela mo kilumbulwila buneme bwa bumfumu bwa Yehoba bwa pa bilengwa byonse? (Da. 4:17, 25; 5:21)