BENA Filishitiya baishile jibiji na kulwa nkondo na bena Isalela. Pa kino kimye, bakolojanji Davida basatu bajinga mu nzhita ya kwa Saulo. Juba jimo Yese waambijile Davida amba: ‘Batwajile bakolojobe wichi ne bashinkwa. Ukamone ne byo babena kwikala.’

Goliata

Davida byo afikile ku kampu wa nzhita, wanyemejile mukachi ka nzhita na kumona bakolojanji. Kitonzhi mwina Filishitiya Goliata waishile ne kutendeka kwendeleka bena Isalela. Watwajijile na kwibendeleka pa moba 40 lukelo ne mabanga. Wabijikile na bwitote’mba: ‘Isalulwilai muntu wenu anwe bene, eye alwe ne amiwa. Umvwe akonshe kunshinda ne kungipaya, tusakwikala ke bakalume benu. Pano bino, umvwe ngiye namushinde ne kumwipaya, anweba musakwikala ke bakalume betu. Endeshai, mpai muntu ndwe nanji.’

Davida waipwizhe bashilikale bamo amba: ‘Ki ka kyo bakamupa awa muntu ukepaya uno mwina Filishitiya ne kwibafumya bumvu bena Isalela?’

Mushilikale waambile’mba: ‘Saulo ukapa yeo mwanamulume bunonshi bwavula. Kabiji ukamupa mwananji wa mukazhi kwikala ke mukazhanji.’

Bena Isalela bonse bamuchiinenga Goliata mambo wajinga muntu wabaya bingi ne kulepa. Walepele mamita asatu kabiji wajinga ne na mukwabo mushilikale wamusendelangako jikebo janji.

Bashilikale bamo bayile ne kukabula Mfumu Saulo amba Davida ukeba kulwa na Goliata. Bino Saulo waambijile Davida amba: ‘Kechi wakonsha kumulwisha uno mwina Filishitiya ne. Obewa ukiji mwanyike, kabiji aye wapijilwa kulwa nkondo kufumatu ku bwanyike bwanji.’ Davida wamukumbwile’mba: ‘Naipayile mbeyala ne bokwe basendele mikooko ya batata. Kabiji ne uno mwina Filishitiya wafwainwa kufwa. Yehoba usakunkwasha.’ Onkao mambo, Saulo waambile’mba: ‘Yanga, kabiji Yehoba ekale nobe.’

Davida wayile ku kakola kabiji wakasalulwilemo tumabwe twa nguzha twalamba tutanu ne kwitubika mu fukuta wanji. Washikwile kinzhipunzhipu kyanji ponkapo keafwenye ne kwipi kwi yewa kitonzhi. Goliata byo amumwene, wakuminye bingi. Walangulukile’mba usakumwipaya Davida ne kimye kishaleko.

Davida ubena kwasa jibwe

Goliata waambile’mba: ‘Iyanga, mpane mubiji obe ku bañonyi ne banyama baje.’ Bino Davida waambile’mba: ‘Obewa waiya kwi amiwa na mpoko, na jifumo ne na mpula, pakuba amiwa naiya kwi obewa mu jizhina ja Yehoba. Mu jino juba ja lelo, Yehoba usakukupana obewa mu kuboko kwami, kabiji nsakukwipaya.’

Ponkapo, Davida wayile lubilo na kumutundaila Goliata. Washikwile jibwe mu fukuta wanji wijibika mu kinzhipunzhipu kyanji kabiji wijitayile na ngovu yanji yonse. Jibwe jazhipukile ne kuya na kufikila pa kilungi kya kwa Goliata kabiji ponkapo waponene ne kufwa wafwa! Bena Filishitiya byo bamwene’mba kitonzhi wabo wapona, bonse banyemene lubilo. Bena Isalela bapupijile balwanyi ne kwibashinda.

1 Samwela 17:1-54.



Mepuzho

  • Goliata wakatazhanga byepi nzhita ya bena Isalela?
  • Goliata wabayile byepi, kabiji Mfumu Saulo walayile kupana kilambu ka ku muntu wakonsheshe kwipaya Goliata?
  • Davida waambile’mba ka Saulo byo amubujile’mba kechi wakonsheshe kulwisha Goliata ne, mambo wakijinga mwanyike?
  • Pa kukumbula Goliata, Davida wamwesheshe byepi amba waketekejile mwi Yehoba?
  • Kwesakana na byo wamona pa kikye kipikichala, Davida waingijishe ka pa kwipaya Goliata, kabiji ki ka kyamwekele ku bena Filishitiya panyuma ya kino?

Mepuzho akwabo

  • Tanga 1 Samwela 17:1-54.

    Ki ka kyalengelanga Davida kubula kwikala na moyo, kabiji twakonsha kulonda byepi kuchinchika kwanji? (1 Sam. 17:37, 45; Efi. 6:10, 11)

    Mambo ka bena Kilishitu kyo bafwainwa kuchinuzhukila mupashi wa kwitota nabiji wajingapo ne Goliata umvwe ke bakaye bisela? (1 Sam. 17:8; Nga. 5:26; 1 Timo. 4:8)

    Byambo bya kwa Davida bimwesha byepi amba waketekejile mu bukwasho bwa Lesa? (1 Sam. 17:45-47; 2 Moba. 20:15)

    Mu kifulo kya kulondolola mwatajile bulwi bwajinga pakachi ka mazhita abiji, jino jishimikila jimwesha byepi amba ino nkondo kya kine yajinga pakachi ka balesa babubela ne Lesa wakine, aye Yehoba? (1 Sam. 17:43, 46, 47)

    Nga bashingwa bashalapo balonda byepi kya kumwenako kya kwa Davida kya kuketekela mwi Yehoba? (1 Sam. 17:37; Yele. 1:17-19; Lum. 12:17)