MU BAIBOLO muji buku utelwa’mba Luta. Waamba pa kisemi kyaikalangako kimye kyo kwajinga bamitonyi mu Isalela. Luta wajinga kamwale wa ku kyalo kya Moabu. Kechi wajinga wa mu mukoka wa bena Isalela ba Lesa ne. Bino Luta byo afunjile pe Yehoba Lesa wa kine, waishile kumutemwa bingi. Naomi wajinga mwanamukazhi wakoma awo wakwashishe Luta kumuyuka Yehoba.

mwatawanji ne baana babo ba balume babiji bayile ku kyalo kya Moabu kimye mu Isalela kyo mwabujile kajo ka kuja. Juba jimo mwatawanji Naomi wafwile. Mu kuya kwa moba, baana babiji ba balume ba kwa Naomi basongwele banabakazhi bena Moabu batelwanga’mba Luta ne Olipa. Pano byo papichile myaka nobe jikumi, baana babiji ba kwa Naomi bafwile. Naomi ne bako banji babiji byo bajingapo na bulanda! Pano Naomi waubilepo ka?

Juba jimo Naomi wafukwilepo kwenda museke walepa bingi kubwela ku muzhi kwajinga balongo banji. Luta ne Olipa bakebele kwikala nanji, onkao mambo bayile nanji. Pano byo baendeleko musinso, Naomi waambijile bano banabakazhi amba: ‘Bwelai bonse na kwikala na bainenu.’

Naomi wibafyompele ne kwibashajikapo. Kepo batendekele kujila, mambo bamutemenwe bingi Naomi. Baambile’mba: ‘Ine, tusa kuya nenu ku balongo benu.’ Pakuba Naomi wibambijile’mba: ‘Bwelai baana bami, kwenu kukemuwamina.’ Kepo Olipa atendekeleko kubwela ku balongo banji. Bino Luta wakaine kubwelamo.

Naomi wamwambijile amba: ‘Olipa wabwelamo. Bwelanga ne obewa, umulondele.’ Pakuba Luta waambile’mba: ‘Kechi munkanjikizhe kwimuleka ne, ndekai ngye nenu. Ko mukaya anweba, ne amiwa ko ko nkaya; kabiji akwa ko mukekala, ko konka ko nkekala ne amiwa. Balongo benu bakekala ke balongo bami, ne Lesa wenu ukekala ke Lesa wami. Kabiji akwa ko mukafwila ko konka ko nkafwila ne amiwa, kabiji i ko ko bakanzhika.’ Luta byo aambile bino byambo, Naomi walekele kumwambila’mba abwelemo.

Kyapeleleko bano banabakazhi bafikile ku Isalela. Ko ko baikelenga. Ponkapo, Luta watendekele kwingijila mu majimi, mambo kyajinga kimye kya kunowa mbaale. Muntu wa jizhina ja Boaza wamulekele Luta saka apupula mbaale mu bujimi bwanji. Nanchi wamuyuka inanji Boaza nyi? Wajinga Lehaba waikalanga mu muzhi wa Yeliko.

Juba jimo Boaza waambijile Luta amba: ‘Bambula kala bulongo byonse byo wibobila ba Naomi. Naumvwa byo wibaleka bashobe ne bainobe ne kyalo kyobe, ne kwiya waiya ku bantu bo wabujile kuyukapo kala. Kine Yehoba akubile bibusa!’

Luta wakumbwile’mba: ‘Mwangubila bingi lusa, nkambo yami. Mwantekenesha, ne kuñambila bya lusa.’ Boaza wamutemenwe bingi Luta, kabiji kechi papichile ne kimye kyabaya ne, baishile kwisongola. Kino kyamusangajikile bingi Naomi! Bino Naomi wakijilemo ne kutemwa kimye Luta ne Boaza kyo basemene mwana wa mulume watumbilwe jizhina amba Obeda. Kulutwe na lwendo Obeda waikele ke mushakulu wa kwa Davida, ye tusakukafundapo kyabaya bingi.

Luta ne Naomi

Buku wa mu Baibolo wa Luta.



Mepuzho

  • Naomi witaine byepi mu ntanda ya bena Moabu?
  • Naomi ne Olipa bo bañanyi?
  • Naomi byo abujile Luta ne Olipa amba babwelemo kwabo, abo baubilepo byepi?
  • Boaza ye ñanyi, kabiji wakwashishe byepi Luta ne Naomi?
  • Mwana wasemene Boaza ne Luta bamutumbile jizhina ka, kabiji mambo ka o twafwainwa kumuvulukilanga?

Mepuzho akwabo

  • Tanga Luta 1:1-17.

    Byambo ka bya butemwe bwakosa byaambile Luta? (Luta 1:16, 17)

    Milanguluko ya kwa Luta imwesha byepi byubilo bya ‘mikooko ikwabo’ ku bena Kilishitu bashingwa baji panopantanda mu ano moba? (Yoa. 10:16; Zeka. 8:23)

  • Tanga Luta 2:1-23.

    Luta washile byepi kya kumwenako kyawama ku banabakazhi ba mu ano moba? (Luta 2:17, 18; Mana. 23:22; 31:15)

  • Tanga Luta 3:5-13.

    Boaza wamwene byepi Luta byo akebelenga kusongolwa kwi aye mu kifulo kya kusongolwa ku nsongwalume?

    Tufunjilako ka ku byubilo bya kwa Luta kutazha ku butemwe bwakosa? (Luta 3:10; 1 Ko. 13:4, 5)

  • Tanga Luta 4:7-17.

    Banabalume ba bwina Kilishitu ba mu ano moba bakonsha kwikala byepi nobe Boaza? (Luta 4:9, 10; 1 Timo. 3:1, 12, 13; 5:8)