AKIMONA kibena kumwekanyika papo! Awe ye Mosesa uji na kichi kyo atanyikila pa Kalunga Kachila. Abe boaji nabo ku bushiya babula mu lukatazho ke bena Isalela. Bino Felo ne nzhita yanji babena kuloba mu kalunga ka mema. Twaya tumone kyalengejile bintu kwikala bino.

Nzhita ya bena Ijipita yaloba

Byonka byo twafunjile, Felo wabujile bena Isalela kufuma mu Ijipita panyuma ya kuba Lesa waleta mwalo wa bujikumi pa bena Ijipita. Nobe banabalume bena Isalela bafika ku 600,000 bafuminemo mu Ijipita pamo na banabakazhi bavula ne baana. Kabiji bantu bakwabo bavula baishile kwitabila mwi Yehoba, baijile pamo na bena Isalela. Bonse basendele mikooko, bambuzhi ne bañombe babo.

Saka bakyangye kufumamo mu Ijipita, bena Isalela balombele bena Ijipita kwibapapo bivwalo ne bintu byalengwa na ngolode ne siliva. Bena Ijipita baakaminwe bingi na mambo a mwalo wapeleleko wibaponejile. Kino kibalengejile kupa bena Isalela byonse byo bakebele.

Panyuma ya moba acheche bena Isalela bafikile ku Kalunga Kachila. Kuno ko ko bakokolokejile. Kwashajile Felo ne banabalume banji batendekele kwilangulusha na mambo a kuleka bena Isalela kuya. Baambile’mba: ‘Twaleka bazha betu baya!’

Onkao mambo, Felo waalwile muchima wanji jikwabo. Wanengezhezhe kalaki wa nkondo ne nzhita yanji. Watendekele ne kwibalondela bena Isalela na makalaki 600, kubikapotu ne makalaki akwabo a mu Ijipita.

Bena Isalela byo bamwene Felo ne nzhita yanji saka iya ko bajinga, mu manungo mwafikenejiletu kuzukuma. Kechi bajinga na kwa kunyemena ne. Kulutwe yabo kwajinga Kalunga Kachila, kunyuma yabo ko kwaishijilenga bena Ijipita. Bino Yehoba wabikile jikumbi pakachi ka bantu banji ne bena Ijipita. Kino kyalengejile bena Ijipita kukankalwa kumona bena Isalela kuba’mba bebalukuke.

Kepo Yehoba aambijile Mosesa kutanyika kichi kyanji pa Kalunga Kachila. Byo atanyikile kichi, Yehoba wafungile mema na mwela wakosa wa ku musela. Mema aabene ne kwimana mulumbulumbu konse kubiji.

Kepo bena Isalela batwelele mukachi ka kalunga ka mema sa benda pa mushiji wauma. Papichile kimye kyabaya bingi pa kuba’mba mamilyonyi a bantu ne banyama babo babuke bulongo kufika ne ku bushiya. Kyapeleleko bena Ijipita bamwene jikwabo bena Isalela. Bazha babo bayilenga! Onkao mambo bebapupijile mu kalunga ka mema.

Byo batwelele mu kalunga, Lesa walengejile bitanga bya ku makalaki abo kutendeka kusopaukako. Bena Ijipita baumvwine ne wa munda kuu ne kutendeka kwitamina miteto amba: ‘Yehoba ubena kwibalwila bena Isalela. Twayai tunyeme!’ Pano bino bakelelwe.

Pa kino kimye Yehoba po po aambijile Mosesa kutanyika kichi pa Kalunga Kachila byonka byo waji kumona pa kipikichala. Mosesa byo aubile bino, mema aimene mulumbulumbu abwelele ne kulobesha bena Ijipita ne makalaki abo onse. Nzhita yonse yapupijile bena Isalela mu kalunga. Kafwako nangwa umo mwina Ijipita wapulukile ne!

Bantu ba Lesa bonse byo basangalelepo pa kwibapulusha! Banabalume baimbile lwimbo wa kumwesha kusanta kwi Yehoba amba: ‘Yehoba watumbalala ne kutumbalala. Bambili ne bendapo wibataya mu kalunga ka mema.’ Nyenga ya kwa Mosesa aye Milyama washikwile munsakayi mu kuboko kwanji ne banabakazhi bonse balupukile ku nyuma yanji na minsakayi yabo. Kabiji byo bazhilenga na mambo a lusekelo, baimbilenga lwimbo yenka waimbilenga banabalume amba: ‘Yehoba watumbalala ne kutumbalala. Bambili ne bendapo wibataya mu kalunga ka mema.’

Kulupuka kitango 12 kufika ku kitango 15.



Mepuzho

  • Bena Isalela babalume, kuvwangako banabakazhi ne baana babo bafumine mu Ijipita bajinga banga, kabiji bañanyi bakwabo bo bafumine nabo?
  • Felo wiumvwine byepi byo aswishishe bena Isalela kuya, kabiji waubilepo ka?
  • Yehoba waubile byepi pa kuba’mba bena Ijipita babule kulukuka bantu banji?
  • Ki ka kyamwekele Mosesa byo atanyikile kichi kyanji pa Kalunga Kachila, kabiji bena Isalela baubilepo byepi?
  • Ki ka kyamwekele bena Ijipita byo bapupijile bena Isalela mu kalunga?
  • Bena Isalela bamwesheshe byepi amba basangalele ne kusanchila Yehoba pa byo ebapulwishe?

Mepuzho akwabo

  • Tanga Kulupuka 12:33-36.

    Yehoba waubile byepi pa kuba’mba bantu banji bebafwete pa myaka yabo yonse yo bebamanyikilenga ku bena Ijipita mu buzha? (Lupu. 3:21, 22; 12:35, 36)

  • Tanga Kulupuka 14:1-31.

    Byambo bya kwa Mosesa byanembwa pa Kulupuka 14:1-31 bifika byepi pa michima ya bakalume ba Yehoba lelo jino byo babena kutengela nkondo ya Amagedonyi? (2 Moba. 20:17; Sala. 91:8)

  • Tanga Kulupuka 15:1-8, 20, 21.

    Mambo ka bakalume ba Yehoba kyo bafwainwa kumwimbila ya kumutota? (Lupu. 15:1, 2; Sala. 105:2, 3; Lum. 15:3, 4)

    Kya kumwenako ka kyaamba pa kutumbijika Yehoba kyamwesheshe Milyama ne babakazhi ku Kalunga Kachila kyo bashila babakazhi ba bwina Kilishitu ba mu ano moba? (Lupu. 15:20, 21; Sala. 68:11)