YOSEFWA wakankelwe kuchinchika. Kepo abujile bakalume banji bonse kulupukamo mu kibamba. Byo ashajiletu na bakolojanji wajijile kyakosa bingi. Twakonsha kufwanyikizha kino byo kyakankamikile bakolojanji, mambo kechi bayukile ene mambo o ajijilenga ne. Kyapeleleko, waambile’mba: ‘Amiwa ne Yosefwa. Batata bakiji bomi nyi?’

Bakolojanji bakankamenetu, bakankelwe ne kya kuba’mba bambe. Baubile moyo. Bino Yosefwa wibambijile’mba: ‘Fwenyai kwipi ne amiwa.’ Byo bafwenyenye kwipi, wibabujile’mba: ‘Amiwa ne Yosefwa ye mwapoteshe ku ntanda ya Ijipita.’

Yosefwa watwajijile kwamba na lusa amba: ‘Kechi mwipemo mambo byo mwampotesheshe kuno ne, mambo aye Lesa ye wantumine amiwa ku Ijipita mu kupulusha myeo ya bantu. Felo wantongola kwikala ndamakyalo wa kyalo kyonse. Pano mupelawizhe muye kwi batata, mukebambile byonse. Kabiji mukebabule amba bakeye na kwikala kuno.’

Kepo Yosefwa ebafukachile ne kwibafyompa bonse balongo banji. Felo byo aumvwine’mba balongo ba kwa Yosefwa baiya, waambijile Yosefwa amba: ‘Bambilai baye na banyama ne kuya na kuleta bashabo ne balongo babo beye kuno. Nkebapa byawamisha bya mu ntanda yonse ya Ijipita.’

Bino byo byo baubile. Wamona pano Yosefwa byo abena kutundaila bashanji baishilenga mu Ijipita na kisemi kyabo kyonse.

Kisemi kya kwa Yakoba kyabayile bingi. Bonse pamo bajinga 70 byo bavilukijile mu Ijipita, Yakoba ne baana banji kubikapotu ne bankana banji. Bino pajinga ne banabakazhi, kampe ne bakalume bavula bingi. Bano bonse baikajilenga mu Ijipita. Baichilwenga’mba bena Isalela, mambo Lesa wapimpwile jizhina ja kwa Yakoba ke Isalela. Bena Isalela bajinga bantu ba Lesa beikajila, byonka byo tukamona kulutwe.

Ntendekelo 45:1-28; 46:1-27.

Yosefwa na bakolojanji ne bashanji


Mepuzho

  • Ki ka kyamwekele Yosefwa byo elumbulwijile ku bakolojanji?
  • Bintu ka Yosefwa byo alumbulwijile bakolojanji mu butekanye?
  • Felo waambile’mba ka byo aumvwine amba bakolojanji Yosefwa baiya?
  • Kisemi kya kwa Yakoba kyabayile byepi byo bavilukijile ku Ijipita?
  • Kisemi kya kwa Yakoba kyatendekele kutelwa amba ka, kabiji mambo ka?

Mepuzho akwabo

  • Tanga Ntendekelo 45:1-28.

    Jishimikila ja kwa Yosefwa jiji mu Baibolo jimwesha byepi amba Yehoba wakonsha kuzhalulula kintu kyakonsha kuletela bakalume banji bulemo kya kuba mwafuma ne byawama? (Nte. 45:5-8; Isa. 8:10; Fili. 1:12-14)

  • Tanga Ntendekelo 46:1-27.

    Yehoba wamulayile’mba ka Yakoba byo ayilenga ku Ijipita? (Nte. 46:1-4)