Mizhilo ya Mosesa yakambizhe kuba’mba muntu ubena kukeba kukana mukazhanji wafwainwa kunemba kyete kya kumukainapo. Uno muzhilo wazhikijilanga bantu kubula kwikana. Nangwa byonkabyo, Yesu byo ajinga pano pa ntanda, bantangi ba bupopweshi bapeezhezhe bingi mizhilo inge bantu bakeba kwikana. Banabalume bakananga bakazhi babo pabula ne mambo ene a kwikainapo. (“kyete kya kumupala” kulumbulula byambo biji pa Mako 10:4, nwtsty; “Yense ukana mukazhanji,” “wauba bukende kabiji kechi wa kishinka ku mukazhanji ne” kulumbulula byambo biji pa Mako 10:11, nwtsty) Yesu waambile’mba Yehoba ye mwine wabikako masongola. (Mako 10:2-12) Ba mulume ne mukazhi bafwainwa kwikala “mubiji umo” myaka ne myaka. Mambotu a kwikainapo kwesakana na byambo biji mu Mateo ke “bulalelale.”—Mat 19:9.

Bantu bavula lelo jino kechi banemeka masongola byonkatu byaambile Yesu ne, pakuba bajitu byonka byajinga Bafaliseo. Inge mu masongola mwaikala makatazho, bantu babula kuyuka abo bafuukulapo kwikana. Pakuba bena Kilishitu baji mu masongola, banemeka luchipo lwa masongola ne kwingijisha mafunde a mu Baibolo kwibakwasha kuyuka mwa kubila na makatazho o bapitamo. Inge mupwishe kutamba vidyo wa kuba’mba Butemwe ne Mushingi Bikwasha Kisemi Kukwatankana, apa bino mwisambe ano mepuzho:

  • Mwakonsha kwingijisha byepi byambo biji pa Byambo bya Maana 15:1 mu masongola enu, kabiji mambo ka o kyawamina?

  • Mwakonsha kukepeshako byepi makatazho inge mwaingijisha byambo biji pa Byambo bya Maana 19:11?

  • Ñanyi mepuzho o mwafwainwa kwiipuzha inge masongola enu aji mu lukatazho kabiji mubena kulanguluka’mba mwikane?

  • Mwakonsha kwikala byepi mwanamulume nangwa mwanamukazhi wawama inge mwaingijisha byambo biji pa Mateo 7:12?