Paulo ne Silasa batotelenga Lesa byo bajinga mu kaleya. (By 16:25) Mu ano moba, bena Kilishitu bakwetu baimbilenga nyimbo ya Bufumu byo bajinga mu kaleya ka ba Nazi ka Sachsenhausen mu Germany ne byo bajinga mu kaleya mu Siberia. Bino bya kumwenako bimwesha kuba’mba nyimbo yakonsha kukwasha bena Kilishitu babena kupita mu meseko kuchinchika.

Katatakatu mu milaka yavula basakwikala na buku wa nyimbo wa katataka uji na mutwe wa kuba’mba ‘Imbilainga Yehoba na Lusekelo.’ Inge tukatambwile uno buku wa nyimbo, twafwainwa kufundanga ino nyimbo pa kupopwela kwa kisemi pa kuba’mba tukeilabijile. (Ef 5:19) Kuba bino kukalengela mupashi wazhila kwitukwasha kwiivuluka inge ke tupite mu meseko. Nyimbo ya Bufumu itukwasha kuta muchima pa luketekelo lwetu. Itukwasha kuchinchika inge tubena kupita mu meseko. Kabiji inge tubena kumvwa bulongo pa kwimba, byambo byawama bijiimo bitukwasha ‘kwimba na lusekelo’ mambo bitufika pa michima yetu. (1Mo 15:16; Sl 33:1-3) Twayai tufundenga ne kwimba nyimbo yetu ya Bufumu.

TAMBISHAI VIDYO WA KUBA’MBA LWIMBO WATUNDAIKILE BAJINGA MU KALEYA. APA BINO MUKUMBULE MEPUZHO ALONDELAPO:

  • Ñanyi bintu byalengejile Mulongo Frost kunemba uno lwimbo?

  • Uno lwimbo watundaikile byepi balongo bajinga mu kaleya ka Sachsenhausen?

  • Nyimbo ya Bufumu yakonsha kwimukosesha byepi mu bintu byo mupitamo pa juba pa juba?

  • Ñanyi nyimbo ya Bufumu yo mwakonsha kutemwa kulabijila?