Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Yoba 15:1-35

BIJI MU BUKU

  • Byambo bya bubiji bya kwa Elifwaza (1-35)

    • Waamba’mba Yoba kechi wakamwa Lesa ne (4)

    • Waambila Yoba amba witota (7-9)

    • ‘Lesa kechi waketekela bazhila banji ne’ (15)

    • ‘Awa umanama ye mubi’ (20-24)

15  Elifwaza+ mwina Temanyi wakumbwile’mba:   “Nanchi muntu wa maana wakonsha kukumbula na byambo* byatutu nyi? Nangwa abya wakonsha kuyuzha muchima wanji na byambo byatutu nyi?   Kunenañana na byambotu ko kwatu,Kabiji mu kwambatu kafwamo byawama bifumamo.   Mambo obewa wapeezha kwakamwa Lesa,Kabiji kechi wata muchima pa buneme bwa kulanguluka languluka pe Lesa ne.   Mambo bubi bobe bo bukufunjisha bya kwamba,*Kabiji usalapo ñambilo ya bujimuku.   Kanwa kobe ko kakuzhachisha kechi amiwa ne;Byatunwa byobe byo bikushinawina.+   Nanchi yobe wajinga mutanshi kusemwa nyi? Nangwa abya wasemenwe tutumbatumba saka tukyangye kwikalako nyi?   Nanchi utelekako ku mwisambo wa Lesa wa mu bufyamfya nyi? Nangwa ubena kulanguluka’mba yobe yenka ujitu na maana nyi?   Ñanyi bintu byo wayuka byo twabula kuyuka atweba?+ Ñanyi bintu byo ukwatakanya, byo tubula kukwatakanya atweba? 10  Baji na mvwi ne bakote bonse tuji nabo,+Banabalume bakoma kukila bashobe. 11  Nanchi byambo bya Lesa bya lutekenesho kechi bya kuwaina,Nangwa byambo byo bakwambila saka batekanya nenyi? 12  Ñanyi kintu kikulengela kukosesha muchima wobe? Kabiji mambo ka meso obe kyo amwekela bukaji? 13  Mambo wazhingijila Lesa,Ne kuswisha byambo bya uno mutundu kulupuka mu kanwa kobe. 14  Muntu ufwa ye wa byepi kya kuba’mba ekale watoka? Nangwa yense wasemwa ku mwanamukazhi kya kuba’mba ekale waoloka?+ 15  Umvwa, aye kechi waketekela bazhila banji ne,Kabiji nangwatu mwiulu kechi mwatoka ku meso anji ne.+ 16  Kikakilamo ku muntu uba bya bunya ne bujimbijimbi,+Ukebesha kuba byatama byonkatu muntu byo akebesha kutoma mema! 17  Nsakukubuula; nteleke! Nsakukubuula bintu byo namona, 18  Bintu bantu ba maana byo bebashimikizhe ku bashabo,+Bintu byo babujile kufya. 19  Bonka bo bapeletu kyalo,Kabiji kafwako mwenyi wapichile po bajinga ne. 20  Muntu mubi umanama moba anji onse,Muntu wakanama naye umanama myaka yanji yonse yo bamulamina. 21  Matwi anji omvwa bintu bilengesha moyo;+Mu kimye kya mutende, mazhita amulukuka. 22  Kechi waketekela’mba ukafumamo mu mfishi ne;+Bamulamina kuba’mba bakamwipaye na mpoko. 23  Upitañana na kukeba kajo* ne kwipuzha’mba, kaji pi? Wayukishatu bulongo kuba’mba juba ja mfishi jijitu pepi. 24  Bya malwa ne bulanda bimumvwisha moyo;Bimushinda byonkatu byuba mfumu winengezha kuya na kulwa. 25  Mambo aye watanyika kuboko kwanji na kulwisha LesaKabiji ukeba kulengulula* wa Bulume Bonse; 26  Na mambo a kwitota umuvundumukila,Na jikebo janji jajita ne kukosa; 27  Kilungi kyanji kyaubisha mafuta,Ne kifuka kyanji kyabaya na mafuta; 28  Wikala mu mizhi yo bakonauna,Mu mazubo mukabula kwikala muntu nangwa umo ne,Onka akashalatu ke milumba ya mabwe. 29  Kechi ukanonka ne, kabiji bya bunonshi byanji kechi bikavula ne,Ne bintu byo aji nabyo kechi bikakumbana mu kyalo ne. 30  Kechi ukafumamo mu mfishi ne;Lubebe lukomisha musampi wanji ubena kusapuka,*Kabiji ukafwa na jiwi ja mu kanwa ka Lesa.*+ 31  Kechi wafwainwa kuya mungi ne kuketekela mu bintu byatutu ne;Mambo bintu byo akatambula bikekalatu byatutu; 32  Kikamweka juba janji saka jikyangye kufika,Ne misampi yanji kechi ikatepukanga ne.+ 33  Ukekalatu nobe muñanzañanza wakunta mañanzañanza anji abishi,Kabiji ukekala nobe kichi kya maolivi kyakunta buluba bwakyo. 34  Mambo jibumba ja bantu babula kwakamwa* Lesa kechi jikekala na bulume ne,+Kabiji mujilo ukasoka matente a ba mazhikakanwa. 35  Bemita makatazho ne kusema bubi,Mu mavumo abo mufuma bujimbijimbi.”

Tubyambo twa munshi

Nangwa’mba “na maana atutu.”
Nangwa’mba “bubi bobe bwafunjisha kanwa kobe.”
Mu Kihebelu, “shinkwa.”
Nangwa’mba “ukeba kushinda.”
Ko kuba’mba, luketekelo lwa kwikalako jibiji.
Mu Kihebelu, “kanji.”
Nangwa’mba “ja bansatuki.”