Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Yelemiya 38:1-28

BIJI MU BUKU

  • Yelemiya bamutaya mu mushima (1-6)

  • Ebeda-meleka wapokolola Yelemiya (7-13)

  • Yelemiya watundaika Zedekiya kwipana (14-28)

38  Shefwatiya mwana wa kwa Matana, Gedaliya mwana wa kwa Pashula, Yukala+ mwana wa kwa Shelemioya ne Pashula+ mwana wa kwa Malakiya, baumvwine Yelemiya byo aambijilenga bantu bonse amba:  “Yehoba waamba’mba, ‘Awa ukashala mu uno muzhi ukafwa ku mpoko, ku kipowe kya nzala ne ku mwalo.*+ Pano bino, awa ukepana* ku bena Kalodeya kechi ukafwa ne, kabiji bumi* bwanji bukekala nobe kintu kyo apukula* kabiji ukekala na bumi.’+  Yehoba waamba’mba, ‘Uno muzhi bakamupana mu maboko a bashilikale ba mfumu wa Babilona kabiji bakamushinda.’”+  Babinemanga baambijile mfumu amba: “Mumwipaye uno muntu,+ mambo ubena kupwisha kizaku* kya bashilikale bashala mu uno muzhi ne bantu bonse na byambo byanji byo abena kwibambila. Mambo uno muntu kechi ukeba’mba bano bantu bekale mu mutende ne, ukeba’mba bamone bya malwa.”  Mfumu Zedekiya wibakumbwile’mba: “Umvwai! Amiwa namupana mu maboko enu, mambo mfumu kechi wakonsha kwimukanya ne.”  Ponkapo basendele Yelemiya ne kumutaya mu mushima* wa kwa Malakiya wajinga mu Kipango kya kwa Kasopa.+ Bamwikizhemo Yelemiya na ntambo. Mu uno mushima* kechi mwajinga mema ne, mwajingatu mateshi, kabiji Yelemiya watapamine mu mateshi.  Ebeda-meleka+ ntungu* mwina Etiopya wa mu nzubo* ya mfumu waumvwine’mba Yelemiya bamutaya mu mushima.* Pa kyokya kimye, mfumu waikajile mu Kibelo kya Benjamina.+  Onkao mambo, Ebeda-meleka wayile ku nzubo* ya mfumu ne kwambila mfumu amba:  “Anweba mfumu nkambo yami, kintu kyauba bano bantu kwi Yelemiya kyatama bingi. Bamutaya mu mushima* kabiji usakufwa na nzala mambo mu muzhi kechi mwashalapo shinkwa ne.”+ 10  Kepo mfumu akambizhe Ebeda-meleka mwina Etiopya amba: “Senda banabalume 30 mu uno muzhi ne kuya na kufumya ngauzhi Yelemiya mu mushima* saka akyangye kufwa.” 11  Onkao mambo, Ebeda-meleka wayile na banabalume ku nzubo* ya mfumu mu mpunzha yajinga panshi yo balaminangamo bya buneme,+ kabiji batolelemo misakila ne bivwalo byafwafwafwa ne kwibikizha na ntambo mu mushima* mwajinga Yelemiya. 12  Ponkapo Ebeda-meleka mwina Etiopya waambijile Yelemiya amba: “Bika misakila ne bivwalo byafwafwafwa mu mapa obe, apa bino ukobekemo ntambo.” Yelemiya waubile byonkabyo, 13  kabiji bamutuntwile Yelemiya mu mushima* na ntambo. Byonkabyo, Yelemiya waikelenga mu Kipango kya kwa Kasopa.+ 14  Mfumu Zedekiya watumine bantu kuba’mba balete ngauzhi Yelemiya kwi aye ku kibelo kya busatu kyajinga mu nzubo ya Yehoba kabiji mfumu waambijile Yelemiya amba: “Kuji kintu kyo nkeba kukwipuzha. Kange umfye kintu nangwa kimo ne.” 15  Kepo Yelemiya aambijile Zedekiya amba: “Umvwe nemubuule, anweba musakungipaya. Kabiji inge nemubuule bya kuba kechi musakuswa ne.” 16  Ponkapo Mfumu Zedekiya wachipile kwi Yelemiya mu bufyamfya amba: “Byonkatu Yehoba byo aji na bumi, yenka witupa buno bumi,* kechi nsakukwipaya nangwa kukupana ku bano bantu babena konauna bumi* bobe ne.” 17  Yelemiya waambijile Zedekiya amba: “Yehoba, Lesa wa mabumba, Lesa wa Isalela waamba’mba, ‘Umvwe mwipane* ku babinemanga ba mfumu wa Babilona, kechi bakemwipaya ne,* ne uno muzhi kechi bakamusoka ne, kabiji anweba ne ba mu nzubo yenu mukekala na bumi.+ 18  Bino umvwe mukane kwipana* ku babinemanga ba mfumu wa Babilona, uno muzhi bakamupana ku bena Kalodeya kabiji bakamusoka,+ ne anweba kechi mukapuluka mu maboko abo ne.’”+ 19  Kepo Mfumu Zedekiya aambijile Yelemiya amba: “Amiwa mbena kuchina Bayudea bo batwala ku bena Kalodeya, mambo inge bampana kwi abo bakanguba kintu kyatama bingi.” 20  Pakuba Yelemiya waambile’mba: “Kechi bakemupana kwi abo ne. Anweba kookelaitu byambo bya Yehoba byo nemubuula, ne bintu bikemuwamina, kabiji anweba* mukekala na bumi. 21  Pano bino, umvwe mukane kwipana,* Yehoba wambuula’mba: 22  “Umvwai! Banabakazhi bonse bashala mu nzubo* ya mfumu wa Yuda babena kwibalupulamo ne kwibatwala ku babinemanga ba mfumu wa Babilona+ kabiji babena kwamba’mba,‘Banabalume bo mwaketekejile* bemujimbaika kabiji bemushinda.+ Balengela maulu enu kutapama mu mateshi. Kabiji banyema ne kwimusha.’ 23  Kabiji bakazhi benu bonse ne baana benu bonse babena kwibatwala ku bena Kalodeya kabiji kechi mukapuluka mu kuboko kwabo ne, bino bakemukwata kwi mfumu wa Babilona+ kabiji uno muzhi bakamusoka na mambo a anweba.”+ 24  Kepo Zedekiya aambijile Yelemiya amba: “Kange ubuulepo muntu nangwa umo bino bintu ne, kuchina’mba bakakwipaya. 25  Kabiji umvwe babinemanga baumvwa’mba naji kwisambanga ne obewa, kabiji baiya ne kukwambila’mba, ‘Tubuule bintu byo waji kubuula mfumu. Kange witufye kintu nangwa kimo ne, ne atweba kechi tusakukwipaya ne.+ Nanchi mfumu waji kukwambila’mba ka?’ 26  ukebakumbule’mba, ‘Naji kulombanga mfumu namba abule kumbwezha ku nzubo ya kwa Yehonafwanyi kuchina’mba nakafwila konka.’”+ 27  Ponkapo babinemanga bonse baishile kwi Yelemiya nakumwipuzha. Ne aye wibabuujile bintu byonse byamukambizhe mfumu kwamba. Onkao mambo, balekele kumwipuzha, mambo kafwako muntu nangwa umo waumvwine byo besambilenga ne. 28  Yelemiya watwajijile kwikala mu Kipango kya kwa Kasopa+ kufikatu ne juba jo bashinjile Yelusalema; wakijinga monka byo bashinjile Yelusalema.+

Tubyambo twa munshi

Nangwa’mba “kikola.”
Mu Kihebelu, “ukaya.”
Nangwa’mba “mweo wanji.”
Nangwa’mba “ukapuluka na bumi bwanji.”
Mu Kihebelu, “maboko.”
Ko kuba’mba, kimbo mwa kulamina mema.
Ko kuba’mba, kimbo mwa kulamina mema.
Nangwa’mba “kapaso wa mfumu.”
Nangwa’mba “jilapa.”
Ko kuba’mba, kimbo mwa kulamina mema.
Nangwa’mba “jilapa.”
Ko kuba’mba, kimbo mwa kulamina mema.
Ko kuba’mba, kimbo mwa kulamina mema.
Nangwa’mba “jilapa.”
Ko kuba’mba, kimbo mwa kulamina mema.
Ko kuba’mba, kimbo mwa kulamina mema.
Nangwa’mba “witupa uno mweo.”
Nangwa’mba “babena kukeba mweo wobe.”
Mu Kihebelu, “muye.”
Nangwa’mba “mweo wenu ukatwajijila kwikala na bumi.”
Mu Kihebelu, “kuya.”
Nangwa’mba “mweo wenu.”
Mu Kihebelu, “kuya.”
Nangwa’mba “jilapa ja.”
Mu Kihebelu, “Banabalume ba mutende wenu.”