Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Yelemiya 16:1-21

BIJI MU BUKU

  • Yelemiya kechi wafwainwa kusongola, kujila nangwa kuja kijiilo ne (1-9)

  • Kukambulwa, apa bino palondela kubwezha bintu (10-21)

16  Yehoba wañambijile jibiji amba:  “Kechi wafwainwa kusongola mwanamukazhi ne kusema baana ba balume ne baana ba bakazhi mu ino mpunzha ne.  Mambo Yehoba waamba pa baana ba balume ne baana ba bakazhi babena kusemwa mu ino mpunzha ne pa mambo a bainabo ne bashabo bebasemene mu kino kyalo amba:  ‘Bakafwa ku bikola bikatampe,+ bino kafwako muntu nangwa umo ukebajila nangwa kwibazhiika ne; bakekala nobe mbolezha mu mushiji.+ Bakafwa ku mpoko ne ku kipowe kya nzala+ kabiji mibiji yabo yafwa ikekala ke kajo ka bañonyi ne banyama ba mungye.’   Mambo Yehoba waamba’mba,‘Kange mutwele mu nzubo muji kijiilo kya baji pa kijilo ne,Kabiji kange muye na kwibajijishapo nangwa kwibatekenesha ne.’+ ‘Mambo amiwa nafumyapo mutende wami,Butemwe bwami bubula kwaluka ne lusa pa bano bantu,’+ byo byaamba Yehoba.   Banyike ne bakulumpe bonse bakafwila mu ino mpunzha. Kechi bakebazhiika ne,Kafwako muntu nangwa umo ukebajila ne,Kabiji kafwako muntu nangwa umo ukechibaula aye mwine nangwa kutenda kakuku mutwe na mambo a abo ne.*   Kabiji kafwako muntu nangwa umo ukaleta kajo ka kupa boba bakajilanga,Ka kwibatekenesha pa mambo a bantu babo bafwa ne;Kabiji kafwako muntu nangwa umo ukebapa katomeno ka kwibatekeneshaKuba’mba batome pa mambo a lufu lwa bashabo nangwa lwa bainabo ne.   Kabiji kechi mwafwainwa kutwela mu nzubo muji kijiiloNe kwikala nabo na kuja ne kutoma ne.’  “Mambo Yehoba wa mabumba, Lesa wa Isalela waamba’mba, ‘Mu moba a bwikalo bwenu mu ino mpunzha, amiwa nkazhindamika jiwi ja kusekela ne kusangalala, jiwi ja musongwa ne ja musongoshi anweba saka mutalako.’+ 10  “Byo ukebabuula bano bantu bino byambo byonse, abo bakakwipuzha’mba, ‘Mambo ka Yehoba o aambila’mba uketuletela bino bya malwa byonse bikatampe? Ñanyi bubi ne mambo o twamulenga Yehoba Lesa wetu?’+ 11  Obewa ukebakumbule’mba, “Yehoba waamba’mba, ‘Nkoba bino mambo bashakulu benu banshile amiwa+ ne kulondela balesa bangi na kwibengijila ne kwibafukamina.+ Bino amiwa bangalukijilemo kabiji kechi balamine mizhilo yami ne.+ 12  Pano anweba mwakizhamo kuba bintu byatama kukila bashakulu benu,+ kabiji anweba bonse pa muntu pa muntu mulondela bikeba michima yenu yatama kechi munkookela ne.+ 13  Onkao mambo, amiwa nkemufumyamo mu kino kyalo ne kwimutwala mu kyalo kyo mwabula kuyuka anweba nangwa bashakulu benu,+ kabiji mukengijilanga balesa bangi mute ne bufuku+ mambo kechi nkemubila lusa ne.”’ 14  “Yehoba waamba’mba, ‘Nangwa byonkabyo, moba abena kwiya po bakabula kwamba’mba: “Byonkatu Yehoba byo aji na bumi, yenka wafumishe bena Isalela mu kyalo kya Ijipita!”+ 15  pano bino, bakamba’mba: “Byonkatu Yehoba byo aji na bumi, yenka wafumishe bena Isalela mu kyalo kya ku kabeta ka ku buyeke ne mu byalo byonse mo ebapalañenyejile!” amiwa nkebabwezha ku kyalo kyabo kyo napele bashakulu babo.’+ 16  Yehoba waamba’mba, ‘Amiwa mbena kwita bantu bavula bakwata masabi,Kabiji bakebakwata. Kufuma bano, amiwa nketa babibinda bavula,Kabiji bakebakeba pa mitumba yonse ne pa tutumbatumba tonseNe mu milala ya mu mabwe. 17  Mambo meso ami amona bintu byonse byo boba.* Kechi bafyama kwi amiwa ne,Kabiji bubi bwabo kechi bwafyama ku meso ami ne. 18  Patanshi nkebobila monka mwayila bubi bwabo ne mambo abo,+Mambo batamisha kyalo kyami na bipashañano* bya bankishi babo ba bunya babula kupemaKabiji bakumbanya kyalo kyami na bintu byabo bya bunya.’”+ 19  Anweba Yehoba, yenu bulume bwami kabiji nsakwa yami yakosa,Yenu kya kufyamamo kyami mu kimye kya bya malwa,+Bisaka bya bantu bikeya kwi anweba kufuma monse mwaya ntanda,Kabiji bikamba’mba: “Bashakulu betu balondejilenga bintu bya bubela,Bintu byatu ne bintu byabula kunema byakonsha kubula kwibakwasha.”+ 20  Nanchi muntu wakonsha kwilengela aye mwine balesa nyi?Kechi wakonsha kulenga balesa ba kine ne.+ 21  “Onkao mambo, nkebafunjisha,Pa kikye kimye, nkebamwesha bulume bwami ne ngovu yami, Kabiji bakayuka’mba jizhina jami yami Yehoba.”

Tubyambo twa munshi

Bisho bya kujila bya bantu babula kupopwela Lesa kyamweka byaubanga bena Isalela basatukile.
Mu Kihebelu, “mu mashinda abo onse.”
Mu Kihebelu, “mibiji yafwa ya.”