Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Ngalatiya 3:1-29

BIJI MU BUKU

  • Mingilo ya Mizhilo ne lwitabilo (1-14)

    • Waoloka ukekala na bumi na mambo a lwitabilo (11)

  • Mulaye wa Abalahama kechi waishileko na Mizhilo ne (15-18)

    • Mwana wa kwa Abalahama, Kilishitu (16)

  • Ntendekelo ya Mizhilo ne ene mambo o yaikelako (19-25)

  • Baana ba Lesa na mambo a lwitabilo (26-29)

    • Baana ba kwa Abalahama, aba ba kwa Kilishitu (29)

3  Anweba bena Ngalatiya babula maana! Ñanyi wimujimbaikile,+ saka bemulumbulwijile bulongo pe Yesu Kilishitu ye bapopele pa kichi?+  Mbena kukeba kwimwipuzhako* pa kino kintu kimo: Nanchi mwatambwile mupashi wa Lesa na mambo a mingilo ya mizhilo nyi, inyi na mambo a kwitabila kintu kyo mwaumvwine?+  Nanchi kine maana mufwao nyi? Byo mwatendekele kwenda mu jishinda ja bumupashi,* abya ku mpelo mubena kwenda mu jishinda ja buntunshi* nyi?+  Nanchi mwapichile mu bya malwa byavula kyatutu nyi? Nayuka kechi kyajinga kyatutu ne.  Onkao mambo, awa wimupa mupashi ne kwingila mingilo ya kukumya+ mwi anweba, abya uba bino na mambo a mingilo ya mizhilo nyi, inyi na mambo a kwitabila kintu kyo mwaumvwine?  Byonkatu Abalahama “byo aitabijile mwi Yehoba,* bamutelele’mba waoloka.”+  Kine mwayuka’mba, aba baji na lwitabilo bo baana ba kwa Abalahama.+  Kabiji kinembelo byo kyamwenejile jimo amba Lesa ukatela bantu ba mu bisaka bya bantu amba baoloka na mambo a lwitabilo, kyaambijile jimo mambo awama kwi Abalahama amba: “Na mambo a obewa bisaka byonse bya bantu bikobilwa bibusa.”+  Onkao mambo, aba bakosela mu lwitabilo babena kubilwa bibusa byonka Abalahama wajinga na lwitabilo byo bamubijile bibusa.+ 10  Aba bonse baketekela mingilo ya mizhilo bafingwa, mambo kyanembwa’mba: “Wafingwa yense ubula kulama bintu byonse byanembwa mu muvungilo wa Mizhilo pa kubula kwibyuba.”+ 11  Kabiji kyamweka kuba’mba kafwako utelwa kwi Lesa amba waoloka na mambo a mizhilo ne,+ mambo “mololoke ukekala na bumi na mambo a lwitabilo.”+ 12  Mizhilo kechi yaimena pa lwitabilo ne. Pakuba, “awa uba bino bintu ukekala na bumi na mambo a kwibyuba.”+ 13  Kilishitu witupotele+ ne kwitukasulula+ ku mafingo a Mizhilo byo ealwile ke wafingwa, mambo kyanembwa’mba: “Muntu yense ye bakobeka pa kichi wafingwa.”+ 14  Kyajinga bino kuba’mba bibusa bya kwa Abalahama bikafike ku bisaka bya bantu kupichila mwi Kilishitu Yesu,+ kuba’mba monka mu lwitabilo lwetu tukatambule mupashi walayilwe.+ 15  Balongo bami, mbena kwamba mu kishimpi pa bimweka mu bwikalo bwa bantu amba: Umvwe lulayañano lwaikajikwa, nangwa lwa bantutu, kafwako nangwa umo ukelwalula ke lwatu nangwa kubikapo kikwabo ne. 16  Abalahama ne mwananji* batambwile milaye.+ Kinembelo kechi kyaamba’mba, “ne ku ba mu kisemi* kyobe,” uba nobe bavujile ne. Bino kyaamba’mba, “ne ku mwanobe,”* kumwesha’mba umotu, aye Kilishitu.+ 17  Kabiji naamba kino namba: Mizhilo yaishile kwikalako pa kupitapo myaka 430,+ kechi yaalula lulayañano Lesa lo alayañene kala, kuba’mba ifumyepo mulaye ne. 18  Mambo umvwe buswanyi bwaimena pa mizhilo, ko kuba’mba kechi bwaimena pa mulaye ne; bino Lesa wibupaine kwi Abalahama kupichila mu mulaye.+ 19  Nanchi Mizhilo yaikelako ka? Yanungilweko kuba’mba mizhilulwila isoloke,+ kufikatu ne kimye mwana* ye balayile mulaye kyo akafika;+ kabiji Lesa wapaine ino mizhilo kupichila mu bamalaika+ mu kuboko kwa ñambi.+ 20  Ñambi kechi ukebewa ne, umvwe pajitu muntu umo, bino Lesa ye umo. 21  Nanchi Mizhilo ilengulula milaye ya Lesa nyi? Ine! Mambo umvwe muzhilo wapainwe kuba’mba kwikale bumi, ko kuba’mba bololoke umvwe bwaishijile mu mizhilo. 22  Bino Kinembelo kyashinkijile bintu byonse mu bundengamambo, kuba’mba mulaye waimena pa kwitabila mwi Yesu Kilishitu apanwe ku baitabila. 23  Nangwa byonkabyo, lwitabilo saka lukyangye kufika, twalaminwenga na mizhilo, ne kushinkilwa saka tupembelela lwitabilo lwafwainwe kusololwa.+ 24  Onkao mambo, Mizhilo yaalukile ke ntangi* wa kwitutwala kwi Kilishitu+ kuba’mba tutelwe’mba baoloka na mambo a lwitabilo.+ 25  Pano lwitabilo byo lwafika,+ kechi tukiji na kalama ne.+ 26  Anweba bonse mwi baana ba Lesa+ mambo mwaitabila mwi Kilishitu Yesu.+ 27  Mambo anweba bonse mwabatizhiwe mwi Kilishitu, mwavwala Kilishitu.+ 28  Kafwako Muyudea nangwa Mungiliki,+ muzha nangwa mwana bene ne,+ kabiji kafwako wa mulume nangwa wa mukazhi ne,+ mambo anweba bonse mwi umo mwi Kilishitu Yesu.+ 29  Kabiji umvwe mwi ba kwa Kilishitu, mwi baana* ba kwa Abalahama,+ banswanyi+ ba monka mwayila mulaye.+

Tubyambo twa munshi

Mu Kingiliki, “kufunjilako.”
Mu Kingiliki, “mwatendekele mu mupashi.”
Mu Kingiliki, “ku mpelo mwenda mu mubiji?”
Mu Kingiliki, “lukunwa.”
Mu Kingiliki, “nkunwa.”
Mu Kingiliki, “lukunwa.”
Mu Kingiliki, “lukunwa.”
Nangwa’mba “kalama.”
Mu Kingiliki, “lukunwa.”