Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Nahumi 3:1-19

BIJI MU BUKU

  • “Malwa anji muzhi wichila mashi!” (1-19)

    • Byalengejile kuzhachisha Ninevwa (1-7)

    • Ninevwa ukapona nobe No-amonyi (8-12)

    • Kupona kwa Ninevwa kechi kwa kuzhinauka ne (13-19)

3  Malwa anji muzhi wichila mashi! Wayulatu paa na bujimbijimbi ne bwivi. Kechi wikalatu kwa kubula nyama ya kuja ne!   Kuji kuvuma kwa bikote ne kyungwe kya bitanga bya makalaki,Ne bambili babena kunyema ne makalaki abena kululuma.   Benda pa bambili, mapoko abena kubekauka ne mafumo abena kubesha,Bantu bavula bo batapa ne milumba ya bafwa—Mibiji ya bafwa yavula bingi. Betuntula mu mibiji ya bafwa.   Kino kyamweka na mambo a byubilo byavula bya bupite bya kwa yewa pite,Yenka walamba kabiji uji na buya, nkambo wa manga,Yenka ongola bisaka bya bantu na bupite bwanji ne bisemi na manga anji.   Yehoba wa mabumba waamba’mba, “Umvwa! Nkalwa nobe,”*+“Nkakupimpula bifunga byobe ne kukuvwetabyo ku meso;Nkalengela bisaka bya bantu kukutambila,Ne bufumu bwavula kumona bumvu bobe.   Nkakukapika bya bunyaNe kukulengela kwikala wa bunya;Nkakulengela kwikala ke kintu kya kutamba.+   Yense ukakumona ukakunyema+ ne kwamba’mba,‘Ninevwa bamonauna! Bañanyi basakumubila lusa?’ Kwepi ko nsakutaana bakukutekenesha?   Nanchi wanema kukila No-amonyi*+ waikele kwipi na mifolo ya Nile nyi?+ Mema amuzhokolokele;Bunonshi bwanji bwajinga kalunga ka mema ne nsakwa yanji yajinga kalunga ka mema.   Etiopya ne Ijipita o ajinga masulo a ngovu yanji ikatampe. Puta+ ne bena Libya bo bajinga bankwasho bobe.+ 10  Pano bino, bamutwajile mu buzha;Wayile mu buzha.+ Baana banji nabo bebasansawijile pa mansanga onse a mikwakwa.* Batele bubale pa banabalume banji bashiñama,Kabiji banabalume banji bonse bakulumpe bebakashile mashimbi. 11  Ne obewa ukapendwa;+Ukaya na kufyama. Kabiji ukakeba kufyama ku mulwanyi. 12  Mapunzha obe onse aji na masakwa akosa, aji nobe bichi bya mukuyu biji na makuyu atanshi kupya;Inge bebisunkenya aponena mu tunwa twa bantu bakeba kwiaja. 13  Umvwa! Nzhita yo uji nayo ijitu nobe banabakazhi. Bibelo bya kyalo kyobe bikashalatu bya kyashi mwa kutwelela balwanyi bobe. Mujilo ukasoka mipingilo ya binzhilo byobe. 14  Tapulai mema a kwingijisha inge bemuzhokoloka!+ Koseshai mapunzha enu aji na masakwa akosa. Twelai mu mateshi ne kutobola mulobwe;Kwatai kikombola kya matafwali. 15  Nangwatu konkakwa mujilo ukakusoka. Mpoko ikakutapa.+ Ikakonauna byonkatu byuba nzhiye yana.+ Ivuzhe obe mwine byonka byavula nzhiye yana! Kine vula byonka byavula nzhiye! 16  Wavuzha basulu bobe kukila tubangabanga twa mwiulu. Nzhiye yana iubula kabiji itumbuka. 17  Bakasopa bobe baji nobe nzhiye,Kabiji bantangi bobe baji nobe nzhiye yavula. Ifyama mu mabwe a ku bipaka pa juba ja mashika,Bino inge kwasama mute itumbuka;Kabiji kafwako uyuka ko iya ne. 18  Bakafunga bobe babena kukunuka, obewa mfumu wa Asilya;Babineme bobe baikala mu mapunzha abo. Bantu bobe bapalañena pa mitumba,Kabiji kafwako nangwa umo ubena kwibakonkanya pamo ne.+ 19  Kafwako wa kukukwasha ku bya malwa byobe ne. Kilonda kyobe kechi kyakonsha kubukwa ne. Aba bonse bakomvwa sawakya pa mambo a obewa bakapopwela mu maboko;+Mambo ñanyi ye wabula kumanyikapo kala na mambo a kukanama kobe?”+

Tubyambo twa munshi

Ko kuba’mba, Ninevwa.
Ko kuba’mba, Tebesa.
Mu Kihebelu, “kwapela mikwakwa yonse.”