Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Musapwishi 8:1-17

BIJI MU BUKU

  • Kutangijilwa na bantu bambulwa kulumbuluka (1-17)

    • Kukookela mikambizho ya mfumu (2-4)

    • Bukalama bwa muntu bwatama (9)

    • Inge babula kuchiba mambo bukiji (11)

    • Jai, tomai ne kusangalala (15)

8  Ñanyi waesakana pamo na muntu wa maana? Ñanyi wayuka bya kupwisha makatazho?* Maana a muntu apwisha bulanda bwanji ne kumulengela kusangalala.  Naambile namba: “Kookelai mikambizho ya mfumu+ na mambo a mulaye ye mwalayile Lesa.+  Kange mupelawizhe kufuma kwi mfumu ne.+ Kange mubenga byatama ne, mambo aye wakonsha kuba kintu kyonse kyo akeba,+  mambo mfumu uji na luusa pa bintu;+ ñanyi wakonsha kumwambila’mba, ‘Ki ka kyo mubena kuba?’ ”  Muntu ulama mikambizho kechi ukamona byakatazha ne,+ kabiji muntu wa maana ukayuka kimye kyafwainwa ne jishinda ja kubilamo bintu.*+  Bintu byonse biji na kimye kyabyo ne jishinda ja kwibyubilamo,*+ mambo makatazho a bantu avujisha.  Na mambo a kuba’mba kafwako muntu wayuka bikamweka kulutwe ne, pano ñanyi wakonsha kumubuula byo bikekala?  Byonkatu muntu byo abula luusa pa mupashi* wanji ne byo akonsha kubula kuzhikijila mupashi wanji, ko kuba’mba kafwako uji na luusa pa juba ja kufwa ne.+ Kabiji byonkatu mushilikale byo babula kumuswisha kunyema mu kimye kya nkondo, ne bubi kechi bukaswisha muntu wibuba kuleka kuba byatama ne.*  Namwene bino byonse kabiji nakebeshe bingi kuyuka bintu byonse byuba bantu pano pa ntanda, kimye bantu kyo balama bantu bakwabo na kwibayanjisha.*+ 10  Kabiji namwene saka bazhiika babi bonka batwelanga ne kulupuka mwazhila, pano bino, bebavulamineko mu muzhi mo baubilanga bintu byatama.+ Kino nakyo kyo kyatu. 11  Kubula kukambula bukiji muntu wauba byatama,+ kulengela bantu kuba bintu byatama.+ 12  Nangwa kya kuba ndengamambo wakonsha kulenga mambo pa bimye byavula ne kutwajijila kwikala na bumi, amiwa nayuka namba bantu bakamwa Lesa wa kine bakamona byawama mambo bamwakamwa.+ 13  Pakuba mubi kechi ukamona byawama+ nangwa kwikala myaka yavula ne, izhimañanatu nobe kimvule,+ mambo kechi wakamwa Lesa ne. 14  Kuji kintu kyatu* kibena kuba bantu pano pa ntanda: Kya kuba bantu baoloka bebalama nobe boba byatama,+ ne babi bebalama nobe boba bintu byaoloka.+ Naambile namba kino nakyo kyo kyatu. 15  Onkao mambo, namwene kusangalala+ namba kwawama, mambo kintu kyawamatu ku muntu pano pa ntanda ke kuja, kutoma ne kusangalala; abino bimulengela kusangalala na mambo a mingilo yo engila mu bwikalo bwanji,+ Lesa wa kine yo amupa pano pa ntanda. 16  Nakebeshe bingi kwikala na maana ne kumona bintu byonse byuba* bantu pano pa ntanda,+ nakankelwe kulaala tulo mute nangwa bufuku.* 17  Kepo namwene bintu byonse byauba Lesa wa kine, kabiji nayukile kuba’mba muntu kechi wakonsha kukwatakanya bintu byonse byubiwa pano pa ntanda ne.+ Nangwa kya kuba bantu bebikekotu byepi, kechi bakonsha kwibikwatakanya ne. Kabiji nangwa bebepekezha kwikala na maana a kuyuka bintu, kechi bakonsha kwibikwatakanya ne.+

Tubyambo twa munshi

Nangwa’mba “kwamba mambo?”
Nangwa’mba “bunchibamambo.”
Nangwa’mba “bunchibamambo.”
Nangwa’mba “muya; mwela.”
Nangwa, “bubi bwabo kechi bwakonsha kwibapulusha babi ne.”
Nangwa’mba “kwibakozha; kwibonauna.”
Nangwa’mba “kilefulañana.”
Nangwa’mba “mingilo ya.”
Nangwa, “bantu kechi bamonapo tulo mute nangwa bufuku ne.”