Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Musapwishi 2:1-26

BIJI MU BUKU

  • Bintu byakebeshenga Solomone bebipima (1-11)

  • Kupelelela kwa maana a muntu (12-16)

  • Kwingila na ngovu ko kwatutu (17-23)

  • Jai, tomai ne kusangalela mu mingilo yenu (24-26)

2  Naambile mu muchima wami namba: “Lekai ngeseke kuyuka bya kisangajimbwe* ne bintu byawama.” Pano bino, abino byonse byo byatu.   Naambile namba, “Kuseka bo bukonye!” Kabiji neshikishe namba, “Muntu ukamwenamo ka mu bya kisangajimbwe?”*  Nalangulukilepo bingi pa kwisangajika na binyu,+ aku saka nakakachila ku maana ami; kabiji nakosamine pa kukeba kuyuka bintu byawama byafwainwa kuba bantu mu bwikalo bwabo bwa kakimye kacheche pano pa ntanda.  Naingijile mingilo yavula bingi.+ Nashimikile mazubo;+ Najimine majimi a miñanzañanza.+  Najimine mashamba ne mpunzha mo najimbile bichi bipanga bipangwa byapusana pusana.  Napoyile bizhiba bya mema bya kutekezha bichi* byakomenenga.  Najinga na ba mingilo ba balume ne ba bakazhi,+ kabiji najinga na ba mingilo basemekejilwenga mu nzubo yami.* Kabiji najinga ne na banyama ba kulela, bañombe ne mikooko+ yavula kukila muntu yense wajingako mu Yelusalema.  Naikele na siliva ne ngolode yavula,+ bya bunonshi byafumine ku* bamfumu ne mu bibunji.+ Nekebejile banyimbi ba balume ne ba bakazhi, kuvwangakotu ne bintu byavula bisangajika bantu, ko kuba’mba mwanamukazhi nangwa banabakazhi* bavula.  Nayile bingi nkuwa kukila muntu yense wajingako mu Yelusalema+ amiwa saka nkyangye kwikalako. Kabiji natwajijile kwikala na maana. 10  Naikele na bintu byonse byo nakebelenga.*+ Kechi nakaine kuba bintu bisangajika muchima wami ne, nasangalele bingi pa mingilo yonse yakosa yo naingijilenga, kabiji naikele na bino bintu na mambo a kwingila na ngovu.+ 11  Pano bino, byo nalangulukilenga pa mingilo yonse yo naingijile ne pa ngovu yonse yo natayijilepo,+ namwene namba byonse byo byatu, napulwijilemotu mabuula;+ kafwako kintu nangwa kimo kyanema* pano pa ntanda ne.+ 12  Kepo nalangulukile pa maana, bukonye ne kukosama.+ (Nanchi muntu uswana pa bufumu, wakonsha kuba ñanyi kintu? Kanatu byonka byaubiwapo kala.) 13  Kabiji namwene namba kwikala na maana kwawama kukila kukosama,+ byonkatu kyeya byo kyawama kukila mfishi. 14  Muntu uji na maana umona bintu bulongo;*+ pakuba muntu wakosama wenda mu mfishi.+ Kabiji namona kuba’mba kuji kintu kimo kimwekela* bonse.+ 15  Naambile mu muchima wami namba: “Kintu kimwekela muntu wakosama kyo kikammwekela ne amiwa.”+ Pano ñanyi kintu kyo namwenejilemo pa kukizhamo kwikala na maana? Byonkabyo, naambile mu muchima wami namba: “Akino nakyo kyo kyatu.” 16  Mambo muntu wa maana nangwa wakosama kechi bakatwajijila kumuvuluka ne.+ Mu kuya kwa moba, muntu yense bakamulubako. Pano muntu wa maana ukafwa byepi? Ukafwa byonka bifwa wakosama.+ 17  Byonkabyo, nashikilwe kwikala na bumi,+ mambo bintu byonse byubiwa pano pa ntanda byandetejilenga bulanda, mambo bintu byonse byajinga byatu,+ kabiji napulwijilemotu mabuula.+ 18  Nashikilwe mingilo yonse yakosa yo naingijilenga pano pa ntanda,+ mambo nafwainwa kwiishila muntu ukalondela panyuma yami.+ 19  Kabiji ñanyi uyuka’mba ukekala na maana nangwa’mba ukakosama?+ Bino aye ukengijishanga bintu byonse byo natayijilepo ngovu ne maana pano pa ntanda. Abino nabyo byo byatu. 20  Onkao mambo, nakakijilwe bingi pa mingilo yonse yo naingijilenga na ngovu pano pa ntanda. 21  Mambo muntu wakonsha kwingila na ngovu, kuba bintu na maana, kuyuka bintu ne kwingila bulongo, pano bino, byonse bino wibishila muntu wabujile ne kwibingijilatu ne.+ Bino byonse byo byatu kabiji byatama* bingi. 22  Nanchi muntu umwenamo ka mu mingilo yanji yonse yakosa ne mu kintu kimulengela* kwingila na ngovu pano pa ntanda?+ 23  Mambo bintu byonse byo oba mu bwikalo bwanji bonse, bimuletelatu bulanda ne kulefulwa+ kabiji bimulengela kwikala na kilabila bufuku.+ Bino nabyo byo byatu. 24  Kintu kyawamatu ku muntu ke kuja, kutoma ne kumwena lusekelo* mu mingilo yo engila.+ Namona namba bino byonse bifuma kwi Lesa wa kine,+ 25  mambo ñanyi uja bulongo ne kutoma kukila amiwa?+ 26  Muntu utokesha Lesa ku muchima, Lesa umupa maana, kuyuka bintu ne kumulengela kusangalala,+ pakuba ndengamambo umupa mwingilo wa kukonkanya bintu pamo ne kwibipana ku muntu utokesha Lesa wa kine ku muchima.+ Bino nabyo byo byatu, upulwilamotu mabuula.

Tubyambo twa munshi

Nangwa’mba “kusekela.”
Nangwa’mba “kusekela.”
Nangwa’mba “jisaka.”
Mu Kihebelu, “baana ba balume ba mu nzubo.”
Nangwa’mba “bintu bya ku.”
Nangwa’mba “inetu, kine, bainetu.”
Mu Kihebelu, “bintu meso ami byo aipwizhe.”
Nangwa’mba “kintu kyawama.”
Nangwa’mba “uji na meso abena kulaba.”
Nangwa’mba “kiyatu kwa kubula kuketekela.”
Nangwa’mba “bya malwa.”
Mu Kihebelu, “ne kukabakana kwa muchima wanji.”
Nangwa’mba “kulengela mweo wanji kumona byawama.”