Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Mitonyi 21:1-25

BIJI MU BUKU

  • Mukoka wa bena Benjamina bamupokolola (1-25)

21  Banabalume bena Isalela bachipile luno luchipo ku Mizipa amba:+ “Kafwako nangwa umo mwi atweba wafwainwa kusongwesha mwananji wa mukazhi ku mwanamulume mwina Benjamina kwikala mukazhanji ne.”+  Kabiji bena Isalela baishile ku Betele+ ne kwikala konkakwa kwi Lesa wa kine kufika ne mabanga, saka bajila na mawi a peulu ne kuwowakana.  Kabiji baambilenga’mba: “Anweba Yehoba, Lesa wa Isalela, mambo ka kino kintu o kyamwekela mu Isalela? Mambo ka mukoka umo o akonsha kubujilamo mu Isalela lelo jino?”  Kabiji juba jalondejilepo bantu baimene lukelo ne kushimika kya kusokelapo bitapisho konkakwa ne kulambwilapo milambo ya kusoka ne milambo ya mutende.+  Kepo bena Isalela bashikishe’mba: “Pa mikoka yonse ya bena Isalela, wepi wabujile kwiya na kubuñana ku meso a Yehoba ku Mizipa?” mambo bachipile luchipo lukatampe lwa kuba’mba yense ukabula kwiya kwi Yehoba ku Mizipa, kine bafwainwa kumwipaya.  Kabiji bena Isalela baumvwine bulanda na mambo a kyamwekejile bena Benjamina balongo babo. Baambile’mba: “Lelo jino mukoka umo ufwamo mu Isalela.  Tusakuba byepi pa kukebela boba bashalapo bakazhi, byo twachipile mu jizhina ja Yehoba+ kubula kusongwesha baana betu ba bakazhi kwi abo?”+  Bashikishe’mba: “Pa mikoka ya bena Isalela, wepi wabujile kwiya kwi Yehoba ku Mizipa?”+ Kyatainwe kuba’mba ku Yabeshi-gileada kafwako nangwa umo wafumineko kwiya ku kampu kwajinga kipwilo ne.  Bantu byo bebabajile, bataaine kuba’mba kafwako nangwa umo pa bangikazhi ba mu Yabeshi-gileada wajingapo ne. 10  Onkao mambo, jibumba jatumine kokwa banabalume bakosa bingi 12,000. Bebakambizhe’mba: “Yainga mukatape na mpoko bangikazhi ba mu Yabeshi-gileada, kuvwangakotu ne banabakazhi ne baana.+ 11  Kino kyo kyo mwafwainwa kuba: Mwafwainwa kwipaya mwanamulume yense pamotu ne mwanamukazhi yense wakilaalapo kala na mwanamulume.” 12  Mu bangikazhi ba mu Yabeshi-gileada, bataainemo bakamwale 400, bisungu, babujile kulaalapo na mwanamulume. Onkao mambo, bebaletele ku kampu ku Shilo,+ uji mu kyalo kya Kenana. 13  Kepo jibumba jonse jatumine mawi ku bena Benjamina bajinga ku jibwe jikatampe ja Limonyi+ ne kwibatayila mbila ya mutende. 14  Onkao mambo, bena Benjamina babwelele pa kyokya kimye. Bebapele banabakazhi bo balamine na bumi bafumine mu banabakazhi ba ku Yabeshi-gileada,+ bino kechi bebakebejile banabakazhi bavula ba kwibapa ne. 15  Kabiji bantu baumvwine bulanda na mambo a kyamwekejile bena Benjamina,+ mambo Yehoba wibapaatwileko ku mikoka ya bena Isalela. 16  Bakulumpe ba jibumba baambile’mba: “Tusakuba byepi pa kukebela banabalume bashalapo bakazhi, banabakazhi bonse byo bebepayile mu bena Benjamina?” 17  Bakumbwile’mba: “Aba bapulukile mu bena Benjamina bafwainwa kwikala na buswanyi, pa kuba’mba mukoka akabule kuzhiya mu bena Isalela. 18  Pano bino, kechi betuswisha kusongwesha baana betu ba bakazhi kwi abo ne, mambo bena Isalela bachipile’mba: ‘Wafingwa yense ukasongwesha mwanamukazhi ku mwina Benjamina.’”+ 19  Kepo baambile’mba: “Umvwai! Kijiilo kya Yehoba kikalako pa mwaka pa mwaka mu Shilo,+ uji ku kabeta ka ku buyeke bwa Betele ne ku musela wa mukwakwa mukatampe wafuma ku Betele kuya ku Shekema ne ku kabeta ka ku bulenge bwa Lebona.” 20  Onkao mambo, bakambizhe banabalume bena Benjamina amba: “Yainga mukabelamine mu majimi a miñanzañanza. 21  Kabiji byo mukamona bansongwakazhi* ba ku Shilo balupuka na kuzha, anweba bonse pa muntu pa muntu mukafume mu majimi a miñanzañanza ne kwisajilapo bakazhi pa bansongwakazhi ba ku Shilo kabiji mukabwele mu kyalo kya Benjamina. 22  Kabiji bashabo ne balongo babo inge bakeye na kwijizhanya kwi atweba, tukebabuula amba, ‘Tubilai bibusa na mambo a abo, mambo twakankelwe kwibakebela bakazhi kupichila mu kulwa nkondo,+ ne anweba kechi mwakonsha kwibapa bakazhi kwa kubula kwikala na mambo ne.’”+ 23  Onkao mambo, banabalume bena Benjamina baubile kino, kabiji bonse pa muntu pa muntu basendele mukazhi kufuma mu banabakazhi bazhilenga. Byo bapwishishe, babwelele ku buswanyi bwabo ne kushimukulula mizhi+ yabo ne kwikala monka. 24  Pa kyokya kimye, bena Isalela bapalañene kufuma kokwa, muntu yense wabwelele ku mukoka wanji ne ku kisemi kyanji, kabiji bafumineko, muntu yense wabwelele ku buswanyi bwanji. 25  Mu oa moba kechi mwajinga mfumu mu Isalela ne.+ Muntu yense waubanga kyonka kyo amona amba kijitu bulongo.*

Tubyambo twa munshi

Mu Kihebelu, “baana ba bakazhi.”
Nangwa’mba “amba kyamutokela ku muchima.”