Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Mitonyi 2:1-23

BIJI MU BUKU

  • Lujimuno kufuma ku malaika wa Yehoba (1-5)

  • Lufu lwa kwa Yoshua (6-10)

  • Bamitonyi bebatongola kupokolola bena Isalela (11-23)

2  Kabiji malaika wa Yehoba+ wafumine ku Giligala+ ne kuya ku Bokimu ne kwamba’mba: “Nemufumishe mu Ijipita ne kwimutwala mu kyalo kyo nachipile ku bashakulu benu.+ Kabiji naambile namba, ‘Kechi nkalala lulayañano lwami lo nalayañene ne anweba ne.+  Kabiji anweba kechi mwafwainwa kulayañana lulayañano na bangikazhi ba mu kino kyalo ne,+ kabiji mwafwainwa kukundaula bya kusokelapo bitapisho byabo.’+ Bino kechi mwakookela jiwi jami ne.+ Mambo ka o mwaubila kino?  O ene mambo, o naambijile ne kuba’mba, ‘Kechi nkebapanga kwi anweba ne,+ ne abo bakekala ke kitewa kwi anweba,+ ne balesa babo bakemongola.’”+  Malaika wa Yehoba byo aambile bino byambo ku bena Isalela bonse, bantu batendekele kujila mabingo.  Onkao mambo, batumbile yoya mpunzha amba Bokimu,* kabiji konkakwa batapishe kitapisho kwi Yehoba.  Yoshua byo aambijile bantu kuya, mwina Isalela yense wayile au kwanji, au kwanji, ne kwikala mu kyalo kyo batambwile.+  Bantu batwajijile kwingijila Yehoba mu moba onse a kwa Yoshua, ne mu moba onse a bakulumpe bashajilepo Yoshua saka afwa kala, bonka bamwene mingilo yonse ikatampe Yehoba yo aubijile bena Isalela.+  Kabiji Yoshua mwana wa kwa Nuni, kalume wa Yehoba, wafwile saka aji na myaka 110.+  Onkao mambo, bamuzhiikile mu nyaunda ya buswanyi bwanji mu Timinata-heleshi,+ mu kibunji kya mitumba kya Efelaimu ku kabeta ka ku buyeke bwa Mutumba wa Gaasha.+ 10  Akya kisemi kyonse kyayile na kulaala kwalaala* bashakulu bakyo, kabiji kwaishile kisemi kikwabo kyabujile kuyuka Yehoba nangwa bintu byo aubijile bena Isalela. 11  Onkao mambo, bena Isalela baubile byatama ku meso a Yehoba kabiji baingijilenga* Baela.+ 12  Byonkabyo, bashile Yehoba, Lesa wa bashabo, yenka wibafumishe mu kyalo kya Ijipita.+ Kabiji balondejilenga balesa bangi, balesa ba mitundu ya bantu ibazhokolokele+ ne kwibafukamina ne kuzhingijisha Yehoba.+ 13  Bashile Yehoba ne kwingijila Baela ne bipashañano bya Ashatoleta.+ 14  Kepo bukaji bwa Yehoba bwabuukijile bena Isalela, onkao mambo, wibapaine ku balwanyi bebapukwilenga bintu.+ Wibapoteshe mu maboko a balwanyi bebazhokolokele,+ kabiji kechi bajinga na bulume bwa kulwa na balwanyi babo ne.+ 15  Konse konse ko bayilenga, Yehoba wibalukijilemo, ne bya malwa bibafikijilenga,+ byonkatu Yehoba byo aambile ne byonkatu Yehoba byo achipile kwi abo,+ kabiji bamanamine bingi.+ 16  Onkao mambo, Yehoba wibapelenga bamitonyi ba kwibapokolola mu maboko a boba bebapukwilenga bintu.+ 17  Bino nangwatu bamitonyi, kechi bebomvwinanga ne, kabiji baubilenga bupite na balesa bangi ne kwibafukamina. Bafuminemo bukiji mu jishinda jaendelengamo bashakulu babo, bakookelanga mikambizho ya Yehoba.+ Abo bakankelwe kuba bino. 18  Inge Yehoba wibasajila bamitonyi,+ Yehoba waikalanga na mutonyi yense ne kwibapokolola mu maboko a balwanyi babo mu moba onse a yewo mutonyi; mambo Yehoba wibomvwinanga lusa*+ na mambo a kubinza kwabo kwibaletelanga boba bebamanyikilenga+ ne boba bebayanjishenga. 19  Bino inge mutonyi wafwa, bakizhangamo kuba byubilo byatama kukila bashabo, kupichila mu kulondela balesa bangi, kwibengijila ne kwibafukamina.+ Kechi balekele bintu byo baubanga ne bwitote bwabo ne. 20  Kepo bukaji bwa Yehoba bwabuukijle bena Isalela,+ kabiji waambile’mba: “Na mambo a kuba kino kisaka kyalala lulayañano+ lo nakambizhe bashakulu bakyo kabiji kechi kyankookela + ne, 21  amiwa kechi nkapanga kwi anweba kisaka nangwatu kimo Yoshua kyo ashile kimye kyo afwile ne.+ 22  Nkooba bino kuba’mba nkeseke kana bena Isalela bakatwajijila kwenda mu jishinda ja Yehoba+ byonkatu byaubile bashakulu babo nangwa ne.” 23  Onkao mambo, Yehoba waswishishe bino bisaka kushalamo. Kechi wibipangilemo bukiji ne, kabiji kechi wibipaine mu kuboko kwa kwa Yoshua ne.

Tubyambo twa munshi

Kulumbulula’mba “Bajila.”
Ino ke ñambilo ya kifwanyikizho ilumbulula lufu.
Nangwa’mba “bapopwejilenga.”
Nangwa’mba “wilangulushanga.”