Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Luta 1:1-22

BIJI MU BUKU

  • Kisemi kya kwa Elimeleka kyavilukila ku Moabu (1, 2)

  • Naomi, Olipa, ne Luta bafwisha balume (3-6)

  • Luta waikala wa kishinka kwi Naomi ne kwi Lesa wa kwa Naomi (7-17)

  • Naomi wabwela ku Betelema ne Luta (18-22)

1  Mu oa moba bamitonyi+ byo batangijilenga,* mu kyalo mwaishile kipowe kya nzala; kabiji mwanamulume umo wafumine ku Betelema+ mu Yuda ne kuya na kwikala bwenyi mu mpunzha ya mu Moabu,+ pamo na mukazhanji ne baana banji ba balume babiji.  Uno mwanamulume wajinga Elimeleka,* kabiji mukazhanji wajinga Naomi* ne baana banji ba balume babiji bajinga Malona* ne Kilionyi.* Bajinga bena Efulata ba ku Betelema mu Yuda. Kabiji bafikile mu mpunzha ya mu Moabu ne kwikala monka.  Byo papichile moba, Elimeleka mwatawanji Naomi wafwile, kabiji Naomi washajiletu na baana banji ba balume babiji.  Mu kuya kwa moba, bano banabalume basongwele banabakazhi bena Moabu; umo jizhina janji wajinga Olipa ne mukwabo wajinga Luta.+ Baikele konkakwa myaka nobe jikumi.  Kabiji bano baana ba balume babiji ba Malona ne Kilionyi nabo bafwile, kabiji uno mwanamukazhi washajiletu kwa kubula mulume ne baana banji babiji.  Onkao mambo, aye ne balokazhi banji babiji baimene kufuma mu mpunzha ya mu Moabu, mambo waumvwine saka aji mu Moabu amba, Yehoba wata bingi muchima bantu banji kabiji wibapa kajo.*  Wafumineko ku mpunzha ko aikalanga pamo na balokazhi banji babiji. Byo bayilenga mu jishinda kubwela ku kyalo kya Yuda,  Naomi waambijile balokazhi banji babiji amba: “Bwelai ku mazubo a bainenu. Yehoba emumweshe butemwe bubula kwaluka,+ byonkatu byo mwibumwesheshe ku bamwatawenu ba mulobe ne kwi amiwa.  Yehoba emulengele* kwikala mu mutende* mu mazubo a bamwatawenu.”+ Kepo ebafyompele, kabiji bajijile bingi. 10  Abo bakoselepotu kumwambila’mba: “Ine, tusakuya nenu ku balongo benu.” 11  Bino Naomi wibambijile’mba: “Bwelai baana bami. Mambo ka o musakuyila pamo ne amiwa? Nanchi nakonsha kusema baana bakonsha kwikala bamwatawenu nyi?+ 12  Bwelai baana bami. Yainga, mambo amiwa nakota kechi nakonsha kusongolwa ne. Nangwa inge kya kuba bufuku buno nsongolwe ne kusema baana ba balume, 13  nanchi mwakonsha kwibapembelela posotu bakakome nyi? Abya mwakonsha kwikalatu kwa kubula kusongolwa jibiji na mambo a abo nyi? Ine, baana bami, kintu kimumwekela kyankola bingi ku muchima, mambo kuboko kwa Yehoba kwangalukilamo.”+ 14  Kabiji bajijile bingi. Byo bekilekele kujila, Olipa wafyompele bako banji, kabiji wabwelelemo. Bino Luta wakakachijile bako banji. 15  Onkao mambo, Naomi wamwambijile’mba: “Tala! Mufi nobe wabwela ku balongo banji ne ku balesa banji. Yanga pamo na mufi nobe.” 16  Bino Luta waambile’mba: “Kange munsashijile’mba nemushe ne kuleka kwimulondela ne; mambo ko mukaya ne amiwa ko ko nkaya, kabiji ko mukalaala, ne amiwa ko ko nkalaala. Balongo benu bakekala balongo bami, ne Lesa wenu ukekala Lesa wami.+ 17  Ko mukafwila, ne amiwa ko ko nkafwila, kabiji ko ko bakanzhiika. Yehoba akankambule, inge kya kuba lufu kechi luketwabanya ne.” 18  Naomi byo amwene’mba Luta wakosakotu amba aye nanji, walekele kumukanya. 19  Kabiji bonse babiji batwajijile lwendo lwabo posotu ne byo bafikile ku Betelema.+ Aku bafikatu mu Betelema, bantu bonse mu muzhi baubile kyungwe kya lusekelo na mambo a abo, kabiji banabakazhi bashikishenga’mba: “Nanchi uno ye Naomi nyi?” 20  Aye waambijile bano banabakazhi amba: “Kange muntelenga’mba Naomi* ne. Muntelenga’mba Mala,* mambo wa Bulume Bonse walengela bwikalo bwami kutama bingi.+ 21  Byo nafumine kuno najinga na bintu byavula, bino Yehoba wandengela kubwela mabokotu. Mambo ka o mubena kuntelela’mba Naomi, Yehoba byo andengulula, kabiji wa Bulume Bonse byo andengela kumona bya malwa?”+ 22  Abino Naomi byo byo abwelele kufuma mu Moabu+ pamo na mulokazhi wanji mwina Moabu, aye Luta. Bafikile mu Betelema mu kimye kya kutendekelamo kunowa mbaale.+

Tubyambo twa munshi

Nangwa’mba “balaminenga.”
Kulumbulula’mba “Lesa Wami ye Mfumu.”
Kulumbulula’mba “Buwame Bwami.”
Kampe jafuma ku kyambo kya Kihebelu kilumbulula’mba “kukooka; kukolwa.”
Kulumbulula’mba “Muntu Ubena Kupona; Muntu Ubena Kufwa.”
Mu Kihebelu, “bashinkwa.”
Nangwa’mba “emupe bupe.”
Mu Kihebelu, “ku mpunzha kwa kukokolokela.”
Kulumbulula’mba “Buwame Bwami.”
Kulumbulula’mba “Kulula.”