Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Loma 7:1-25

BIJI MU BUKU

  • Mwatala kukasuluka ku Mizhilo (1-6)

  • Mizhilo isolola bundengamambo (7-12)

  • Nkondo ya bundengamambo (13-25)

7  Nanchi anweba balongo kechi mwayuka’mba, (mbena kwamba ku boba bayuka mizhilo) Mizhilo iji na luusa pa muntu byo akiji mumi nenyi?  Mwanamukazhi wasongolwa wakaswa na muzhilo kimye mwatawanji kyo akiji mumi; bino umvwe mwatawanji wafwa, wakasululwa ku muzhilo wa mwatawanji.+  Byonkabyo, umvwe wasongolwa ku mwanamulume mukwabo, mwatawanji saka akiji mumi, bakamutela’mba nkende.+ Pano bino, umvwe mwatawanji wafwa, wakasuluka ku muzhilo wanji, onkao mambo, umvwe wasongolwa ku mwanamulume mukwabo kechi ukatelwa’mba nkende ne.+  Onkao mambo, anweba balongo bami, mwafwile ku Mizhilo kupichila mu mubiji wa Kilishitu, kuba’mba mwikale bantu ba muntu mukwabo,+ ye basangwile mu bafu,+ pa kuba’mba tupangenga bipangwa kwi Lesa.+  Mambo byo twakijinga mu buntunshi, bya kusakasaka byetu bya bundengamambo bebisolwele ku Mizhilo kabiji byaingijilenga mu mibiji* yetu kuba’mba bipangenga bipangwa bileta lufu.+  Pano twakasululwa ku Mizhilo,+ mambo twafwile ku kyokya kitulaminenga, pa kuba’mba twikale bazha mu bwikalo bwa katataka mu mupashi+ kechi mu bwikalo bwa kala mu mizhilo yanembwa ne.+  Pano tusakwamba’mba ka? Nanchi Mizhilo bo bundengamambo nyi? Ine! Kine Mizhilo umvwe kechi yajingako ne,+ inge kechi nayuka bundengamambo ne. Inge Mizhilo kechi yaambile’mba: “Kechi wafwainwa kukumbwa ne,”+ inge kechi nayukile’mba lunkumbwa lwatama ne.  Bino na mambo a mukambizho, bundengamambo bwataaine jishinda ja kuletelamo lunkumbwa mwi amiwa lwa misango yonse, mambo kwa kubula mizhilo bundengamambo bwafwile.+  Najinga mumi byo pabujile mizhilo. Bino mukambizho byo aishile, bundengamambo bwasangukile jibiji, bino amiwa nafwile.+ 10  Mukambizho wafwainwe kutangijila ku bumi,+ nataaine’mba utwala ku lufu. 11  Na mambo a mukambizho, bundengamambo bwataaine jishinda ja kunjimbaikilamo ne kungipaya. 12  Onkao mambo, Mizhilo yazhila ne mukambizho naye wazhila kabiji waoloka ne kuwama.+ 13  Nanchi akya kyawama kyandetejile lufu nyi? Ine! Bino ke bundengamambo, pa kuba’mba bundengamambo bumweke’mba bo bwangipaya kupichila mu kintu kyawama,+ kuba’mba kupichila mu mukambizho bundengamambo buyukanyikwe’mba bwatama bingi.+ 14  Mambo twayuka’mba Mizhilo yafuma kwi Lesa; bino amiwa nemuntunshi ye bapotesha ku bundengamambo.+ 15  Mambo kyo nguba kechi nekiyuka ne. Mambo akya kyo nkeba kuba kechi nekyuba ne, bino akya kyo nashikwa kyo kyo nguba. 16  Nangwa byonkabyo, umvwe nguba kintu kyo mbula kukeba, naswa kuba’mba Mizhilo yawama. 17  Bino kechi yami mbena kwikyuba ne, bundengamambo buji mwi amiwa bo bubena kwikyuba.+ 18  Mambo nayuka namba mwi amiwa, ko kuba’mba mu mubiji wami kafwamo kintu kyawama ne; muchima wa kukeba kuba kyawama nji nanji, pakuba bulume bwa kwikyuba mfwabo.+ 19  Mambo kyawama kyo nkeba kuba kechi nekyuba ne, bino kyatama kyo mbula kukeba kuba, kyo kyo nguba. 20  Umvwe kya kuba nguba kintu kyo mbula kukeba kuba, ko kuba’mba kechi yami nekyuba ne, bino ke bundengamambo buji mwi amiwa. 21  Namona uno muzhilo wa kuba’mba: Byo nkeba kuba kyaoloka, kyatama kyo kinkosela.+ 22  Mu muchima wami nsekela bingi mu mizhilo ya Lesa,+ 23  bino namona mu mubiji* wami muji muzhilo mukwabo ubena kulwa na muzhilo wa mu muchima wami+ ne kuntwala mu buzha ku muzhilo wa bundengamambo+ uji mu mubiji* wami. 24  Amiwa kamulanda! Ñanyi ukampokolola ku uno mubiji ubena kuya ku lufu? 25  Sanchila Lesa kupichila mwi Yesu Kilishitu Nkambo yetu! Onkao mambo, na muchima wami amiwa nemuzha ku mizhilo ya Lesa, bino ku mubiji, nemuzha ku muzhilo wa bundengamambo.+

Tubyambo twa munshi

Mu Kingiliki, “binungwa.”
Mu Kingiliki, “binungwa.”
Mu Kingiliki, “binungwa.”