Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Loma 1:1-32

BIJI MU BUKU

  • Mitende (1-7)

  • Paulo wakebesha kuya ku Loma (8-15)

  • Waoloka ukekala na bumi na mambo a lwitabilo (16, 17)

  • Bantu babula kwakamwa Lesa kuba’mba babule kwikangaizha (18-32)

    • Byubilo bya Lesa bimwekela mu bintu byo alenga (20)

1  Amiwa Paulo kalume wa kwa Kilishitu Yesu waichilwe kwikala mutumwa ne kutongolwa’mba nsapwile mambo awama a Lesa,+ yami nemunembela.  Ano mambo awama, Lesa wialayile kala mu Binembelo byazhila kupichila mu bangauzhi banji.  Kabiji aamba pa Mwananji wafumine mu baana* ba kwa Davida.+  Bino na bulume bwa mupashi, watongwelwe’mba Mwana Lesa+ byo amusangwile mu bafu.+ Uno Mwana ye Yesu Kilishitu Nkambo yetu.  Mwi aye mo mo twatambwijile lusa lukatampe ne butumwa+ kuba’mba ba mu bisaka bya bantu+ bamukookele ne kwikala na lwitabilo na mambo a jizhina janji,  mu bisaka bya bantu ne anweba mo mo muji kabiji Lesa wimwita kuba’mba mwikale ba kwa Yesu Kilishitu—  kwi anweba bonse baji mu Loma Lesa bo atemwa, batelwa’mba bazhijikwa: Lusa lukatampe ne mutende bifuma kwi Lesa Tata wetu ne kwi Nkambo Yesu Kilishitu bikale pe anweba.  Patanshi, namusanchila Lesa wami kupichila mwi Yesu Kilishitu na mambo a anweba, mambo lwitabilo lwenu babena kwilwambapo mwaya ntanda yonse.  Mambo Lesa ye ñingijila mwingilo wazhila na muchima wami yense na mambo awama aamba pa Mwananji, ye kamonyi wami wayuka’mba kimye kyonse nemutela mu milombelo yami kwa kubula kuleka,+ 10  saka nsashijila Lesa namba umvwe kyo kyaswa muchima wanji, nkeye kwi anweba. 11  Mambo nkebesha bingi kwimumona, namba nkemupe bya bupe bya mupashi pa kuba’mba mukakose; 12  nangwa’mba tukekoseshe atwe bene na bene+ mu lwitabilo lwetu, ko kuba’mba lwitabilo lwenu ne lwami. 13  Balongo bami, mbena kukeba namba muyuke’mba nakebeshe bingi bimye byavula kwiya kwi anweba—bino bankanya kufikatu ne luno—pa kuba’mba ne mwi anweba nkataanemo bipangwa byonkatu byo kiji mu bisaka bya bantu. 14  Amiwa nji na nkongole ku Bangiliki ne ku bantutu,* ku ba maana ne babula maana; 15  onkao mambo, nakebesha bingi kusapwila mambo awama ne kwi anweba muji mu Loma.+ 16  Mambo amiwa kechi neobila bumvu mambo awama ne;+ kabiji mambo awama bo bulume bwa Lesa buleta lupulukilo ku yense waitabila,+ patanshi ku Muyudea+ kepo ne ku Mungiliki.+ 17  Lesa usolola bololoke bwanji kupichila mu mambo awama kabiji aba baji na lwitabilo bamona kino,+ kabiji kikosesha lwitabilo lwabo, monka mo kyanembelwa’mba: “Mololoke ukekala na bumi na mambo a lwitabilo.”+ 18  Lesa mwiulu ubena kumwesha bukaji bwanji+ ku bantu babula kumukookela kabiji babula koloka bonka boba bintu byatama kuba’mba bakanye bantu kuyuka bukine,+ 19  mambo kintu kyo bayuka pe Lesa kyamweka mo baji, mambo Lesa wibasolwelakyo.+ 20  Byubilo byanji bibula kumweka byamweka patoka kufumatu kimye kyo alengele ntanda, mambo bimwekela mu bintu byo alenga,+ ko kuba’mba bulume bwanji bwa myaka+ ne kuba’mba ye Lesa,+ pa kuba’mba babule kwikangaizha. 21  Mambo nangwa kya kuba Lesa bamuyukile, kechi bamutumbijikile’mba ye Lesa nangwa kumusanchila ne, bino abo baalukile ke batu mu milanguluko, ne michima yabo yabula maana yafichiletu bwii.+ 22  Nangwa kya kuba balangulukilenga’mba baji na maana, baalukile ke bakosama 23  kabiji bapimpwile lukumo lwa Lesa ubula kubola kutumbijikilamo kipashañano kya muntu ubola, bañonyi, banyama ne bikalaba panshi.+ 24  Onkao mambo, Lesa wibashile ne kwibaleka na kuba bubipisho monka mwayila lwiso lwa michima yabo, kuba’mba mibiji yabo ilengululwe mukachi kabo. 25  Bapimpwile bukine bwa Lesa na bubela saka banemeka* ne kwingijila bilengwa mu kifulo kya kwingijila Mulenga, aye utotwa myaka yonse. Amena. 26  O ene mambo, Lesa o ebalekejile kwikala na milanguluko yatama ibindankanya muchima,+ mambo banabakazhi babo balekele kubila mwayila kisemwa kya bantu;+ 27  byonkabyo, banabalume nabo balekele kwilaala na banabakazhi ne kukebesha kwilaala mulwabo, banabalume na banabalume,+ saka boba bintu bya bunya ne kutambula mfweto ya luzhachisho, yafwainwa bubi bwabo.+ 28  Byonkatu byo babujile kukeba kuyuka Lesa, Lesa wibalekele na milanguluko yabo yatama kuba’mba bobenga bintu byabula kufwainwa.+ 29  Kabiji baubilenga bintu byonse byabula koloka,+ bubi, lunkumbwa,+ ne bintu byatama, kichima,+ bumbanzhi,+ lutobo, bujimbijimbi,+ ne bulwanyi,+ kwikala ba miyebe, 30  ba lubabo,+ bashikwa Lesa, bashinta, betota, belundumika, balanguluka kuba byatama, babula kukookela bansemi,+ 31  babula maana,+ babula kufikizha byo balaya, babula kutemwa bantu bakwabo, kabiji babula lusa. 32  Nangwa kya kuba bano bantu bayuka bulongo mizhilo yaoloka ya Lesa—kuba’mba bonse boba bino bintu bafwainwa kufwa+—abo kechi bebyubatu ne, bino betabizha ne boba bebyuba.

Tubyambo twa munshi

Mu Kingiliki, “lukunwa.”
Nangwa’mba “babula Bangiliki.”
Nangwa’mba “kupopwela.”