Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Kubala 36:1-13

BIJI MU BUKU

  • Muzhilo waamba pa masongola a banabakazhi banswanyi (1-13)

36  Kabiji bakulumpe ba bisemi bya bena Gileada mwana wa kwa Makila,+ Makila mwana wa kwa Manase wa mu bisemi bya baana ba kwa Yosefwa, baishile na kwambila Mosesa ne bakulumpe, mitwe ya bisemi bya bena Isalela.  Baambile’mba: “Yehoba wimukambizhe anweba nkambo yetu kwabanya kyalo kupichila mu kuta bubale+ kuba’mba kyalo kikale buswanyi bwa bena Isalela; kabiji anweba nkambo yetu bemukambizhe kwi Yehoba kupana kya buswanyi kya kwa Zelofehada mulongo wetu ku baana banji ba bakazhi.+  Pakuba umvwe bakasongolwe ku banabalume ba mu mukoka mukwabo wa bena Isalela, ko kuba’mba buswanyi bwa bano banabakazhi bakebwangata kufuma ku buswanyi bwa bashetu ne kwibununga ku buswanyi bwa mukoka ye bakasongolwako. Bakebwangata kufuma ku buswanyi bwetu bo betupele kupichila mu kuta bubale.  Bino umvwe mwaka wa Bwana bwa Bene*+ bwa bena Isalela akafike, buswanyi bwa bano banabakazhi bakebununga kikupu ku buswanyi bwa mukoka ye bakasongolwako, kabiji buswanyi bwabo bakebwangata kufuma ku buswanyi bwa mukoka wa bashetu.”  Kepo Mosesa akambizhe bena Isalela monka mwamukambizhizhe Yehoba amba: “Ba mu mukoka wa baana ba kwa Yosefwa baambatu bulongo.  Abino byo byakambizha Yehoba pa mambo a baana ba bakazhi ba kwa Zelofehada amba: ‘Bakonsha kusongolwa ku yense ye babena kukeba. Pano bino, bafwainwa kusongolwatu ku muntu wa mu kisemi kya mu mukoka wa bashabo.  Kafwako kya buswanyi kya bena Isalela kyafwainwa kutuntululwa kufuma ku mukoka umo kuya ku mukoka mukwabo ne, mambo bena Isalela bafwainwa kulama kya buswanyi kya mukoka wa bashakulu babo.  Kabiji mwana wa mukazhi yense uji na kya buswanyi mu mikoka ya bena Isalela, wafwainwa kusongolwatu ku wa mu kisemi kya mu mukoka wa bashanji,+ pa kuba’mba bena Isalela bakalame kya buswanyi kya bashakulu babo.  Kafwako kya buswanyi kyafwainwa kutuntululwa kufuma ku mukoka umo kuya ku mukoka mukwabo ne, mambo mikoka ya bena Isalela yafwainwa kulama kya buswanyi kyabo.’” 10  Baana ba bakazhi ba kwa Zelofehada baubile byonkatu Yehoba byo amukambizhe Mosesa.+ 11  Onkao mambo, baana ba bakazhi ba kwa Zelofehada+ abo ba Mala, Tiliza, Hogala, Milika ne Nowa, basongwelwe ku baana ba balongo ba bashabo. 12  Basongwelwe ku banabalume ba mu bisemi bya kwa Manase mwana wa kwa Yosefwa, kuba’mba bya buswanyi byabo bikatwajijile kwikala mu mukoka wa mu kisemi kya bashabo. 13  Ino yo mikambizho ne mizhilo Yehoba yo apele bena Isalela kupichila mwi Mosesa monka mu biselebwa bya Moabu byajinga ku Yodano kwipi na Yeliko.+

Tubyambo twa munshi

Nangwa’mba “mwaka wa Yubili.” Monai Mutanchi.