Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Kubala 32:1-42

BIJI MU BUKU

  • Mande a ku musela wa Yodano (1-42)

32  Bena Lubenyi+ ne bena Gadi+ bajinga na bilelwa byavula bingi kabiji bamwene’mba mapunzha a mu Yazela+ ne mu Gileada, ajinga mapunzha awama a kulaminamo banyama.  Onkao mambo, bena Lubenyi ne bena Gadi baishile kwi Mosesa, kwi Eleaza ñanga ne ku bakulumpe ba jibumba kabiji baambile’mba:  “Atalota, Dibona, Yazela, Nimila, Heshibonyi,+ Eleale, Sebama, Nebo+ ne Beyona,+  mapunzha Yehoba o ashinjile bena Isalela+ saka batalako, ke mapunzha awama a kulaminamo bilelwa kabiji atweba bakalume benu tuji na bilelwa byavula bingi.”+  Batwajijile kwamba’mba: “Umvwe kino kimutokela ku muchima, tupai ano mapunzha atweba bakalume benu ekale ke etu. Kange mwitutwale ku bushiya bwa Yodano ne.”  Kepo Mosesa aambijile bena Gadi ne bena Lubenyi amba: “Nanchi balongo benu basakuya ku nkondo ne anweba saka mwashala monka muno nyi?  Mambo ka o mubena kulefwila bena Isalela kuba’mba babule kwabukila mu kyalo Yehoba kyo akebapa?  Abino byo byaubile bashenu kimye kyo nebatumine kufuma ku Kadeshi-balaneya kuya na kumona kyalo.+  Byo bafikile ku Kimpachiko* kya Eshikola+ ne kumona kyalo, balefwile bena Isalela kuba’mba babule kuya mu kyalo Yehoba kyo ebalayile kwibapa.+ 10  Yehoba wibazhingijile pa joja juba ne kuchipa amba:+ 11  ‘Bantu bafumine mu Ijipita kutatwila pa baji na myaka 20 kuya peulu kechi bakatwelamo mu kyalo+ kyo nachipile kwi Abalahama, Izaka ne Yakoba ne,+ mambo kechi bandondela na muchima wabo yense ne, 12  kanatu Kaleba+ mwana wa kwa Yefune mwina Kenizi ne Yoshua+ mwana wa kwa Nuni, mambo abo balondela Yehoba na muchima yense.’+ 13  Onkao mambo, Yehoba wazhingijile bena Isalela ne kwibalengela kupitañana mu kiselebwa myaka 40+ posotu kisemi kyonse kyaubilenga byatama kwi Yehoba byo kyavijile.+ 14  Anweba bandengamambo, mubena kubatu byonka byaubanga bashenu balengejile Yehoba kuzhingijila bena Isalela. 15  Umvwe muleke kumulondela, ne aye ukebalekela mu kiselebwa jibiji, kabiji mukepayisha bano bantu bonse.” 16  Kabiji baishile kwi aye pa kimye kikwabo ne kwamba’mba: “Tuswishai tushimike bipaka bya mabwe bya banyama betu ne mizhi ya baana betu. 17  Bino atweba tukenengezha kulwa nkondo+ ne kutangilako kulutwe ya bena Isalela kufikatu ne byo tukebafikizha ku mpunzha yabo, pakuba baana betu bakashala monka mu mizhi yetu ya masakwa, saka bazhikijilwa kwa kubula kwibakatazha ku bangikazhi ba mu kyalo. 18  Kechi tukabwela kwetu ne, posotu mwina Isalela yense akatambule mpunzha kwikala ke kya buswanyi bwanji.+ 19  Mambo kechi tukatambula kya buswanyi pamo ne abo ku bushiya bwa Yodano nangwa kukila Yodano ne, mambo twatambula kala kya buswanyi kyetu ku musela wa Yodano.”+ 20  Mosesa wibambijile’mba: “Umvwe mukobe kino: Mukashikule bilwilo ne kuya ku nkondo ku meso a Yehoba;+ 21  kabiji umvwe anweba bonse mukasende bilwilo ne kwabuka Yodano konka ku meso a Yehoba, byo abena kupanga balwanyi banji ku meso anji+ 22  poso kyalo byo bakekishinda ku meso a Yehoba,+ bino bintu inge bikapwe po po mukabwela+ kabiji kechi mukekala na mambo kwi Yehoba ne ku bena Isalela ne. Kepo ino mpunzha ikekala ke yenu ku meso a Yehoba.+ 23  Pakuba umvwe mukabule kuba bino, mukamulenga mambo Yehoba. Kabiji yukai’mba bakemutwika bubi bwenu. 24  Onkao mambo, mwakonsha kushimika mizhi ya baana benu ne bipaka bya banyama benu,+ bino mwafwainwa kufikizha kyo mwalaya.” 25  Bena Gadi ne bena Lubenyi bamwambijile Mosesa amba: “Atweba bakalume benu tukoba byonkatu bitukambizha nkambo yetu. 26  Baana betu, bakazhi betu ne bilelwa byetu ne banyama betu bonse ba kulela bakashala muno mu mizhi ya Gileada,+ 27  bino atweba bakalume benu tukabuka bushiya, muntu yense saka asenda kilwilo kya nkondo ku meso a Yehoba,+ byonkatu nkambo yetu byo aamba.” 28  Onkao mambo, Mosesa wapaine mukambizho pa mambo a abo kwi Eleaza ñanga, kwi Yoshua mwana wa kwa Nuni ne ku bakulumpe ba pa bikota bya mikoka ya bena Isalela. 29  Mosesa wibambijile’mba: “Umvwe bena Gadi ne bena Lubenyi bakabuke Yodano pamo ne anweba, muntu yense saka asenda kilwilo kya nkondo ku meso a Yehoba kabiji mukashinde kyalo, mukebape mpunzha ya Gileada kwikala ke yabo.+ 30  Bino umvwe bakabule kusenda bilwilo bya nkondo ne kwabuka pamo ne anweba, ko kuba’mba bakekala ne anweba mu kyalo kya Kenana.” 31  Ponkapo bena Gadi ne bena Lubenyi baambile’mba: “Byonse byaamba Yehoba kwi atweba bakalume benu byo byo tukoba. 32  Tukasenda bilwilo ne kwabukila mu kyalo kya Kenana+ ku meso a Yehoba, bino mpunzha yetu ya buswanyi ikekela kuno konka ku bushiya bwa Yodano.” 33  Onkao mambo, Mosesa wapele bena Gadi, bena Lubenyi+ ne kichika kya mukoka wa kwa Manase+ mwana wa kwa Yosefwa bufumu bwa kwa Sihona+ mfumu wa bena Amoli, ne bufumu bwa kwa Oga+ mfumu wa Bashana ne mpunzha ya mizhi yajinga mu oa manyaunda ne mizhi yazhokolokele kino kyalo. 34  Kabiji bena Gadi bashimikile* Dibona,+ Atalota,+ Aloa,+  35  Atalota-shofwana, Yazela,+ Yongobeya,+ 36  Bete-nimila+ ne Bete-halama,+ mizhi yajinga na masakwa kabiji bashimikile ne bipaka bya banyama bya mabwe. 37  Kabiji bena Lubenyi bashimikile Heshibonyi,+ Eleale,+ Kiliataimu,+ 38  Nebo,+ Baela-meona+ ne Sibima; kabiji mazhina ayo beapimpwile kabiji ino mizhi yo bashimukulwile beitumbile mazhina angi. 39  Baana ba kwa Makila+ mwana wa kwa Manase bayile ku Gileada ne kushinda kabiji bapangilemo bena Amoli baikalangamo. 40  Onkao mambo, Mosesa wapaine Gileada kwi Makila mwana wa kwa Manase, ne abo baikelenga monka.+ 41  Kabiji Yaila mwana wa kwa Manase wayile kwi abo ne kwangata tumizhi twabo kabiji witutelele’mba Havota-yaila.*+ 42  Kabiji Noba wayile ne kwangata Kenata ne mande anji,* kabiji wiatumbile jizhina janji amba Noba.

Tubyambo twa munshi

Nangwa’mba “Kakola.”
Nangwa’mba “bashimukulwile.”
Kulumbulula’mba “Mizhi ya Matente a Yaila.”
Nangwa’mba “mande anji azhokolokako.”