Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Kubala 11:1-35

BIJI MU BUKU

  • Kunyinyita kwaleta mujilo kufuma kwi Lesa (1-3)

  • Bantu bakeba nyama (4-9)

  • Mosesa wamona’mba kechi wafikilamo ne (10-15)

  • Yehoba wapana mupashi ku bakulumpe 70 (16-25)

  • Elidada ne Medada; Yoshua waubijileko Mosesa kichima (26-30)

  • Batuma bitentu; bantu bebakambula na mambo a lwiso (31-35)

11  Bantu batendekele kwijizhanya bingi kwi Yehoba. Yehoba byo aumvwine kino, wazhingijile bingi, kabiji mujilo wafumine kwi Yehoba watendekele kwibasoka ne kwipayapo bamo bajinga pangye ya kampu.  Bantu byo batendekele kumujijila Mosesa, wibasashijileko kwi Yehoba+ ne mujilo wazhimine.  Onkao mambo, aya mpunzha beitumbile’mba Tabela,* mambo mujilo wafumine kwi Yehoba wibasokele.+  Jibumba* ja bantu bapusana pusana+ jo bajinga najo jatatwile kukebesha bingi kajo,+ ne bena Isalela nabo batendekele kujila ne kwamba’mba: “Ñanyi usakwitupa nyama ya kuja?+  Twavuluka masabi atutu o twajanga mu Ijipita, bibimbi, bainamunwa, kanyenze ne galiki!+  Pano bulume bwetu* bwapwa ne kupwa. Kafwako kajo kakwabo ne, kanatu manna onka.”+  Manna+ ajinga nobe ntetele itoka yakepa,+ kabiji amwekanga nobe ndeliuma.  Bantu bapitañananga na kwiawola ne kwiapela pa mabwe nangwa kwiatwa mu biina. Kabiji beatekanga mu mipika nangwa kwiosha kulenga bashinkwa banzhingwile+ kabiji aumvwanyikanga nobe shinkwa watobala ye bashingako manyi.  Inge kime kyapanga mu kampu kimye kya bufuku, manna nao aikalanga pa kime.+ 10  Mosesa waumvwine bantu byo bajijilenga bonse kisemi pa kisemi ne muntu pa muntu, saka baji konka ku bibelo bya matente abo. Kabiji Yehoba wazhingijile bingi,+ ne Mosesa naye kechi kyamutokeshe ku muchima ne. 11  Kepo Mosesa ashikishe Yehoba amba: “Mambo ka o mwamanyikila kalume wenu? Ñanyi kintu kyo nauba pa kuba’mba mubule kungubila lusa ne kuntwika kisendwa kya bano bantu bonse?+ 12  Nanchi yami nebemichile bano bantu bonse nyi? Nanchi yami nebasema pa kuba’mba muñambile’mba, ‘Basendele pa kyaji kyobe byonkatu wa mwingilo* byo alama mwana,’ kuba’mba nebatwale mu kyalo kyo mwachipile kupa bashakulu babo nyi?+ 13  Kwepi ko nsakufumya nyama ya kupa bano bantu bonse? Mambo babena kunjijila amba, ‘Tupai nyama tuje!’ 14  Kechi nakonsha kutangijila bano bantu bonse bunke bwami ne; mambo kino kintu kyambayila.+ 15  Abino umvwe byo byo musakunguba, ngipayai lonka luno.+ Umvwe mwangubila lusa, kange mundeke mmone jikwabo bya malwa ne.” 16  Yehoba wakumbwile Mosesa amba: “Konkanya banabalume 70 bakulumpe ba bena Isalela, banabalume bo wayuka’mba* bo bakulumpe ba bantu ne bantangi ba bantu,+ kabiji wibatwale ku tente wa lusambakeno bemane pamo ne obewa. 17  Amiwa nsakwikila+ ne kwamba ne obewa konkakwa,+ kabiji nsakwibapapo mupashi+ uji pe obewa, ne abo bakakukwashanga kusenda kisendwa kya bano bantu kuba’mba ubule kwibatangijila bunke bobe.+ 18  Wambile bantu amba, ‘Kesha mukezhijike,+ mambo mukaja nyama, mambo mwajijilenga ne Yehoba saka omvwa,+ kabiji mwaambilenga’mba: “Ñanyi usakwitupa nyama ya kuja? Twaikelenga bulongo mu Ijipita.”+ Kine Yehoba ukemupa nyama ne anweba mukaja.+ 19  Kechi mukaja nyama juba jimo nangwa abiji nangwa moba atanu nangwa moba jikumi nangwa moba 20 ne, 20  pakuba mukeija ñondo mutuntulu, kufikatu ne byo ikakimwa+ ne kwikala kintu kya bunya kwi anweba, mambo mwakaine Yehoba uji mukachi kenu, kabiji mwamujijiile’mba: “Mambo ka o twafumijile mu Ijipita?”’”+ 21  Kabiji Mosesa waambile’mba: “Banabalume bo nji nabo benda panshi baji 600,000,+ pakuba anweba mubena kwamba’mba, ‘Nkebapa nyama ya kuja ñondo mutuntulu’! 22  Inge baipaya mikooko ne bañombe bonse, nanchi bakonsha kwikuta nyi? Nangwa umvwe bakwata masabi onse a mu kalunga ka mema, abya bakekuta nyi?” 23  Kepo Yehoba aambijile Mosesa amba: “Nanchi kuboko kwa Yehoba kwaipipa nyi?+ Pano usakumona inge byo naamba bikamweka nangwa ne.” 24  Onkao mambo, Mosesa walupukile ne kubuula bantu byambo byaambile Yehoba. Kabiji Mosesa wakonkenye banabalume bonse 70 bakulumpe ba pa bantu ne kwibemika kuzhokoloka tente.+ 25  Kepo Yehoba aikijile mu jikumbi+ ne kwamba nanji,+ kabiji washikwilepo mupashi+ wajinga pe aye ne kupapo bakulumpe bonse 70. Kabiji mupashi byo aikele pe abo, batendekele kuba nobe bangauzhi,*+ bino kechi babwezhezhepo kuba kino ne. 26  Kwajinga banabalume babiji bashajile mu kampu. Mazhina abo bajinga Elidada ne Medada. Kabiji mupashi waikele pe abo mambo ne abo bajinga pa boba bo banembele, pakuba abo kechi bayileko ku tente ne. Onkao mambo, ne abo batatwile kuba nobe bangauzhi mu kampu. 27  Kabiji nsongwalume wayile lubilo na kubuula Mosesa amba: “Elidada ne Medada babena kuba nobe bangauzhi mu kampu!” 28  Kepo Yoshua+ mwana wa kwa Nuni waingijilanga Mosesa kufumatu ku bwanyike bwanji, aambile’mba: “Anweba nkambo Mosesa, bakanyai!”+ 29  Bino Mosesa wamwipwizhe’mba: “Nanchi ubena kungubilako kichima nyi? Nakonsha kutemwa bingi umvwe bantu ba Yehoba bonse bajinga bangauzhi ne Yehoba wibapa mupashi wanji!” 30  Byo apwishishe kuba bino, Mosesa wabwelele mu kampu pamo na bakulumpe ba bena Isalela. 31  Kabiji mwela wafumine kwi Yehoba wapupile ne kuleta bitentu kufuma mu kalunga ka mema kuzhokoloka kampu,+ palepele musinso wa juba jimo kuku ne kuku, kuzhokoloka kampu yense, kabiji byalumbamine nobe makyubichi* abiji pa mushiji. 32  Byonkabyo, aja juba jonse ne bufuku bonse ne juba jalondejilepo, bantu bakwachilengatu bitentu. Kafwako muntu wakwachile bicheche byabujile kufika mu bipimo bya homela* jikumi ne. Bafichile bino bitentu kuzhokoloka kampu yense. 33  Kabiji nyama byo yakijinga ku meno abo saka bakyangye kwiinyeuna, Yehoba wabuukijile bantu bukaji kabiji Yehoba waipayile bantu bavula bingi.+ 34  Onkao mambo, aya mpunzha beitumbile’mba Kibilota-hataba,*+ mambo kuno ko ko bazhiikile bantu bakebeshenga bingi kajo.+ 35  Bantu byo bafumine ku Kibilota-hataba bayile ku Hazelota, kabiji baikele konkakwa ku Hazelota.+

Tubyambo twa munshi

Kulumbulula’mba “Kupya,” ko kuba’mba, kulakauka; kuteema.
Kyamweka mwajinga babujile bena Isalela mukachi kabo.
Nangwa’mba “bulume bwa myeo yetu.”
Nangwa’mba “manase wa mulume.”
Nangwa’mba “bayukanyikwa kwi obewa amba.”
Nangwa’mba “batendekele kwaula.”
Kyubichi umo waesakana na masentimita 44.5. Monai bya Kulumbulula B14.
Homela waesakana na malita 220. Monai bya Kulumbulula B14.
Kulumbulula’mba “Bilende bya ba Lwiso.”