Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Ezikyo 6:1-14

BIJI MU BUKU

  • Kulwa na mitumba ya Isalela (1-14)

    • Bankishi ba bunya bakebalengesha bumvu (4-6)

    • “Mukayuka’mba amiwa yami Yehoba” (7)

6  Kabiji Yehoba wañambijile jikwabo amba:  “Obewa mwana muntu, tala ku mitumba ya Isalela ne kwaula bintu bikeimwekela.  Ukambe’mba, ‘Anweba mitumba ya Isalela, umvwai byaamba Nkambo Mfumu Yehoba: Nkambo Mfumu Yehoba waambila mitumba, tutumbatumba, mikola ne bimpachiko amba: “Talai! Amiwa nkaleta mpoko pe anweba kabiji nkonauna mapunzha enu atuntama.  Nkakundula bya kusokelapo bitapisho byenu ne kulalaula bya kufutumwinapo,+ ne bantu benu bo bakepaya nkebataya ku bankishi benu ba bunya.*+  Nkataya mibiji yafwa ya bena Isalela ku bankishi babo kabiji nkataya bikupa byenu ku bya kusokelapo bitapisho byenu byonse.+  Mu mapunzha onse mo mwikala, mizhi yonse bakeyonauna+ ne mapunzha enu atuntama bakebikundaula kabiji bikashalatu masala.+ Bya kusokelapo bitapisho byenu bakebikundula ne kwibyonauna, bankishi benu ba bunya bakebonauna, bya kufutumwinapo byenu bakebilalaula, ne bintu byo mwalenga byonse nabyo bikazhiya.  Bantu bo bakepaya bakalaalazhamatu mukachi kenu,+ kabiji mukayuka’mba amiwa yami Yehoba.+  “‘“Pano bino, nkashapo bamo, mambo bamo mwi anweba bakapuluka ku mpoko mu bisaka bya bantu kimye kyo bakemupalañenya mu byalo byonse.+  Kabiji aba bakapuluka, bakamvuluka mu bisaka bya bantu mo bakebatwala buzha.+ Bakayuka’mba najinga na bulanda mambo a kuba kechi bajinga na bukishinka kwi amiwa ne,+ batele michima yabo ku bankishi babo ba bunya.+ Kikebalenga bingi bumvu ne kumvwa kutama ku muchima na mambo a bintu byonse byatama ne bya bunya byo baubile.+ 10  Kepo bakayuka’mba amiwa yami Yehoba, ne byambo byo naambile bya kwibasopesha namba nkeboba byatama, kechi byajinga byatutu ne.”’+ 11  “Nkambo Mfumu Yehoba waamba’mba: ‘Popwela mu maboko obe ne kunyantaula maulu obe panshi, ne kuba bulanda pa bintu byonse byatama, bya bunya byonse byaubile bena Isalela, mambo abo bakafwa ku mpoko, ku nzala ne ku mwalo.+ 12  Baji kwalepa bakafwa ku mwalo, baji kwipi bakafwa ku mpoko, ne boba bakapuluka ku bino byonse bakafwa ku kipowe kya nzala; kabiji nkebazhingijila bingi.+ 13  Kepo mukayuka’mba amiwa yami Yehoba,+ kimye mibiji yabo yafwa kyo ikalaalazhamatu muji bankishi babo ba bunya, kuzhokoloka bya kusokelapo bitapisho+ byabo byonse, peulu ya tutumbatumba tonse, peulu ya mitumba yonse, munshi ya bichi byatenkuma ne munshi ya misampi ya bichi bikatampe ko bafumya bintu binunka bulongo bya kutapisha ku balesa babo bonse ba bunya.+ 14  Nkatanyika kuboko kwami ne kwibakambula ne kwalula kyalo kyabo kwikala masala kabiji mapunzha onse mo bekala akashalatu masala kukila bimweka kiselebwa kiji kwipi na Dibula. Kabiji bakayuka’mba amiwa yami Yehoba.’”

Tubyambo twa munshi

Kyambo kya Kihebelu kyakonsha kulumbulula’mba “tuvwi” kabiji bekingijisha kunenañenamo.