Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Ezikyo 46:1-24

BIJI MU BUKU

  • Milambo ya kulambula pa bimye bimo (1-15)

  • Kutambula bya buswanyi bya kinemanga (16-18)

  • Mapunzha kwa kutekela milambo (19-24)

46  “Nkambo Mfumu Yehoba waamba’mba: ‘Kibelo kya mu kipango kya mukachi kyatala ku musela,+ kyafwainwa kushala monka kyashinkikila+ pa moba a mwingilo atanu na jimo,+ pano bino, pa juba ja Sabado ne ja kutentama kwa ñondo bafwainwa kwikishinkula.  Kinemanga ukatwela kufuma pangye kutwelela ku kazubo ka ku kibelo,+ kabiji ukemana ku jishiki ja pa kibelo. Bañanga bakapana milambo yanji ya kusoka ne bitapisho byanji bya mutende, kabiji aye ukafukama pa kibelo ne kulupukamo. Bino kibelo bakekishatu kyashi kufikatu ne mabanga.  Pa Masabado ne pa kutentama kwa bañondo, bantu ba mu kyalo nabo bakafukamanga kwi Yehoba pa kibelo.+  “‘Milambo ya kusoka ikapananga kinemanga kwi Yehoba pa juba ja Sabado, yafwainwa kwikala ya baana ba mikooko balume batanu na umo babula bulema ne mukooko mulume umo wabula bulema.+  Akapanenga efa* umo wa mulambo wa kajo kwesakana na mukooko mulume, ne kintu kyonse kyo afwainwa kupana pa baana ba mikooko balume, kubikapo ne hini* wa manyi aesakana na kipimo kya efa kimo.+  Pa juba ja kutentama kwa ñondo, akapanenga mwana ñombe wabula bulema wa mu jitanga, baana ba mikooko balume batanu na umo ne mukooko mulume umo; bano banyama bafwainwa kwikala babula bulema.+  Wafwainwa kupana kipimo kya efa umo wa mulambo wa kajo pa mwana ñombe umo, mukooko mulume, ne kintu kyonse muntu kyo akonsha kupana pa baana ba mikooko balume. Kabiji wafwainwa kupana ne hini wa manyi pa kipimo kya efa kimo.  “‘Umvwe kinemanga watwela, wafwainwa kutwelela ku kibamba kya pa kibelo kiji ku kibelo, kabiji wafwainwa kulupukila konka ko aji kutwelela.+  Kabiji inge bantu ba mu kyalo baiya kwi Yehoba kimye kya bijiilo,+ aba bakatwelela ku kibelo kya ku kabeta ka ku buyeke+ pa kwiya na kumupopwela, bafwainwa kulupukila ku kibelo kya ku kabeta ka ku bulenge.+ Kabiji aba bakatwelela ku kibelo kya ku kabeta ka ku bulenge, bafwainwa kulupukila ku kibelo kya ku kabeta ka ku buyeke. Kafwako muntu nangwa umo wafwainwa kulupukila ku kibelo konka ko aji kutwelela ne, bino bonse bafwainwa kulupukila ku kibelo kikwabo kiji kulutwe yabo. 10  Pakuba kinemanga ye baji nanji, aye ukatwela inge batwela, kabiji inge balupuka naye wafwainwa kulupuka. 11  Pa kimye kya bijiilo, ne bijiilo bikatampe bya pa mwaka bakapananga efa umo wa mulambo wa kajo pa mwana ñombe, mukooko mulume, ne kintu kyonse muntu kyo afwainwa kupana pamo na baana ba mikooko balume, kubikapo hini umo wa manyi pa efa.+ 12  “‘Umvwe kinemanga wapana mulambo wa kusoka+ nangwa bitapisho bya mutende kwikala mulambo wa kwifuukwila kwi Yehoba, bakamushinkwila kibelo kyatala ku musela, kabiji ukapana mulambo wanji yense wa kusoka ne bitapisho byanji bya mutende byonka byo oba pa juba ja Sabado.+ Inge walupuka pangye, kibelo bafwainwa kwikishinka.+ 13  “‘Pa juba pa juba mwafwainwa kupana mwana mukooko mulume wa mwaka umo wabula bulema kwikala mulambo wa kusoka kwi Yehoba.+ Mwafwainwa kubanga bino lukelo pa juba pa juba. 14  Kabiji kimye kyonse lukelo, mukapanenga kipimo kimo kya mu bipimo bitanu na kimo bitwela mu efa kwikala mulambo wa kajo kubikapo ne manyi a kipimo kimo kya mu bipimo bisatu bya hini a kusansa pa bunga bwalamba, kwikala mulambo wa kupana kwi Yehoba kimye kyonse. Ano ke malamuna a myaka ne myaka. 15  Lukelo pa juba pa juba bafwainwa kupananga mwana mukooko mulume, mulambo wa kajo ne manyi kwikala ke mulambo wa kusoka wa kimye kyonse.’ 16  “Nkambo Mfumu Yehoba waamba’mba: ‘Umvwe kinemanga wapana bya bupe ku baana banji bonse kwikala bya buswanyi, bino bya bupe bikekala bya baana banji. Bikekala ke bya buswanyi bwabo. 17  Bino umvwe wapana kya bupe kya mu bya buswanyi byanji kwi kalume wanji umo, bikekala ke byanji kufikatu ne mwaka ye bakamukasulula;+ apa bino bakebibwezhe ku kinemanga. Pakuba bya buswanyi bya baana banji bikekala byabo kikupu. 18  Kinemanga kechi wafwainwa kwangata bantu bintu byabo bya buswanyi mu lupata ne. Wafwainwa kupa baana banji bintu bya mu buswanyi bwanji, pa kuba’mba muntu nangwa umo akabule kwangata bantu bami bintu byabo.’” 19  Ponkapo wantwezhejile ku kibelo kya kutwelela+ mu bibamba byazhila* bya kujiilamo bya bañanga byatajile ku kabeta ka ku buyeke,+ kabiji kuno namweneko mpunzha ku muzhika yajinga kunyuma yabyo. 20  Wañambijile’mba: “Ino yo mpunzha kukatekelanga bañanga mulambo wa mambo, mulambo wa bubi, kabiji ko ko bakoshelanga mulambo wa kajo,+ pa kuba’mba bakabule kusendapo kintu nangwa kimo pa kuya mu kipango kya pangye ne kuzhijika bantu.”+ 21  Wandetele ku kipango kya pangye ne kumpisha mu makonka ana a kipango, kabiji namwene kipango kyajinga mu makonka a kipango kya pangye. 22  Kabiji mu makonka ana a mu kipango, mwajinga bipango bya bicheche byajinga mu bula makyubichi* 40 ne mu bwipi 30. Byonse bina byaesakene.* 23  Ku bino bipango byonse bina kwazhokolokele momeno,* kabiji munshi ya momeno bashimikilemo tubibamba mwa kutekela milambo. 24  Ponkapo wañambijile’mba: “Ano o mazubo, bantu baingijilanga mu nzubo ya Lesa o batekelangamo bitapisho bya kupana ku bantu.”+

Tubyambo twa munshi

Nangwa’mba “tumazubo twazhila.”
Kino kibena kwamba pa makyubichi alepa. Monai bya Kulumbulula B14.
Nangwa’mba “Byonse bina ne bishimikwa byabyo bya mu makonka byajingatu kimotu.”
Nangwa’mba “mikuku.”