Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Ezikyo 41:1-26

BIJI MU BUKU

  • Mpunzha yazhila ya nzubo ya Lesa (1-4)

  • Lubumbulu ne tumazubo tuji mu mbaji (5-11)

  • Kishimikwa kya ku muzhika (12)

  • Bishimikwa bebipima (13-15a)

  • Mukachi mwa nzubo yazhila (15b-26)

41  Kepo antwajile mu nzubo yazhila,* kabiji wapimine mashiki ajinga kwapela; mu bwipi mwajinga makyubichi* atanu na umo ku bushiya ne bushiya.  Ne kibelo mu bwipi kyabayile makyubichi jikumi, ne ku mbaji ya lubumbulu wa kibelo konse kubiji, kwajinga makyubichi atanu ku lubaji lumo ne makyubichi atanu ku lubaji lukwabo. Wapimine nzubo ya Lesa, mu bula yajinga makyubichi 40, ne mu bwipi makyubichi 20.  Ponkapo watwelele mukachi* ne kupima jishiki ja pa kibelo, kujita kwajo jajinga makyubichi abiji, kabiji kibelo mu bwipi kyabayile makyubichi atanu na umo. Lubumbulu wajinga ku kibelo, wajichile* makyubichi atanu na abiji.  Kabiji wapimine kibamba kya mukachi kyatalañene na nzubo ya Lesa, mu bula kyajinga makyubichi 20 ne mu bwipi kyajinga makyubichi 20.+ Kabiji wañambijile’mba: “Muno mo Mwazhijisha.”+  Kabiji wapimine lubumbulu wa nzubo ya Lesa, kujita kwanji wajinga makyubichi atanu na umo. Tumazubo twajinga kunsa ya nzubo ya Lesa, mu bula twajinga makyubichi ana.+  Tuno tumazubo twajinga kunsa, twatentakene tusatu kuya peulu, mu mukuku umo umo mwajinga tumazubo 30. Ku lubumbulu yense wa nzubo ya Lesa bashileko mwa kukwata tumazubo pangye kwa kubula kutwezhamo myamba, pa kuba’mba ino myamba ibule kutwela mu lubumbulu wa nzubo ya Lesa.+  Ku bushiya ne bushiya bwa nzubo ya Lesa kwashajile mpunzha* pa kushimikila tumazubo twa peulu.+ Mu bwipi bwa tuno tumazubo mwabaijilengako kufuma pa kazubo ka panshi kukafika ne pa kazubo ka peulu.  Kabiji namwene mutuntamo po bashimikijile nzubo ya Lesa, ne bitendekesho bya tumazubo byalepele byonka byalepele jitete makyubichi atanu na umo kufuma panshi kuya peulu.  Mu bwipi bwa lubumbulu wa pangye wa tumazubo mwajinga makyubichi atanu. Kabiji kwajinga lubanza* kunsa ya tumazubo wafikile ne ku nzubo ya Lesa. 10  Lubanza wajinga pakachi ka nzubo ya Lesa ne bibamba* mwa kujiila+ wajinga makyubichi 20 bushiya ne bushiya. 11  Pajinga kibelo pakachi ka tumazubo ne mpunzha yajinga ku kabeta ka ku buyeke, kabiji kwajinga kibelo kikwabo kyaikejile ku kabeta ka ku bulenge. Uno lubanza wazhokolokele nzubo ya Lesa, mu bwipi wajinga makyubichi atanu. 12  Kishimikwa kyajinga ku muzhika kyatajile ku lubanza, kyajinga makyubichi 70 mu bwipi, ne makyubichi 90 mu bula; kujita kwa lubumbulu wazhokolokele ino nzubo, kwajinga makyubichi atanu. 13  Wapimine nzubo ya Lesa, mu bula mwajinga makyubichi 100. Lubanza, kishimikwa* ne lubumbulu, byonse byajinga makyubichi 100 mu bula. 14  Kufuma kulutwe ya nzubo ya Lesa ku musela ne patendekejile lubanza, pajinga makyubichi 100. 15  Wapimine bula bwa kishimikwa kyatajile ku lubanza, ne bukonde bwakyo bushiya ne bushiya kabiji kyajinga makyubichi 100. Kabiji wapimine nzubo yazhila ne kibamba kya mukachi+ ne kazubo ka pa kutwelela katajile ku kipango, 16  kuvwangako ne pa bibelo, bipenze byajinga na mafulemu+ o bapikankenye, ne bukonde bwajinga ku mazubo asatu. Panshi ya bipenze baimikilepo mapulanga+ afikile ne pa bipenze; ne pa bipenze pavwetekele. 17  Bapimine peulu ya kibelo ne mukachi ka nzubo ya Lesa ne pangye, ne kuzhokoloka lubumbulu yense. 18  Pa lubumbulu yense balengejilepo bakelubi+ ne bintu byamwekelenga nobe bisonga,+ kabiji babikile kisonga pakachi ka bakelubi babiji, ne pa bakelubi babiji bakwabo babikilepo kisonga pakachi, ne bano bakelubi bajinga na bilungi bibiji bibiji. 19  Kilungi kya muntu kyatajile ku lubaji lumo lwa kisonga, ne kilungi kya bokwe kyatajile ku lubaji lukwabo lwa kisonga.+ Pa lubumbulu yense wa nzubo ya Lesa balengejilepo bakelubi. 20  Kufuma panshi kufika peulu ya kibelo, pajinga bakelubi ne bintu byamwekelenga nobe bisonga pa lubumbulu wa nzubo ya Lesa. 21  Mashiki* a ku bibelo bya nzubo ya Lesa aesakene monse mu bula ne mu bwipi.+ Kulutwe ya kibamba kyazhila* kwajinga kintu kyamwekelenga nobe 22  kya kusokelapo bitapisho kya bichi+ kyalepele makyubichi asatu kuya peulu ne mu bula makyubichi abiji. Kino kya kusokelapo bitapisho kyajinga na mashiki mu makonka akyo onse kabiji panshi* ne mu mbavu yakyo bekilengele na mapulanga. Kepo uno muntu añambijile’mba: “Uno ye tebulu uji ku meso a Yehoba.”+ 23  Kibamba kya mukachi kya nzubo ya Lesa ne kibamba kyazhila kyajinga na bibelo bibiji bibiji.+ 24  Kabiji bino bibelo byajinga na binzhilo byashinkukilanga kulutwe ne kunyuma. Kibelo kimo kyajinga na binzhilo bibiji bikwata. 25  Pa binzhilo bya nzubo ya Lesa balengejilepo bakelubi ne bintu byamwekelenga nobe bisonga nabiji byobya byajinga pa lubumbulu.+ Kabiji pangye pajinga jizezelo* ja mapulanga jakafikile ne pa kibamba kya pa kibelo kyajinga pa kutwelela. 26  Kabiji kwajinga bipenze byajinga na mafulemu+ o bapikankenye, ne bintu byamwekelenga nobe bisonga ku bushiya ne bushiya bwa kibamba kya pa kibelo, ne tumazubo twa mu nzubo ya Lesa ne pa jizezelo.

Tubyambo twa munshi

Mu Kihebelu, “nzubo ya Lesa.” Mu bitango 41 ne 42, bino byambo bibena kwamba pangye ya nzubo yazhila (Mwazhila) nangwa’mba nzubo yazhila yonse (nzubo ya Lesa kuvwangakotu ne Mwazhila ne Mwazhijisha).
Kino kibena kwamba pa makyubichi alepa. Monai bya Kulumbulula B14.
Ko kuba’mba, mukachi ka nzubo yazhila, nangwa Mwazhijisha.
Mu Kihebelu, “Mu mbavu ya kino kibelo mwajinga.”
Kyamweka ibena kwamba pa bya kukanjijilapo byajinga na bya kunyantapo byanzhingwile.
Kyamweka mwa kupichila pa kuzhokoloka nzubo ya Lesa.
Nangwa’mba “tumazubo.”
Ko kuba’mba, kishimikwa kyajinga ku muzhika wa nzubo yazhila.
Mu Kihebelu, “Jishiki.” Kyamweka jino jibena kwimenako kibelo kya Mwazhila.
Kyamweka kibena kutongola Mwazhijisha.
Mu Kihebelu, “bula.”
Nangwa’mba “kamusemi ka.”