Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Ezikyo 20:1-49

BIJI MU BUKU

  • Mwapita bunsatuki bwa bena Isalela (1-32)

  • Mulaye wa kubwezha bintu pa bena Isalela (33-44)

  • Bungauzhi bo baawijile kabeta ka ku bulenge (45-49)

20  Kabiji mu mwaka wa butanu na bubiji, mu ñondo wa butanu, pa juba ja bujikumi ja ñondo, bakulumpe bamo ba bena Isalela baishile ne kwikala po najinga kuba’mba bepuzhe bintu kwi Yehoba.  Kepo Yehoba añambijile’mba:  “Obewa mwana muntu, isambe na bakulumpe ba bena Isalela ne kwibabuula’mba, ‘Nkambo Mfumu Yehoba waamba’mba: “Nanchi mwaiya na kwipuzha bintu kwi amiwa nyi? ‘Byonkatu byo nji na bumi, kechi nkemukumbula pa bintu byo mukepuzha ne,’+ byo byaamba Nkambo Mfumu Yehoba.”’  “Nanchi ukebachibila mambo nyi?* Obewa mwana muntu, abya ukebachibila mambo nyi? Wibabuule bayuke bintu bya bunya byaubile bashakulu babo.+  Wibabuule’mba, ‘Nkambo Mfumu Yehoba waamba’mba: “Pa juba jo nasajile Isalela,+ nachipile* ne ku baana* ba mu nzubo ya Yakoba, kabiji nesolwele kwi abo mu kyalo kya Ijipita.+ Nachipile kwi abo namba, ‘Amiwa yami Yehoba Lesa wenu.’  Pa jonkaja juba, nachipile namba, nkebafumya mu kyalo kya Ijipita ne kwibatwala mu kyalo kyo nebakebejile,* kyalo kyavula mukaka ne buki.+ Kino kyajinga kyalo kyawamine bingi kukila byalo byonse.  Kabiji nebambijile namba, ‘Anweba bonse pa muntu pa muntu, mwafwainwa kutaya bintu byonse bya bunya byo muji nabyo; kechi mwafwainwa kwizhilulula na bankishi ba bunya* ba bena Ijipita ne.+ Amiwa yami Yehoba Lesa wenu.’+  “‘“Pano bino, abo bansatukijile kabiji bakaine kuñumvwina. Kechi batayile bankishi babo ba bunya bo bajinga nabo ne, kabiji kechi basankijilepo bankishi ba bunya ba bena Ijipita ne.+ Onkao mambo, naambile namba nkebazhingijila ne kupwishisha bukaji bwami pe abo mu kyalo kya Ijipita.  Bino naubile kino na mambo a jizhina jami kuchina’mba bakejitamisha ku bisaka bya bantu bo baikalanga nabo.+ Mambo amiwa nesolwele kwi abo* ku bino bisaka bya bantu kimye kyo nebafumishe* mu kyalo kya Ijipita.+ 10  Byonkabyo, nebafumishe mu kyalo kya Ijipita ne kwibatwala mu kiselebwa.+ 11  “‘“Kabiji nebapele malamuna ami ne kwibalengela kuyuka mizhilo yami,+ pa kuba’mba muntu yense ukeilondelanga akekale na bumi.+ 12  Nebapele ne masabado+ ami kwikala kayukilo kami ne abo,+ kuba’mba bakayuke’mba amiwa Yehoba yami nebazhijika. 13  “‘“Nangwa byonkabyo, bena Isalela bansatukijile byo bajinga mu kiselebwa.+ Kechi baendelenga mu malamuna ami ne, kabiji bakaine kulondela mizhilo yami ilengela muntu kwikala na bumi umvwe wiilondela. Bazhilulwile masabado ami. Onkao mambo, naambile namba nkebabuukila bukaji mu kiselebwa ne kwibavizha.+ 14  Naubile kino na mambo a jizhina jami kuchina’mba bakejilengulwisha ku bisaka bya bantu bamwenengako byo nebafumishemo.*+ 15  Kabiji nachipile kwi abo mu kiselebwa namba, kechi nkebatwala mu kyalo kyo nebapele+ kyavula mukaka ne buki kabiji kyawamine bingi+ kukila byalo byonse ne, 16  mambo abo bakaine kulama mizhilo yami ne malamuna ami, kabiji bazhilulwile masabado ami ne kuta michima yabo ku bankishi babo ba bunya.+ 17  “‘“Nangwa byonkabyo, amiwa* nebomvwijile lusa kabiji kechi nebonawine ne; kechi nebavizhizhe mu kiselebwa ne. 18  Naambijile baana babo mu kiselebwa+ namba, ‘Kange mulondelenga malamuna a bashakulu benu,+ ne kulama mizhilo yabo nangwa kwizhilulula na bankishi babo ba bunya ne. 19  Amiwa yami Yehoba Lesa wenu. Endainga mu mikambizho yami ne kulama mizhilo yami ne kwiilondela.+ 20  Zhijikai masabado ami+ kabiji akekala ke kayukilo kami ne anweba, pa kuba’mba mukayuke’mba amiwa yami Yehoba Lesa wenu.’+ 21  “‘“Nangwa byonkabyo, baana babo nabo bansatukijile.+ Kechi baendelenga mu malamuna ami ne kwialama ne, kabiji kechi balondejilenga mizhilo yami ilengela muntu kwikala na bumi umvwe wiilondela ne. Bazhilulwile masabado ami. Onkao mambo, naambile namba nkebazhingijila ne kupwishisha bukaji bwami pe abo mu kiselebwa.+ 22  Pano bino, nabujile+ kuba kino kuchina’mba jizhina jami+ bakejilengulwisha ku bisaka bya bantu bamwenengako byo nebafumishemo.* 23  Kabiji nachipile kwi abo mu kiselebwa namba, nkebapalañenya mu bisaka bya bantu ne mu byalo bingi,+ 24  mambo kechi bakookejile mizhilo yami ne. Bakaine malamuna ami,+ bazhilulwile masabado ami kabiji balondejilenga* bankishi ba bunya ba bashakulu babo.+ 25  Nebaswishishe kulondela malamuna atama ne mizhilo yakonsheshe kubula kwibalengela kwikala na bumi.+ 26  Nebalekele kuba’mba bezhilulule na bitapisho byabo, byo batayile baana babo babeji mu mujilo,+ pa kuba’mba bebonaune ne kuyuka’mba amiwa yami Yehoba.”’ 27  “Onkao mambo, obewa mwana muntu, buula bena Isalela amba, ‘Nkambo Mfumu Yehoba waamba’mba: “Abino byo byo bañendelekelenga ne bashakulu benu byo bangalukilemo. 28  Nebaletele mu kyalo kyo nachipile kwibapa.+ Kabiji byo bamwene tutumbatumba tonse twalepa ne bichi byatenkuma,+ batatwile kutapisha bitapisho byabo ne kupana milambo yabo yatama. Basokejilengako bintu biji na bwema bwawama* ne kwitulwilako milambo yabo ya binyu. 29  Ponkapo nebashikishe namba, ‘Nanchi mapunzha atuntama o muyako alumbulula ka? (Ne lelo jino pakitelwa’mba Mapunzha Atuntama.)’”’+ 30  “Pano buula bena Isalela amba, ‘Nkambo Mfumu Yehoba waamba’mba: “Nanchi mubena kwizhilulula byonka byaubilenga bashakulu benu na kongolokela ku bankishi benu ba bunya ne kubula bukishinka kwi amiwa* nyi?+ 31  Nanchi ne lelo jino, mwakitwajijila na kwizhilulula na kutapisha bitapisho ku bankishi benu bonse ba bunya ne kutaya baana benu mu mujilo nyi?+ Anweba bena Isalela, nanchi nakonsha kwimukumbula pa byo mubena kwipuzha nyi?”’+ “Nkambo Mfumu Yehoba waamba’mba, ‘Byonkatu byo nji na bumi kechi nkemukumbula ne.+ 32  Kabiji bintu byo muji nabyo mu milanguluko* pa kwamba’mba, “Twayai twikale byonka byaikala bantu ba mu bisaka ne ba mu mikoka ya mu byalo bingi bipopwela* bichi ne mabwe, kechi mukebyuba ne.”’”+ 33  “Nkambo Mfumu Yehoba waamba’mba, ‘Byonkatu byo nji na bumi, amiwa nkekala mfumu wenu. Nkatanyika kuboko kwami kwa bulume kabiji kwakosa ne kwimukambula. Kabiji nkemubuukila bukaji.+ 34  Nkemufumyamo mu mitundu ya bantu ne kwimukonkanya pamo kufuma mu byalo mo mwapalañenejile na kuboko kwami kwa bulume kabiji kwakosa, ne na bukaji bwami.+ 35  Nkemuleta mu kiselebwa muji mitundu ya bantu ne kwimuzhachishisha monkamwa saka twitala.+ 36  “Nkambo Mfumu Yehoba waamba’mba, ‘Byonkatu byo nazhachishe bashakulu benu mu kiselebwa kya mu kyalo kya Ijipita, byo byo nkemuzhachisha ne anweba.’ 37  ‘Nkemupisha munshi ya kamama ka kwa kafunga+ ne kulayañana nenu lulayañano. 38  Nangwa byonkabyo, mwi anweba nkafumyamo bansatuki ne boba bandenga mambo.+ Nkebafumya mu kyalo kyabula kyabo mo babena kwikala, pano bino, kechi bakatwela mu kyalo kya Isalela ne;+ kabiji po po mukayuka’mba amiwa yami Yehoba.’ 39  “Pakuba anweba bena Isalela, Nkambo Mfumu Yehoba waamba’mba: ‘Anweba bonse pa muntu pa muntu, yainga mukengijilenga bankishi benu ba bunya.+ Pano bino, umvwe mwabula kuñumvwina, mukekimona kabiji kechi mukatamishapo jibiji jizhina jami jazhila na bitapisho byenu ne na bankishi benu ba bunya ne.’+ 40  “Nkambo Mfumu Yehoba waamba’mba, ‘Konka ku mutumba wami wazhila, pa mutumba walepa wa Isalela,+ kisaka kyonse kya Isalela ko ko kikañingijilanga mu kino kyalo.+ Nkasekela mwi abo kabiji nkakeba bya bupe byenu ne milambo yenu yawamisha ne bintu byenu byonse byazhila.+ 41  Mukansangajika na mambo a bwema bwabyo bwawama,* byo nkemufumya mu mitundu ya bantu ne kwimukonkanya pamo kufuma mu byalo mo mwapalañenejile;+ kabiji nkazhijikwa mwi anweba ku bisaka bya bantu.’+ 42  “‘Kepo mukayuka’mba amiwa yami Yehoba+ byo nkemuleta mu kyalo kya Isalela,+ kyalo kyo nachipile kupa bashakulu benu. 43  Byo mukafika kokwa, mukavuluka byubilo byenu ne bintu byonse byatama byo mwaubile,+ kabiji kikemukola bingi ku muchima na mambo a bintu byonse byatama byo mwaubile.+ 44  Anweba kisaka kya Isalela, po po mukayuka’mba amiwa yami Yehoba pa bintu byo nkemubila na mambo a jizhina jami,+ kechi nkemuba monka mwayila byubilo byenu byatama byo muba ne,’ byo byaamba Nkambo Mfumu Yehoba.” 45  Kabiji Yehoba wañambijile jikwabo amba: 46  “Obewa mwana muntu, tala ku kabeta ka ku bulenge, usapwile konka ku kabeta ka ku bulenge ne kwaula bintu bikamwekela jisaka ja ku kabeta ka ku bulenge. 47  Ambila jisaka jiji ku kabeta ka ku bulenge amba, ‘Umvwa byaamba Yehoba. Nkambo Mfumu Yehoba waamba’mba: “Amiwa mbena kukwambwila mujilo, kabiji ukasoka bichi byonse byatalala ne byauma biji mwi obewa.+ Ne mujilo ubena kulakauka kechi ukazhima ne,+ kabiji kintu kyonse kikababauka kufuma ku kabeta ka ku bulenge kukafika ne ku kabeta ka ku buyeke. 48  Kabiji bantu bonse bakayuka’mba amiwa Yehoba yami nasoka mujilo kabiji kechi bakamuzhimya ne.”’”+ 49  Ponkapo naambile namba: “Anweba Nkambo Mfumu Yehoba! Bantu babena kuñambila’mba, ‘Nanchi kechi ubena kwambatu bishimpi nenyi?’”

Tubyambo twa munshi

Nangwa’mba “ukebatayila mbila ya kwibazhachisha nyi?”
Mu Kihebelu, “nasuntwile kuboko kwami.”
Mu Kihebelu, “lukunwa.”
Nangwa’mba “kwendela kyalo.”
Kyambo kya Kihebelu kyakonsha kulumbulula’mba “tuvwi” kabiji bekingijisha kunenañenamo.
Ko kuba’mba, bena Isalela.
Ko kuba’mba, bena Isalela.
Ko kuba’mba, bena Isalela.
Mu Kihebelu, “jiso jami.”
Ko kuba’mba, bena Isalela.
Mu Kihebelu, “meso abo alondejilenga.”
Nangwa’mba “kuzhindamika; kutontolola.” Mu Kihebelu, “kwikizha kyefu.”
Nangwa’mba “nanchi kechi mubena kuba bupite bwa ku mupashi nenyi?”
Mu Kihebelu, “mupashi.”
Nangwa’mba “bingijila.”
Nangwa’mba “kuzhindamika; kutontolola.” Mu Kihebelu, “kwikizha kyefu.”