Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Ezikyo 19:1-14

BIJI MU BUKU

  • Lwimbo wa bulanda pa mambo a babinemanga ba bena Isalela (1-14)

19  “Wafwainwa kwimba lwimbo wa bulanda* pa mambo a babinemanga ba bena Isalela  ne kwamba’mba,‘Nanchi inobe wajinga ñanyi? Wajinga bokwe mukazhi wajinga pa kipanyi kya mabokwe. Waikelenga na baana ba mabokwe bakaji kabiji wakomeshe baana banji.   Wakomeshepo mwana umo waikele ke bokwe mukaji.+ Wafunjile bya kukwata banyama,Kabiji wajiilenga ne bantu.   Ba mu bisaka bya bantu baumvwine nkuwa yanji kabiji waponejile mu kimbo kyabo,Ne kumukwata kabiji bamutwajile mu kyalo kya Ijipita saka bamukoba kanda ko bakashila ku lutambo.+   Inanji wapembejilenga, kabiji byo papichile kimye wamwene kuba’mba mwananji kechi ukabwela ne. Onkao mambo, wasendelepo mwana mukwabo ne kumufunjisha kwikala ke bokwe mukaji.   Kabiji naye waendejilenga pamo na mabokwe akwabo ne kwikala ke bokwe mukaji. Wafunjile bya kukwata banyama, kabiji wajiilenga ne bantu.+   Walukukilenga bantu bajinga mu byamba byakosa ne konauna mizhi yabo,Kya kuba kyalo kyashajiletu ke masala na mambo a kubuluma kwanji.+   Bisaka bya bantu bikwabo byamuzhokolokele, byaishile na kumuta bukonde bwabyo,Kabiji waponejile mu kimbo kyabyo ne kumukwachila monka.   Byo bamukobele kanda, bamubikile mu kitangaji kabiji bamuletele ku mfumu wa Babilona. Bamulamijile konkakwa, kya kuba jiwi janji kechi jaumvwanyikilepo jikwabo pa mitumba ya bena Isalela ne. 10  Inobe wajinga nobe kichi kya miñanzañanza+ mu mashi* obe, kyo bajimba ku mema. Kyapangile bipangwa ne kwikala na misampi yavula na mambo a kuvula kwa mema. 11  Kyaikele na misampi* yakosa bingi yo bafwainwe kulengelako ndondo ya bufumu. Kyakomene ne kulepa kukila bichi bikwabo,Kabiji kyamwekelanga palepa na mambo a kulepa ne na mambo a kuvula kwa misampi ne mabuula akyo. 12  Bino na mambo a bukaji bekizhujile+ ne kwikinyukwila panshi,Ne mwela wafumine ku musela waumishe bipangwa byakyo. Misampi yakyo yakosa yaposaukile ne kuma+ kabiji yapile na mujilo.+ 13  Kepo bakekijimbile mu kiselebwa,Mu kyalo kyauma mwabujile mema.+ 14  Mujilo wakwachile ku misampi* ne kusoka bipangwa ne mizhazhi yakyo,Kabiji kafwako musampi nangwa umo washajileko ye bafwainwe kulengako ndondo ya bufumu ne.+ “‘Uno ye lwimbo wa bulanda, kabiji ukekala lwimbo wa bulanda.’”

Tubyambo twa munshi

Nangwa’mba “lwimbo wa majila.”
Nangwa, “nobe kichi kya miñanzañanza mu bujimi bwa miñanzañanza.”
Nangwa’mba “tumama.”
Nangwa’mba “tumama.”