Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Byubilo 4:1-37

BIJI MU BUKU

  • Petelo ne Yoano bebepuzha (1-4)

    • Banabalume baitabila bafikile 5,000 (4)

  • Kutotolola mu kije kya Saniedilini (5-22)

    • ‘Kechi twakonsha kuleka kwamba ne’ (20)

  • Balombele’mba bachinchike (23-31)

  • Baana ba bwanga bapapo bakwabo bintu (32-37)

4  Bano babiji byo bakyambilenga ku bantu, bañanga, mukulumpe wa bakalama ba nzubo ya Lesa ne Basadusea+ baishile kwi abo.  Bano bazhingijile bingi mambo batumwa bafunjishenga bantu ne kwibasapwila patoka pa lusanguko lwa kwa Yesu lwa kufuma mu bafu.*+  Onkao mambo, bebakwachile ne kwibatwala mu kaleya+ kufikatu ne juba jalondejilepo, mambo bwaijile.  Nangwa byonkabyo, bantu bavula baumvwine byo baambile baitabijile, kabiji bonse pamo bajinga banabalume nobe 5,000.+  Juba jalondejilepo, bantangi babo, bakulumpe ne banembeshi bakonkene mu Yelusalema,  pamo ne Anasa+ ñanga mukatampe, Kaifasa,+ Yoano, Alekesanda ne balongo bonse ba kwa ñanga mukatampe.  Kabiji baimikile Petelo ne Yoano pakachi kabo ne kwibashikisha’mba: “Ñanyi wimupa luusa nangwa mu jizhina ja kwa ñanyi mo mwaubila kino kintu?”  Kepo Petelo byo ayujile mupashi wazhila,+ ebambijile’mba: “Anweba bantangi ne bakulumpe,  lelo umvwe mubena kukeba’mba twimubuule kintu kyawama kyaubilwa uno muntu kilema,+ ne wamubuka, 10  yukai anweba bonse ne bena Isalela bonse kuba’mba mu jizhina ja Yesu Kilishitu mwina Nazala,+ yenka ye mwaipayijile pa kichi+ bino Lesa ye asangwile mu bafu,+ ye walengela uno muntu waimana kulutwe yenu kubukwa. 11  Uno ye ‘jibwe jo mwamonanga nobe jatutu anweba bantungi kabiji ye waikala ke jibwe jikatampe ja pa jikonka.’*+ 12  Lupulukilo kechi lukeshilapo mu muntu mukwabo ne, mambo kafwako jizhina jikwabo+ pano pa ntanda Lesa jo asala mu bantu ja kwitupulushishamo ne.”+ 13  Byo bamwene kwamba kipasu* kwa kwa Petelo ne Yoano, ne kuyuka’mba bano bantu kechi bafunjile* ne, bantutu,+ bakuminye bingi. Kabiji bebayukile’mba baendanga ne Yesu.+ 14  Byo batajilenga mwanamulume wabukilwe saka aimana nabo,+ bakankelwe ne kya kwamba pa kino.+ 15  Onkao mambo, bebakambizhe kulupukamo mu kije kya Saniedilini, kepo batatwile kwishikisha mulwabo, 16  amba: “Nanchi twibobe byepi bano bantu?+ Mambo kwa kubula nangwa kuzhinaukatu ne, bauba kiyukilo kikatampe mwi atweba, kyamona bonse baji mu Yelusalema,+ kabiji kechi twakonsha kwikikana ne. 17  Pa kuba’mba kino kintu kibule kuyukanyikwa ku bantu bavula, twayai twibachinyishe ne kwibakanya kusapwila ku muntu nangwa umo kwingijisha jino jizhina.”+ 18  Ponkapo bebechile ne kwibakambizha’mba kechi bafwainwa kwamba nangwa kufunjisha muntu mu jizhina ja Yesu ne. 19  Bino Petelo ne Yoano baambile’mba: “Anwe bene chibilai mo mwalangulukila, umvwe kyawama kwimumvwina anweba, kukila kumvwina Lesa. 20  Pakuba atweba kechi twakonsha kuleka kwamba pa bintu byo twamwene ne kumvwa ne.”+ 21  Onkao mambo, byo bebachinyishe jibiji, bebalekeleko, mambo kechi bebataaine na mambo a kwibamanyikilapo ne, kabiji bachiinenga bantu+ mambo bonse batumbijikilenga Lesa pa kyamwekele. 22  Kabiji mwanamulume ye babukile mu jino jishinda ja kukumya* wajinga na myaka ya kusemwa kukila 40. 23  Byo bebalekeleko, bayile ku balongo babo ba mu lwitabilo ne kwibabuula bibambijile bañanga bakatampe ne bakulumpe. 24  Byo baumvwine bino, balombejile pamo kwi Lesa amba: “Anweba Nkambo Mfumu, yenu mwalengele jiulu ne ntanda ne kalunga ka mema ne bintu byonse bijimo,+ 25  kabiji kupichila mu mupashi wazhila mwaambile ku mushakulu wetu Davida,+ kalume wenu amba: ‘Mambo ka bisaka bya bantu o byazhingijile ne bantu o balangulukila pa bintu byatutu? 26  Bamfumu ba pano pa ntanda betanchika ne bantangi babo bepwizha pamo na kulengulula Yehoba* ne mushingwa* wanji.’+ 27  Mambo Heloda ne Pontiusa Pilato+ pamo na banabalume ba mu bisaka bya bantu ne bena Isalela bakonkene pamo mu uno muzhi na kulengulula kalume wenu wazhila Yesu, ye mwashingile manyi,+ 28  kuba’mba bobe akya kyo mwafuukwijile jimo na bulume bwenu amba kyubiwe.+ 29  Pano anweba Yehoba,* umvwai bintu byo babena kwitupingila kabiji kwashai bakalume benu kwambanga mambo enu na kuchinchika, 30  saka mwatanyika kuboko kwenu na kubuka ne biyukilo ne bya kukumya* saka bibena kubiwa+ kupichila mu jizhina ja kalume wenu wazhila aye Yesu.”+ 31  Kabiji byo bapwishishe kulomba na misashijilo,* mu nzubo mo bajinga mwatenkene, kabiji bonse bayujile mupashi wazhila+ ne kutatula kwamba mambo a Lesa na kuchinchika.+ 32  Kabiji bantu bavula baitabijile bajinga na muchima umo ne mweo* umo, kafwako nangwa umo waambile pa bintu byo ajinga nabyo amba byami ne, bonse bajinga na bintutu bimo.+ 33  Kabiji na mambo a bulume bukatampe batumwa bashimwinenga pa mambo a lusanguko lwa Nkambo Yesu,+ kabiji bonse bebobijile lusa lukatampe kwi Lesa. 34  Kabiji kafwako nangwa umo wakajilwe kintu mwi abo ne,+ mambo bonse bajinga na majimi ne mazubo beapoteshenga ne kuleta mali o bapoteshenga bintu, 35  kabiji beatujilenga ku batumwa.+ Ne batumwa nabo beabenyenga ano mali ku bantu bonse kwesakana na mo bakajilwe.+ 36  Onkao mambo, Yosefwa ye batelanga ku batumwa amba Banabasa,+ (kulumbulula’mba “Mwana wa Lutekenesho”), mwina Levi, ngikazhi wa mu Kipilusa, 37  wajinga na bujimi, kabiji wibupoteshe ne kuleta mali ku batumwa.+

Tubyambo twa munshi

Nangwa’mba “kusanguka kwa kwa Yesu.”
Mu Kingiliki, “mutwe wa pa jikonka.”
Nangwa’mba “kuchinchika.”
Ko kuba’mba, kechi bafunjile pa masukulu a balabi ne; kechi kilumbulula’mba balubile kutanga ne.
Nangwa’mba “kimwesho.”
Nangwa’mba “Kilishitu wanji.”
Nangwa’mba “bimwesho.”
Nangwa’mba “kulomba na mukoyo.”