Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Byubilo 28:1-31

BIJI MU BUKU

  • Kitulu kya pa Melita (1-6)

  • Shanji Pubiliusa wabukwa (7-10)

  • Kuya ku Loma (11-16)

  • Paulo wisamba na Bayudea mu Loma (17-29)

  • Paulo wasapwila na kuchinchika pa myaka ibiji (30, 31)

28  Byo twapulukile bonse, po po twayukile’mba jino jikuji jatelwanga’mba Melita.+  Kabiji bantu* baambilenga mulaka ungi betubijile bingi lusa.* Babanzhile mujilo ne kwitutambwila bulongo na mambo a mvula wanokelenga ne mashika.  Bino Paulo byo abungulwile nsala ne kwiibika pa mujilo, na mambo a kyuya kipiji waswatukilepo ne kuumina pa kuboko kwa kwa Paulo.  Bantu baambilenga mulaka ungi byo bamwene uno muloolo wa bulembe saka aumina pa kuboko kwanji, batendekele kwamba mulwabo amba: “Kine, uno muntu mbanzhi, nangwa kya kuba wapuluka pa kalunga ka mema, Bunchibamambo Bwaoloka* kechi bwamuswisha’mba ekale mumi ne.”  Nangwa byonkabyo, wamukunchijile muloolo mu mujilo kabiji kafwako kyatama kyamumwekejile ne.  Bino bantu balangulukilenga’mba usakuvimba nangwa kufwa ponkapotu. Byo bapembejile pa kimye kyabaya ne kumona’mba kafwako kyatama kyamumwekela ne, bapimpwile milanguluko ne kutendeka kwamba’mba ye lesa.  Kwipi na yonka ino mpunzha kwajinga majimi a mukulumpe wa jino jikuji wa jizhina ja Pubiliusa, witutambwijile bingi bulongo ne kwitulama pa moba asatu.  Shanji Pubiliusa walaajile pa mwanya saka akolwa kikola kya mashika ne kupolomya mashi, kabiji Paulo byo atwelele mo ajinga, walombele ne kumutenteka maboko, ne kumubuka.+  Kino byo kyamwekele, bantu bonse ba pa jikuji bajinga na bikola, nabo batendekele kwiya kwi aye kabiji wibabukile.+ 10  Betunemekele ne na bya bupe byavula, kabiji byo twayilenga na bwato, betupaikijile bintu byonse byo twakajilwe. 11  Byo papichile bañondo basatu, twakanjijile bwato bwajinga na kiyukilo kya kuba’mba “Baana ba Balume ba kwa Zuse.” Buno bwato bwafumine ku Alekesandiliya kabiji bwaikele pa jino jikuji mu bañondo ba mashika. 12  Kabiji byo twafikile pa kiito kya Silakusa, twaikelepo moba asatu; 13  byo twafuminepo twazhokolokele ne kufika ku Legiuma. Byo papichile juba jimo, kwaishile luvula kufuma ku kabeta ka ku bulenge kabiji pa juba ja bubiji twafikile ku Mputeoli. 14  Kuno twataaineko balongo kabiji betusashijile’mba twikale nabo pa moba atanu na abiji, kabiji twayile ku Loma. 15  Kabiji balongo mu Loma byo baumvwine’mba tubena kuya konka, betutundaijile kufikatu ne ku Kisankanyi kya Apiusa ne ku Mazubo a Benyi Asatu. Paulo byo ebamwene, wamusanchijile Lesa ne kukosa wakosele.+ 16  Byo twafikile mu Loma, Paulo bamuswishishe kwikala bunke bwanji pamo na mushilikale wamusopelenga. 17  Nangwa byonkabyo, byo papichile moba asatu, waichile bakulumpe ba Bayudea. Byo bakonkene pamo, wibambijile’mba: “Anweba bakwetu, balongo, nangwa kya kuba kafwako kyatama kyo nauba ku bantu betu nangwa ku bisho bya bashakulu betu ne,+ bampaine ku bena Loma nobe nekaili+ kufuma ku Yelusalema. 18  Ne abo byo bangipwizheipwizhe,+ bakebelenga kunkasulula, mambo kechi bantaainepo na mambo a kungipayilapo ne.+ 19  Bino Bayudea byo bakaine, nalombele namba mambo ami beatwale kwi Kesala,+ bino kechi na mulanguluko wa kukeba kupamo mambo kisaka kyami ne. 20  O ene mambo o naji kukebela kumonañena nenu ne kwisamba nenu, mambo bankasa uno munyololo na mambo a luketekelo lwa bena Isalela.”+ 21  Abo bamwambijile’mba: “Atweba kechi twatambwilapo makalata kufuma ku Yudea pa mambo a obewa ne, kabiji mu balongo bafumako, kafwako nangwa umo witubuulapo nangwa kwamba kyatama pe obewa ne. 22  Bino twalanguluka’mba kyawama kumvwa milanguluko yobe, mambo twayuka’mba buno bupopweshi+ bubena kunenwa bibi konse konse.”+ 23  Banengezhezhe juba jimo ja kwisamba nanji, kabiji bakonkene bavula mu nzubo mo afikijile. Kufuma lukelo kufika mabanga, aye wibalumbulwijile mambo kupichila mu kushimuna bulongo mambo a Bufumu bwa Lesa, kuba’mba ebetabishe pe Yesu+ kwingijisha Mizhilo ya Mosesa+ ne byaawile Bangauzhi.+ 24  Bamo batendekele kwitabila bintu byo aambilenga; bakwabo kechi bebitabijile ne. 25  Na mambo a kuba baabenejilemo, batendekele kupalañana, kabiji Paulo waambile bino byambo bya kuba’mba: “Mupashi wazhila waambile kupichila mwi ngauzhi Isaya ku bashakulu benu, 26  amba, ‘Yanga ku bano bantu ne kwamba’mba: “Kumvwa mukomvwa, bino kechi mukakwatakanya ne, kabiji kutala mukatala bino kechi mukamona ne.+ 27  Mambo michima ya bano bantu yakosa, kabiji bomvwa na matwi abo, bino kechi batako muchima ne, kabiji bazhinzhibala, kuba’mba babule kumona na meso abo ne kumvwa na matwi abo ne kukwatakanya na michima yabo ne kubwela kuba’mba nebabuke ne.”’+ 28  Onkao mambo, umvwishai kino kuba’mba, luno lupulukilo lufuma kwi Lesa belutwala ku bisaka bya bantu;+ ne abo bakelumvwa.”+ 29  *—— 30  Onkao mambo, waikelenga konkakwa myaka ibiji ituntulu mu nzubo yo asonkelanga,+ kabiji watambwilanga bulongo bonse baiyanga kwi aye, 31  saka ebasapwila pa Bufumu bwa Lesa ne kwibafunjisha bintu byaamba pe Nkambo Yesu Kilishitu saka akasuluka pa kwamba,*+ kwa kubula wa kumukanya.

Tubyambo twa munshi

Nangwa’mba “bangikazhi.”
Nangwa’mba “lusa lumwesha bantu.”
Kyambo kya Kingiliki kya Dike, kampe kilumbulula lesa wa mukazhi washinkanyanga nangwa bunchibamambo bwaoloka bubula kumweka.
Nangwa’mba “kuchinchika bingi.”