Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Byubilo 19:1-41

BIJI MU BUKU

  • Paulo mu Efisesa; bamo bebabatizha jibiji (1-7)

  • Kufunjisha kwa kwa Paulo (8-10)

  • Waingila bulongo nangwa kya kuba bantu bapopwelanga bandemona (11-20)

  • Kiwowo mu Efisesa (21-41)

19  Kimye Apolosa+ kyo akijinga mu Kolinda, Paulo wapichilenga mu mapunzha a mu kibunji kya Asha ne kufika ku Efisesa.+ Kabiji wataaineko baana ba bwanga  ne kwibepuzha’mba: “Nanchi mwatambwile mupashi wazhila kimye kyo mwaitabijile nyi?”+ Abo bamukumbwile’mba: “Tukyangye kumvwapo amba kuji mupashi wazhila.”  Onkao mambo, wibepwizhe’mba: “Nanchi mwabatizhiwe mu ka?” Abo bamukumbwile’mba: “Mu lubatizhilo lwa kwa Yoano.”+  Paulo waambile’mba: “Lubatizhilo lwabatizhanga Yoano lwajinga kiyukilo kya kulapila,+ saka abuula bantu kwitabila mu yewa wamulondejilenga,+ ko kuba’mba mwi Yesu.”  Byo baumvwine kino, babatizhiwe mu jizhina ja Nkambo Yesu.  Paulo byo ebatentekele maboko, mupashi wazhila wibekijile,+ kabiji batendekele kwamba mu milaka ingi ne kwaula.+  Bonse pamo bajinga nobe banabalume 12.  Byo atwelelenga mu nshinagoga,+ pa bañondo basatu waambilenga na kuchinchika ne kwamba majashi ne kwisamba nabo saka ebetabisha pa mambo a Bufumu bwa Lesa.+  Bino bamo byo bakaine kwitabila,* ne kwamba byatama ku jibumba pa mambo a Jishinda,+ aye wafumineko kwi abo+ ne kusenda baana ba bwanga, kabiji pa juba pa juba waambilenga majashi mu kibamba kikatampe kya sukulu wa Tilanusa. 10  Waubile kino pa myaka ibiji, kya kuba bonse baikelenga mu kibunji kya Asha baumvwine mambo a Nkambo, Bayudea ne Bangiliki. 11  Kabiji Lesa waubilenga mingilo ya kukumya kupichila mwi Paulo,+ 12  kya kuba bantu basendelenga bisapi ne maapolonyi byakunkwilenga Paulo ne kwibitwala ku bantu bakolelwenga+ ne bikola byabo byapwilenga, kabiji mipashi yatama nayo yalupukilengamo.+ 13  Bino Bayudea bamo bapitañananga na kupanga bandemona nabo baesekele kwingijisha jizhina ja Nkambo Yesu ku boba bajinga na mipashi yatama; baambilenga’mba: “Nemukambizha mwi Yesu, Paulo ye asapwilapo.”+ 14  Kwajinga baana ba balume batanu na babiji ba kwa Sekeba ñanga mukatampe Muyudea baubilenga bino. 15  Bino mupashi watama wibepwizhe’mba: “Yesu namuyuka+ kabiji Paulo naye namuyuka;+ bino anweba yenu bañanyi?” 16  Ponkapo uno muntu wajinga na mupashi watama wibavundumukijile ne kwibashinda bonse, kya kuba banyemenemo mu yoya nzubo matakotu kabiji bebakozhezhe. 17  Kino kyayukanyikilwe ku bonse, ku Bayudea ne ku Bangiliki baikalanga mu Efisesa; ne bonse baubile bingi moyo ne jizhina ja Nkambo Yesu jatumbalelenga. 18  Kabiji aba bonse baitabijile baishilenga na kusolola ne kwamba patoka bintu byatama byo baubanga. 19  Bantu bavula baubanga bya buñanga bakonkenye pamo mabuku abo ne kwiasoka bonse saka bamonako.+ Kabiji babajile mali akonsheshe kupotwa ano mabuku, ne ano mali a siliva afikile 50,000. 20  Onkao mambo, na bulume byambo bya Yehoba* byayilenga na kukumbana ne kushinda byashinjilenga.+ 21  Bino bintu byo byaubiwe, Paulo wafuukwilepo kuba’mba inge wapita mu Makedonya+ ne Akaya, ukaya ku Yelusalema.+ Waambile’mba: “Inge nkafike kokwa, nafwainwa kuya ne ku Loma.”+ 22  Onkao mambo, watumineko ku Makedonya bantu babiji bamukwashishenga, Timoti+ ne Elasatusa,+ bino aye wakikajileko kimye kicheche mu kibunji kya Asha. 23  Pa kyonkakya kimye kwabuukile lupata lukatampe+ pa mambo a Jishinda.+ 24  Mambo muntu wa jizhina ja Demeteliusa sendwe wa siliva walenganga tumazubo twa siliva twa kwa Atemesa, wanonkeshe basendwe bavula.+ 25  Wibakonkenye pamo ne bakwabo balenganga bino bintu ne kwibambila’mba: “Anweba bakwetu, mwayukishatu kuba’mba mu buno busulu mo mo tumwena mali. 26  Kabiji mwamona ne kumvwa uno Paulo byo aitabisha bantu bavula mu Efisesa+ ne monse mu kibunji kya Asha, ne kwibalulwila ku lufunjisho lukwabo saka amba’mba balesa balengwa na maboko kechi bo balesa ne.+ 27  Kabiji kintu kyatamako ke kya kuba’mba, busulu bwetu kechi bo bonka busakonaikatu ne, bino ne nzubo ya lesa wa mukazhi mukatampe aye Atemesa nayo ikekala ke yatu, ne lukumo lwa Atemesa ye bapopwela ba mu kibunji kyonse kya Asha ne ba pano pa ntanda ponse, lukapwa.” 28  Bantu byo baumvwine kino, bazhingijile bingi batendeka ne kubijika’mba: “Atemesa wa bena Efisesa ye mukatampe!” 29  Onkao mambo, mu muzhi mwabuukile kiwowo, kabiji bonse banyemejile mu nzubo ya makayo, saka batajangizha bena Makedonya abo ba Ngayusa ne Alisatakusa+ baendelanga pamo ne Paulo. 30  Pakuba Paulo wakebeshe bingi kutwela mukachi mwajinga bantu, bino baana ba bwanga bamukainye. 31  Kabiji bakulumpe banengezhanga bijiilo ne bisela bajinga balunda nanji, bamutumijile muluwe ne kumusashijila’mba kange abike bumi bwanji mu kizumba, ne kuya mu nzubo ya makayo ne. 32  Bamo babijikilenga kintu kimo, bakwabo nabo baambilenga kintu kikwabo; kabiji jibumba javulañene ne bavula kechi bayukile ene mambo o bakonkenejile pamo ne. 33  Onkao mambo, bamulupwilemo Alekesanda mu jibumba, Bayudea saka bamushindaika, kabiji Alekesanda wasuntwile kuboko kuba’mba eambile mwine ku bantu. 34  Bino byo bamuyukile’mba Muyudea, bonse babijikilenga pa maola abiji amba: “Atemesa wa bena Efisesa ye mukatampe!” 35  Kinemanga wa muzhi byo azhindamikilepo bantu, waambile’mba: “Anweba bena Efisesa, ñanyi muntu wabula kuyuka’mba muzhi wa bena Efisesa ye ulama nzubo ya kwa Atemesa mukatampe kabiji kipashañano kyaponene mwiulu? 36  Byo kiji kuba’mba bino bintu kechi byakonsha kulengululwa ne, akitekanyai, kuba kanswatu ne. 37  Mambo anweba mwaleta bano bantu kuno babula batupondo ba mazubo azhila kabiji babula kunena lesa wetu wa mukazhi. 38  Onkao mambo, umvwe Demeteliusa+ ne basendwe bo aji nabo babena kupamo mambo bano bantu pa kintu kyo bayuka, bije ne bakulumpe* ba byalo ba kuchiba ano mambo, ko baji; balekai beye bepemo mambo abo bene na bene. 39  Bino umvwe mubena kukeba kintu kikwabo, bakekichiba ku kije kikalako kimye kyonse. 40  Kine baketupamo mambo a bunsatuki pa kino kintu kyamweka lelo, mambo bishinka tufwabyo bya kwamba pa ene mambo o kwaikela kino kiwowo.” 41  Byo apwishishe kwamba bino bintu, wapalañenye jibumba.

Tubyambo twa munshi

Nangwa’mba “bakoseshe michima ne kubula kwitabila.”
Uno mukulumpe wajinga kitumbafumu wa kibunji mwina Loma. Monai Mutanchi.