Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Byubilo 16:1-40

BIJI MU BUKU

  • Paulo wasala Timoti (1-5)

  • Kimwesho kya mwina Makedonya (6-10)

  • Kwitabila kwa Lidiya mu Filipai (11-15)

  • Paulo ne Silasa bebakasa (16-24)

  • Muota ne ba mu nzubo yanji babatizhiwa (25-34)

  • Paulo walomba kumulekelako mambo (35-40)

16  Paulo wafikile mu Delebe ne mu Lisitila.+ Kabiji mwajinga ne mwana wa bwanga umo wa jizhina ja Timoti,+ mwana wa mwanamukazhi Muyudea waitabijile, bino shanji wajinga Mungiliki,  kabiji bamutakaikanga bingi Timoti ku balongo ba mu Lisitila ne mu Ikonyuma.  Paulo wakebeshe bingi kwendanga ne Timoti, kabiji wamusendele ne kumutwala ku mukanda mambo Bayudea bajinga mu oa mapunzha+ bayukile’mba shanji wajinga Mungiliki.  Byo bapichilenga mu mizhi, bapainenga mizhilo yafumine ku batumwa ne ku bakulumpe mu kipwilo bajinga mu Yelusalema kuba’mba beilamenga.+  Onkao mambo, bipwilo byakoselenga mu lwitabilo ne bantu baitabijile bavujijilengako pa juba pa juba.  Kabiji bakapichile mu Filigya ne mu kyalo kya Ngalatiya,+ mambo mupashi wazhila wibakainye kuya na kusapwila mambo a Lesa mu kibunji kya Asha.  Kabiji byo bafikile mu Misha, bakebeshe bingi kuya ku Bitinya,+ bino Yesu kupichila mu mupashi wazhila kechi wibaswishishe ne.  Onkao mambo, bapichijile* ku Misha ne kukafika ku Toloasa.  Kabiji bufuku Paulo wamwene kimwesho—muntu umo mwina Makedonya waimene saka amusashijila’mba: “Abukilai kuno ku Makedonya, mwitukwashe.” 10  Byo amwenetu kino kimwesho, twinengezhezhe kuya ku Makedonya mambo twayukile’mba Lesa witutuma na kwibasapwila mambo awama. 11  Onkao mambo, twafumine mu Toloasa na bwato ne kuya ku Samotolase kwa kubula kwimanapo pakachi, bino pa juba jalondejilepo twakafikile ku Neapolisa; 12  kabiji kufuma kokwa twayile ku Filipai,+ muzhi wa bena Loma, muzhi mukatampe wa mu nkambi ya Makedonya. Twaikelemo moba amo mu uno muzhi. 13  Kabiji pa juba ja Sabado, twayile pangye ya muzhi ne kwikala kwipi na mukola, ko twalangulukilenga’mba ko kuji mpunzha ya kulombelako, kabiji twaikele ne kutatula kwibasapwila banabakazhi bakonkene konka. 14  Kabiji mwanamukazhi umo wa jizhina ja Lidiya, mupoteshi wa bisapi byachiluluka waikalanga mu muzhi wa Tiyatila+ kabiji wapopwelanga Lesa, watelekelenga, ne Yehoba* wamushinkwile muchima kuba’mba omvwishe bintu byaambilenga Paulo. 15  Ponkapo aye ne ba mu nzubo yanji byo babatizhiwe,+ witusashijile’mba: “Umvwe mwammona’mba nemuntu wa kishinka kwi Yehoba,* iyai mwikale ne amiwa mu nzubo yami.” Aye wakoselepotu poso ne byo twaikele. 16  Kabiji byo twayilenga ku mpunzha ya kulombelako, betusambakene ku nsongwakazhi wa mwingilo wajinga na mupashi watama, ndemona wa lubuko.+ Wamwenanga nkambo yanji mali avula kupichila mu kwambila jimo bikamweka kulutwe. 17  Uno nsongwakazhi walondejilenga Paulo ne atweba saka abijika’mba: “Bano banabalume ke bakalume ba Lesa Mwine Wakila,+ kabiji babena kwimubuula jishinda ja lupulukilo.” 18  Waubilenga kino pa moba avula. Ponkapo Paulo kyamufichile ku muchima ne kwambila mupashi watama amba: “Nakukambizha mu jizhina ja Yesu Kilishitu namba, lupukamo mwi aye.” Kabiji pa kyonkakya kimye, walupukilemo.+ 19  Bankambo yanji byo bamwene’mba, jishinda jo banonkelangamo japwa,+ bakwachile Paulo ne Silasa ne kwibatajangizha pa kwibatwala pa kisankanyi ku bakulumpe.+ 20  Byo bebatwajile ku banchibamambo, baambile’mba: “Bano bantu babena kuleta bingi makatazho mu muzhi wetu.+ Bano ke Bayudea, 21  kabiji babena kufunjisha bisho byo twafwainwa kubula kuba nangwa kulondela, mambo atweba twi bena Loma.” 22  Ne jibumba jibavundumukijile, kabiji banchibamambo bakambizhe’mba bebatabawile bivwalo byabo ne kuba’mba bebazhipaule na tumama.+ 23  Byo bebapumine bipumo byavula, bebatayile mu kaleya ne kukambizha muota kwibalama kuchina’mba bakanyema.+ 24  Na mambo a uno mukambizho, wibatayile mu kaleya ka mukachi ne kwibakula maulu mu bikulu.* 25  Bino pakachi ka bufuku, Paulo ne Silasa balombelenga ne kutota Lesa na nyimbo,+ ne bakaili bebatelekelenga. 26  Ponkapotu kwaubiwe kitentanshi kikatampe, kya kuba ne bitendekesho bya kaleya byasunkene. Kabiji binzhilo byonse byashinkukile ne minyololo yo bebakashile bonse yakasulukileko.+ 27  Muota byo abuukile ne kumona’mba binzhilo byonse bya kaleya byashinkuka, wasomwene mpoko keasake kwiipaya mwine, mambo walangulukile’mba bakaili banyema.+ 28  Bino Paulo wabijikile’mba: “Kange wiube kyatama ne, mambo atweba bonse mo tuji!” 29  Muota walombele kumupa masoko a mujilo ne kutwela watwelele monka, saka azakama na moyo ne kufukama kwi Paulo ne Silasa. 30  Kepo ebalupwile pangye ne kwibashikisha’mba: “Mwane, nafwainwa kuba byepi pa kuba’mba nkapuluke?” 31  Abo bamukumbwile’mba: “Itabila mwi Nkambo Yesu, kabiji ukapuluka pamo ne ba mu nzubo yobe.”+ 32  Kabiji bamusapwijile byambo bya Yehoba* pamo ne bonse ba mu nzubo yanji. 33  Bonkabwa bufuku, wibasendele ne kukebovwa pa bilonda byabo. Kepo aye ne kisemi kyanji kyonse babatizhiwe ponkapotu.+ 34  Kabiji wibatwajile ku nzubo yanji ne kwibanengezhezha kajo, ne aye wasekejile bingi pamo na bonse ba mu nzubo yanji kuba’mba pano waitabila mwi Lesa. 35  Byo bwakile lukelo, banchibamambo batumine bakapaso amba: “Bakasululai bano bantu.” 36  Ponkapo muota wabujile Paulo bino byambo amba: “Banchibamambo batuma banabalume kuba’mba anweba babiji bemukasulule. Onkao mambo, lupukai muyenga mu mutende.” 37  Bino Paulo wibambijile’mba: “Betupumine pa meso a bantu kwa kubula mambo,* nangwa kya kuba twi bena Loma+ kabiji betutayile mu kaleya. Pano babena kukeba kwitufumyamo byepi ku mbaji? Abyo ne! Balekai bene beye na kwitulupulamo.” 38  Bakapaso bakabuujile banchibamambo bino bintu. Banchibamambo baubile bingi moyo byo baumvwine’mba bano bantu bena Loma.+ 39  Ponkapo baishile ne kwibasashijila, kabiji byo bebalupwilemo, bebambijile kufumamo mu muzhi. 40  Byo balupukilemo mu kaleya, bayile ku nzubo ya kwa Lidiya; kabiji byo bamwene balongo, bebatundaikile+ ne kufumako.

Tubyambo twa munshi

Nangwa’mba “bapichile mu.”
Jipulanga jiji na meso mo bakulanga muntu pa kumukabisha.
Nangwa’mba “kwa kubula kwitutotolwesha.”