Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Byambo bya Maana 18:1-24

BIJI MU BUKU

  • Yense wipaatula ku bakwabo ukebatu kuba byo asaka kabiji kechi uji na maana ne (1)

  • Jizhina ja Yehoba kyo kyamba kyakosa (10)

  • Bunonshi ke luzhikijilo lwa kufwanyikizhatu (11)

  • Maana aji mu kuteleka ku mbaji yonse ibiji (17)

  • Mulunda wa kishinka wakila ne mulongo (24)

18  Yense wipaatula ku bakwabo ukebatu kuba bisaka muchima wanji;Ukana* maana onse alumbuluka.   Muntu wakosama kechi usekela mu kwikala na milangwe ne;Aye ukebatu kusolola biji mu muchima wanji.+   Muntu mubi inge waiya, ne kulengululwa nako kumulondela,Kabiji kubula munema kwishila pamo na bumvu.+   Byambo bya muntu biji nobe mema aji mwazhika.+ Nsulo ya maana iji nobe kakola kapita.   Kechi kyawama kuba misalululo ku muntu mubi+Nangwa kubula kuchibila muntu waoloka mambo bulongo ne.+   Ñambilo ya muntu wakosama ileta lutobo,+Ne kanwa kanji kalobela mutwe.+   Kanwa ka muntu wakosama kamulengela konaika,+Ne byambo byanji bikala ke kitewa kya bumi* bwanji.   Byambo bya wa luntepentepe biji nobe kajo kawama;*+Kabiji bebimina byaya ne mu kifu.+   Nkope yense,Ye mulongo wa muntu uleta lonaiko.+ 10  Jizhina ja Yehoba kyo kyamba kyakosa.+ Mo munyemena muntu waoloka kabiji uzhikijilwa.*+ 11  Bunonshi bwa nonshi ye muzhi wanji wakosa;Kabiji ulanguluka’mba yo nsakwa ya kumuzhikijila.+ 12  Muchima wa muntu wilundumika umutwala ku bya malwa,+Pakuba awa wipelula bakamunemeka.+ 13  Muntu inge wakumbula saka akyangye kumvwa bishinka,Ko kukosama kabiji kilenga bingi bumvu.+ 14  Muchima wa muntu wakonsha kumulengela kuchinchika kimye kyo abena kukolwa,+Bino ñanyi wakonsha kuchinchika inge uji na bulanda?*+ 15  Muchima wa muntu ukwatakanya bintu wikala na maana a kuyuka bintu,+Ne kutwi kwa bantu ba maana kukeba kuyuka bintu. 16  Bupe bwa muntu bumushinkwila jishinda;+Bumulengela kufwenya kwipi na bantu banemekwa. 17  Mutanshi kwamba mambo umweka nobe waoloka,+Posotu mukwabo waiya ne kusolola bishinka pe aye.*+ 18  Kuta bubale kupwisha lutoboNe kwibabanya mu mutende babena kutoboka.+ 19  Mulongo ye bazhingijisha wakatazha kumufwomona, kukila ne muzhi uji na nsakwa yakosa,+Kabiji lutobo lwikala nobe mipingilo ya nsakwa yakosa.+ 20  Muntu wikuta na mambo a byambo* byanji;+Ukamona bintu bifuma mu byambo byo amba. 21  Lujimi uji na bulume bwa kuleta lufu nangwa bumi;+Aba batemwa kumwingijisha bakaja bipangwa byanji.+ 22  Awa wataana mwanamukazhi wawama wataana kintu kyawama,+Kabiji utambula bibusa* kufuma kwi Yehoba.+ 23  Muyanji usashijila pa kwamba,Bino nonshi ukumbula na bukaji. 24  Kuji balunda bakeba kwikozha mulwabo,+Bino kuji mulunda wa kishinka wakila ne mulongo.+

Tubyambo twa munshi

Nangwa’mba “Ulengulula.”
Nangwa’mba “mweo wanji.”
Nangwa’mba “nobe bintu byo bamina na lwiso.”
Mu Kihebelu, “bamubika peulu,” ko kuba’mba, pa kubula kufika, palepa.
Nangwa’mba “kwa kubula luketekelo?”
Nangwa’mba “kumukebakeba.”
Mu Kihebelu, “kanwa kanji.”
Nangwa’mba “bintu byawama.”