Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Bahebelu 4:1-16

BIJI MU BUKU

  • Kizumba kiji mu kubula kutwela mwa kukokolokela mwa Lesa (1-10)

  • Bya kuba pa kutwela mwa kukokolokela mwa Lesa (11-13)

    • Mambo a Lesa o omi (12)

  • Yesu, ñanga mwine mukatampe (14-16)

4  Onkao mambo, mulaye wa kutwela mwa kukokolokela mwanji byo atwajijila, tujimuke kuchina’mba muntu nangwa umo mwi anweba wakakankalwa kufikizha bikebewa pa kutwelamo.+  Mambo ne atweba betusapwijile mambo awama+ byonkatu byo bebasapwijile ne abo; bino mambo o baumvwine kechi ebalengejile kumwenamo byawama ne, mambo kechi bajinga na lwitabilo lwajingapo na boba bakookejile ne.  Atweba tuji na lwitabilo, tutwela mwa kukokolokela, byonkatu byo aambile’mba: “Onkao mambo, nachipile na bukaji namba, ‘Kechi bakatwelamo mwa kukokolokela mwami ne,’”+ nangwa kya kuba mingilo yanji yapwile kufumatu ku ntendekelo ya pano pa ntanda.+  Mu kinembelo kimo, waamba pa juba ja butanu na bubiji amba: “Lesa wakokolokele ku mingilo yanji yonse pa juba ja butanu na bubiji,”+  kabiji wanungilepo amba: “Kechi bakatwelamo mwa kukokolokela mwami ne.”+  Onkao mambo, byo kuji bamo bakatwelamo ne boba bo basapwijile mambo awama patanshi kechi batwelelemo ne, na mambo a kubula kukookela,+  watongwele juba jikwabo byo papichile myaka yavula, mu salamo wa Davida amba, “Lelo”; byonka byo kyaambiwa kala amba: “Lelo jino, umvwe anweba mumvwe jiwi janji, kange mukoseshe michima yenu ne.”+  Mambo inge Yoshua+ wibatangijile mwa kukokolokela, Lesa inge kechi watongwele juba jikwabo ne.  Onkao mambo, kuji sabado wa kukokolokelamo bantu ba Lesa.+ 10  Mambo muntu watwela mwa kukokolokela mwa Lesa, wakokoloka ne ku mingilo yanji, byonkatu Lesa byo akokolokele ku mingilo yanji.+ 11  Onkao mambo, twayai twibikisheko kutwela mwa kukokolokela, pa kuba’mba muntu nangwa umo abule kwikala wabula lukookelo byonka byo bajinga abo.+ 12  Mambo, mambo a Lesa o omi kabiji aji bingi na bulume,+ kabiji atwa kukila mpoko yatwa kubiji,+ atwela ne kwabanya mweo* ne mupashi,* kabiji abanya manungi ne mikolokofwa, kabiji ayuka biji milanguluko ne bikeba muchima. 13  Kabiji kafwako kilengwa nangwa kimo kyafyama kwi aye ne,+ bino bintu byonse bijitu patoka kabiji byasololwa kwi yewa ye tukatotololako.+ 14  Onkao mambo, byo tuji na ñanga mwine mukatampe waya kala mwiulu aye Yesu Mwana Lesa,+ twayai tutwajijile kusolola patoka lwitabilo lwetu mwi aye.+ 15  Mambo kechi tuji na ñanga mwine mukatampe ubula kwitumvwina lusa pa kubula kukosa kwetu ne,+ bino tuji na yewa waesekelwe mu meseko onse o tupitamo, bino aye kechi walengelepo mambo ne.+ 16  Onkao mambo, twayai tufwenye kwipi ku jitanda ja lusa lukatampe saka twakasuluka pa kwamba,+ pa kuba’mba betubile kifyele ne lusa lukatampe lwa kwitukwasha pa kimye kyafwainwa.

Tubyambo twa munshi