Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

2 Kolinda 9:1-15

BIJI MU BUKU

  • Kilengela kupana (1-15)

    • Lesa watemwa muntu upana na lusekelo (7)

9  Pa mambo a mwingilo wa kukwasha bazhijikwa,+ kechi nafwainwa ne kwimunembela ne,  mambo nayuka kwipana kwenu ko netotelamo ku bena Makedonya kuba’mba bena Akaya benengezhejile jimo papita ne mwaka umo, kabiji mukoyo wenu watundaika bavula mwi abo.  Bino mbena kutuma balongo pa kuba’mba kwitota kwetu pe anweba kubule kwikala kwatutu mu kino kintu ne kuba’mba mwinengezhe jimo, byonka byo naambile’mba byo byo mukekala.  Mambo umvwe bena Makedonya bakeshile pamo ne amiwa ne kwimutaana’mba kechi mwinengezha ne, atweba—kechi anweba ne—yetu tukomvwinamo bumvu, na mambo a byo twimuketekela.  Onkao mambo, nalanguluka namba kyamfwainwa kutundaika balongo kwishila jimo kwi anweba ne kukonkenya jimo bya bupe byenu byo mwalayile, kuba’mba buno bupe tukebutaane mwibunengezhezha jimo, kabiji kino kikamwesha’mba kechi twimukanjikizhe pa kwibupana ne.  Bino na mambo a kino, awa ukusa bicheche ukanowa bicheche, ne yewa ukusa byavula ukanowa byavula.+  Muntu yense obe monka mo afuukwila mu muchima wanji, kechi apane na bulanda nangwa na mambo a kumukanjikizha ne,+ mambo Lesa watemwa muntu upana na lusekelo.+  Kabiji Lesa wakonsha kwimubila lusa lukatampe kuba’mba mwikale na bintu byonse byo mukeba ne kwikala na bintu byavula bya kwingijilamo mingilo yonse yawama.+  (Monkatu mo kyanembelwa’mba: “Upana bupe bwavula;* wapapo ne bayanji. Bololoke bwanji bukatwajijila myaka ne myaka.”+ 10  Aye upana nkunwa yavula ku njimi ne kajo ka kuja, ukemupa nkunwa yavula ya kubyala kabiji ukemukwasha kunowa bintu byavula mu mingilo yenu ya bololoke.) 11  Bemupesha mu bintu byonse kuba’mba mupanenga byavula, byonka bilengela bantu kusanchila Lesa kupichila mwi atweba; 12  Mambo kwingila uno mwingilo kechi kwa kukwashatu bazhijikwa+ mu byo bakajilwa ne, bino ne bantu bavula bakamusanchilanga Lesa na mambo a uno mwingilo. 13  Na mambo a kintu kifuma mu uno mwingilo, bantu bamutumbijika Lesa mambo munekenena mambo awama aamba pe Kilishitu o musapwila, ne na mambo a bumpanyi bwenu bwa kupana kwi abo ne ku bonse.+ 14  Kabiji byo bemusashijilako, bamwesha’mba bemutemwa bingi na mambo a lusa lukatampe lwa Lesa luji pe anweba. 15  Tusanchila Lesa na mambo a kya bupe kyanji kya kukankalwa ne mwa kwikilumbulwila.

Tubyambo twa munshi

Nangwa’mba “na muchima yense.”