Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

2 Bamfumu 9:1-37

BIJI MU BUKU

  • Yehu bamushinga manyi kwikala mfumu wa Isalela (1-13)

  • Yehu waipaya Yeholama ne Ahaziya (14-29)

  • Yezebeli bamwipaya; bakabwa baja mubiji wanji (30-37)

9  Ngauzhi Elisha waichile umo wa mu jibumba ja bangauzhi ne kumwambila’mba: “Inyinge bivwalo byobe mu lubunda, kabiji upelawizhe kusenda kano kamulondo ka manyi ne kuya ku Lamota-gileada.+  Byo usakufika kokwa, ukebe Yehu+ mwana wa kwa Yehoshafwata, Yehoshafwata mwana wa kwa Nimushi; utwele mo aji ne kumwambila kufuma pa balongo banji ne kumutwala mu kibamba kya mukachi.  Apa bino ushikule kamulondo ka manyi ne kwietulwila pa mutwe wanji ne kwamba’mba, ‘Yehoba waamba’mba: “Nakushinga manyi kuba’mba wikale mfumu wa bena Isalela.”’+ Kabiji ushinkule kinzhilo ne kunyema ponkapotu.”  Byonkabyo, wa mwingilo wa ngauzhi waimene ne kuya ku Lamota-gileada.  Byo afikile, bakulumpe ba nzhita baikele konkakwa. Waambile’mba: “Nji na byambo bya kwimubuula anweba mukulumpe wa nzhita.” Yehu waipwizhe’mba: “Ñanyi pe atweba?” Waambile’mba: “Anweba yenka, mukulumpe wa nzhita.”  Onkao mambo, Yehu waimene ne kutwela mu nzubo; wa mwingilo wamwitulwijile manyi pa mutwe ne kumwambila’mba, “Yehoba Lesa wa Isalela waamba’mba: ‘Nakushinga manyi kuba’mba wikale mfumu wa bantu ba Yehoba, bena Isalela.+  Wafwainwa kutapa ba mu nzubo ya kwa Ahaba nkambo yobe, kabiji nkashinkanya na mambo a mashi a bakalume bami bangauzhi ne na mambo a mashi a bakalume bonse ba Yehoba bo baipayile kwi Yezebeli.+  Kabiji bonse ba mu nzubo ya kwa Ahaba bakavila; kabiji nkonauna banabalume* bonse ba kwa Ahaba, kuvwangakotu ne babula bakwibakwasha ne babula kukosa baji mu Isalela.+  Kabiji nkalengela ba mu nzubo ya kwa Ahaba kwikala nobe ba mu nzubo ya kwa Yeloboma+ mwana wa kwa Nebati ne kwikala nobe ba mu nzubo ya kwa Baasha+ mwana wa kwa Ahiya. 10  Pakuba Yezebeli, bakabwa bakamujiila mu mpunzha iji mu Yezelela,+ kabiji kafwako ukamuzhiika ne.’” Ponkapo washinkwile kinzhilo ne kunyema.+ 11  Yehu byo abwelele kwajinga bakalume ba nkambo yanji, bamwipwizhe’mba: “Bintu bijitu bulongo nyi? Mambo ka awa mukonye o akwishila kwi obewa?” Aye wibakumbwile’mba: “Anweba mwamuyuka awa muntu ne ñambilo yanji byo iji.” 12  Bino abo baambile’mba: “Kechi ubena kwamba bya kine ne! Tubuule.” Kepo aambile’mba: “Abino byo byo aji kumbuula, kabiji waji kwamba’mba, ‘Yehoba waamba’mba: “Nakushinga manyi kuba’mba wikale mfumu wa bena Isalela.”’”+ 13  Ponkapo bonse pa muntu pa muntu bashikwile bivwalo byabo ne kwibyanshika panshi po anyanchile,+ kabiji bavuminye lusengo ne kwamba’mba: “Yehu waikala ke mfumu!”+ 14  Kepo Yehu+ mwana wa kwa Yehoshafwata, Yehoshafwata mwana wa kwa Nimushi, amwalukijilemo Yeholama. Yeholama wasopelenga Lamota-gileada+ pamo na bena Isalela bonse, na mambo a kwa Hazela Mfumu+ wa Silya. 15  Kabiji Mfumu Yeholama wabwelele ku Yezelela+ kuba’mba bilonda bikapwe byo bamukozhezhe ku bena Silya kimye kyo alwilenga ne Hazela Mfumu wa Silya.+ Kepo Yehu aambile’mba: “Inge mwaswa,* kange muleke muntu nangwa umo afume mu muzhi ne kuya na kubulañana kino mu Yezelela ne.” 16  Kepo Yehu akanjijile mu kalaki wanji ne kuya ku Yezelela, mambo Yeholama walaajile konkakwa saka bamukozha, kabiji Ahaziya Mfumu wa Yuda wayile na kupempula Yeholama. 17  Kasopa byo aimene pa kyamba mu Yezelela, wamwene kipanyi kya banabalume ba kwa Yehu byo kyaishilenga. Ponkapo waambile’mba: “Namona kipanyi kya banabalume.” Yeholama waambile’mba: “Ambila mwanamulume wenda pa mbili umutume kuya na kwibatundaila, kabiji ebepuzhe’mba, ‘Nanchi mwaiya mu mutende nyi?’” 18  Onkao mambo, muntu wenda pa mbili wayile na kumutundaila ne kumwambila’mba: “Mfumu waamba’mba, ‘Nanchi mwaiya mu mutende nyi?’” Bino Yehu wamukumbwile’mba: “Nanchi ‘mutende’ wamuyuka nyi? Ndondelenga!” Kabiji awa kasopa wabulañene’mba: “Awa muluwe waji kwibataana, bino kechi wabwela ne.” 19  Kabiji watumine muntu wa bubiji wenda pa mbili, naye wayile na kwibabuula’mba: “Mfumu waamba’mba, ‘Nanchi mwaiya mu mutende nyi?’” Bino Yehu waambile’mba: “Nanchi ‘mutende’ wamuyuka nyi? Ndondelenga!” 20  Kepo awa kasopa aambile’mba: “Waji kufika kwi abo, bino kechi wabwela ne, kabiji ñendeshesho yanji ubena kwendesha nobe Yehu munkana* wa kwa Nimushi, mambo aye wendeshatu nobe mukonye.” 21  Yeholama waambile’mba: “Nengezhai kalaki!” Byonkabyo, banengezhezhe kalaki wanji wa nkondo kabiji Yeholama Mfumu wa Isalela ne Ahaziya Mfumu+ wa Yuda bonse bakanjijile awu mu kalaki wanji awu mu kalaki wanji ne kuya na kumutundaila Yehu. Bamutaaine ku bujimi bwa kwa Nabota+ mwina Yezelela. 22  Yeholama byo amwenetu Yehu, wamwambijile’mba: “Yehu, nanchi waiya mu mutende nyi?” Bino aye waambile’mba: “Kwakonsha kwikala byepi mutende saka kuji bupite bwa kwa inobe Yezebeli+ ne bulozhi bwanji bwavula?”+ 23  Ponkapo Yeholama wazhalulwile kalaki wanji amba anyeme ne kwambila Ahaziya amba: “Ahaziya, betubepa!” 24  Yehu washikwile buta bwanji bwa mukanda ne kwasa Yeholama pasambakena bipuzhi, kabiji muketo wapulankene mu muchima, ne aye waponejile mu kalaki wanji wa nkondo. 25  Kepo aambijile Bidika mukulumpe wanji wa nzhita amba: “Mushikule umutaye mu bujimi bwa kwa Nabota mwina Yezelela.+ Vuluka, amiwa ne obewa twaendelenga* mu kalaki kunyuma ya shanji aye Ahaba kimye Yehoba kyo aambile bino byambo pe aye amba:+ 26  ‘“Byonkatu byo namwene mashi a kwa Nabota+ ne mashi a baana banji ba balume kesha,” byo byaamba Yehoba, “Nkashinkanya+ ne obewa monka mu ino mpunzha,” byo byaamba Yehoba.’ Pano mushikule umutaye mu ino mpunzha, monka mwayila byambo bya Yehoba.”+ 27  Ahaziya Mfumu+ wa Yuda byo amwene byaubiwenga, wanyemejile mu jishinda jaya ku nzubo ya mashamba. (Kepo Yehu amupupijile ne kwamba’mba: “Mutapai naye!” Byonkabyo, bamutapijile mu kalaki wanji byo ayilenga ku Gula, uji kwipi na Ibeleama.+ Bino watwajijile kunyema kufika ne ku Megido kabiji wafwijile konkakwa. 28  Bakalume banji bamusendejile mu kalaki ne kumutwala ku Yelusalema, kabiji bamuzhiikile mu kilende kyanji konka ko bazhiikile bashakulu banji mu Muzhi wa Davida.+ 29  Mwajinga mu mwaka wa bu 11 wa bukalama bwa kwa Yeholama mwana wa kwa Ahaba, Ahaziya+ mo aikele mfumu wa Yuda.) 30  Yehu byo afikile ku Yezelela,+ Yezebeli+ waumvwine kino. Onkao mambo, wishingile bifiita* mu meso ne kwiwamisha bulongo ku mutwe, kabiji watajilenga munshi pa kipenze. 31  Yehu byo atwelele pa kibelo, Yezebeli waambile’mba: “Bintu byamwendejile byepi Zimuli waipayile nkambo yanji?”+ 32  Byo atajile peulu pa kipenze, waipwizhe’mba: “Ñanyi uji kwi amiwa? Nanchi ñanyi?”+ Ponkapo bakapaso babiji nangwa basatu bamusumbijile. 33  Yehu waambile’mba: “Mutayai panshi!” Onkao mambo, bamutayile panshi; ne mashi anji amo asampukijile ku lubumbulu ne ku bambili; kabiji wamunyantawile. 34  Kepo atwelele ne kuja ne kutoma. Kabiji waambile’mba: “Muyuke byo musakuba na uno mwanamukazhi wafingwa ne kumuzhiika. Mambo ye mwana mfumu.”+ 35  Bino byo bayile’mba bakamuzhiike, kafwako byo bataainepo ne, pajingatu kiboyongolo kya mutwe wanji, maulu ne maboko anji.+ 36  Byo babwelele na kumubuula, aye waambile’mba: “Kino kyafikizha byambo bya Yehoba+ byo aambile kupichila mwi kalume wanji Elaija mwina Tishibe amba, ‘Mu mpunzha iji mu Yezelela, bakabwa mo mo bakajiila mubiji wa kwa Yezebeli.+ 37  Kabiji mubiji wa kwa Yezebeli ukekala nobe mbolezha mu bujimi buji mu mpunzha iji mu Yezelela, pa kuba’mba bakabule kwamba’mba: “Uno ye Yezebeli.”’”

Tubyambo twa munshi

Mu Kihebelu, “yense usukwila ku lubumbulu.” Kyambo kya Kihebelu kya kulengulula banabalume.
Nangwa’mba “mweo wenu waswa.”
Mu Kihebelu, “mwana wa mulume.”
Mu Kihebelu, “twaendelenga bonse.”
Nangwa’mba “washingile bifita ku nkope.”