Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

2 Bamfumu 5:1-27

BIJI MU BUKU

  • Nemani bamubuka mbumba kwi Elisha (1-19)

  • Gehazi wa lwiso bamulengela kwikala na mbumba (20-27)

5  Nemani mukulumpe wa nzhita ya mfumu wa bena Silya, wajinga muntu ye banemekele bingi kwi nkambo yanji, mambo Yehoba walengejile bena Silya kushinda* kupichila mwi aye. Wajinga kilobo, nangwa kya kuba wajinga na mbumba.*  Juba jimo bena Silya byo bashindañene, basendele nsongwakazhi mu buzha kufuma mu kyalo kya bena Isalela kabiji waikele wa mwingilo wa kwa muka Nemani.  Uno nsongwakazhi waambijile nkambo yanji wa mukazhi amba: “Nanchi bankambo inge baya kwi ngauzhi+ uji mu Samaliya! Aye wakonsha kwibabuka mbumba yabo.”+  Onkao mambo, wayile* na kubuula nkambo yanji byaambile nsongwakazhi wafumine ku Isalela.  Kepo mfumu wa ku Silya aambile’mba: “Yanga! Ne amiwa nsakutuma nkalata kwi mfumu wa Isalela.” Byonkabyo, wayile saka asenda matalenta* a siliva jikumi, ne mashekele a ngolode 6,000, ne bivwalo jikumi.  Wafikizhe nkalata kwi mfumu wa bena Isalela. Ino nkalata yaambile’mba: “Natuma Nemani kalume wami pamo na ino nkalata kwi anweba namba mumubuke mbumba yanji.”  Aku mfumu wa Isalela utangatu ino nkalata, watabwile bivwalo byanji ne kwamba’mba: “Nanchi yami Lesa, wakonsha kwipaya ne kulengela muntu kwikala na bumi nyi?+ Mambo aye watuma uno muntu, ne kuñambila’mba namubuke mbumba yanji! Mwimwena anwe bene kuba’mba ubena kukeba kutoboka ne amiwa.”  Pakuba Elisha muntu wa Lesa wa kine byo aumvwine’mba mfumu wa Isalela watabula bivwalo byanji, ponkapo watumine mawi kwi mfumu amba: “Mambo ka o mwaji kutabwila bivwalo byenu? Napopwela muswishai eye kwi amiwa kuba’mba ayuke’mba mu Isalela muji ngauzhi.”+  Byonkabyo, Nemani waishile na bambili banji ne makalaki anji a nkondo ne kwimana pa kibelo kya nzubo ya kwa Elisha. 10  Nangwa byonkabyo, Elisha watumine muluwe wa kumubuula’mba: “Yanga ukowe bimye bitanu na bibiji+ mu Yodano,+ ne mubiji obe usakwikala bulongo, kabiji ne obewa usakwikala watoka.” 11  Ponkapo Nemani wazhingijile bingi watendeka ne kubwela, ne kwamba’mba: “Amiwa nakulangulukanga namba, ‘Aye usakwiya kwi amiwa ne kwimana pano ne kwita pa jizhina ja Yehoba Lesa wanji, ne kupepezha kuboko kwanji pa mbumba kuba’mba eibuke.’ 12  Nanchi mikola ya mu Damasakasa,+ Abana ne Falapa, kechi yawama kukila mema onse a mu Isalela nenyi? Nanchi kechi nakonsha kowa mu ino mikola ne kwikala watoka nenyi?” Ponkapo waalulukile ne kufumapo na bukaji. 13  Bakalume banji baishile kwi aye ne kumushikisha’mba: “Tata, nanchi ngauzhi inge waji kwimwambila kuba kintu kikatampe, inge kechi mwaji kwikyuba nenyi? Pano kiji byepi byo emwambilatu’mba, ‘Kowai mubukwe’?” 14  Ponkapo wakunkulukile ne kuketaya* mu Yodano bimye bitanu na bibiji, monka mwayijile byambo bya muntu wa Lesa wa kine.+ Kabiji mubiji wanji wabweleletu nobe mubiji wa mwanyike,+ ne aye wabukilwe.+ 15  Kepo abwelele ku muntu wa Lesa wa kine,+ pamo na bantu bonse bo ajinga nabo,* kabiji waimene ko aji ne kwamba’mba: “Pano nayuka namba kafwako Lesa mukwabo pano pa ntanda ponse kanatu mu Isalela.+ Pano napopwela, tambulai bupe* bwafuma kwi amiwa kalume wenu.” 16  Nangwa byonkabyo, Elisha waambile’mba: “Byonkatu Yehoba byo aji na bumi, yenka ye ñingijila,* kechi nsakwibutambula ne.”+ Aye wamukanjikizhenga amba atambule, pakuba aye wakaine. 17  Kepo Nemani aambile’mba: “Inge mwakana, napopwela amiwa kalume wenu mumpe maloba a mu kino kyalo akonsha kusenda bamyule babiji, mambo amiwa kalume wenu kechi nkalambulapo mulambo wa kusoka nangwa kitapisho ku balesa bakwabo ne, kanatu kwi Yehoba. 18  Kabiji Yehoba andekeleko mambo amiwa kalume wenu na mambo a kino kintu kimo: Bankambo yami inge batwela mu nzubo ya kwa Limonyi ne kufukama konkakwa, bashakamina ku kuboko kwami, onkao mambo, ne amiwa mfukama mu nzubo ya kwa Limonyi. Umvwe nafukama mu nzubo ya kwa Limonyi, napopwela Yehoba andekeleko mambo amiwa kalume wenu na mambo a kino.” 19  Ponkapo aye wamwambijile’mba: “Yanga mu mutende.” Byo afumineko kwi aye ne kwendako musinso waesakanatu, 20  Gehazi+ kalume wa kwa Elisha muntu wa Lesa wa kine+ walangulukile’mba: ‘Bankambo baswisha uno Nemani mwina Silya+ kuya ne kukana bintu byo aji kuleta. Byonkatu Yehoba byo aji na bumi, nsakumupupila ne kukatambulapo bintu bimo kwi aye.’ 21  Byonkabyo, Gehazi wamupupijile Nemani. Nemani byo amwenetu’mba kuji ubena kumupupila, waikijile mu kalaki wanji ne kubwela na kumutundaila ne kumwambila’mba: “Kutalalanga?” 22  Aye wakumbwile’mba: “Byonse bijitu bulongo. Bankambo bantuma’mba, ‘Umvwai! Kuji bansongwalume babiji baiya lonka luno kwi amiwa bafuma ku kibunji kya mitumba kya Efelaimu ba mu jibumba ja bangauzhi. Mwane mwibapepo talenta umo wa siliva ne bivwalo bibiji.’”+ 23  Nemani waambile’mba: “Mwane batolemo matalenta abiji.” Watwajijile kumwambila,+ ne aye walongele ano matalenta abiji a siliva mu mifuko ibiji, pamo na bivwalo bibiji, ne kwibipana ku bakalume banji babiji, ne abo bebisendele ne kutangilako kulutwe yanji. 24  Byo afikile ku Ofela,* wibitambwile kwi abo ne kwibibika mu nzubo yanji ne kwibaleka bano bantu amba baye. Byo bayiletu, 25  wayile ne kwimana kwi nkambo yanji. Kepo Elisha amushikishe’mba: “Wafuma kwepi Gehazi?” Pakuba aye wamukumbwile’mba: “Amiwa kalume wenu kafwako nangwa kumo ko naji kuya ne.”+ 26  Elisha wamwambijile’mba: “Nanchi muchima wami kechi wajinga ne obewa konkakwa awa muntu byo akwikila mu kalaki wanji ne kukutundaila nenyi? Nanchi kino kyo kimye kya kuswa siliva nangwa bivwalo nangwa majimi a maolivi nangwa majimi a miñanzañanza nangwa mikooko nangwa bañombe nangwa ba mingilo ba balume nangwa ba bakazhi nyi?+ 27  Pano mbumba+ yajinga ne Nemani isakwiya pe obewa ne pa ba mu kisemi kyobe myaka ne myaka.” Ponkapo wafumineko kwi aye saka aji na mbumba, yatoka nobe mabebe.+

Tubyambo twa munshi

Nangwa’mba “kupuluka.”
Nangwa’mba “wajinga na kikola kya pa kikoba.”
Kampe’mba babena kwamba pe Nemani.
Talenta umo waesakana na makilogalamu 34.2. Monai bya Kulumbulula B14.
Nangwa’mba “kuketumpa.”
Mu Kihebelu, “kampu.”
Mu Kihebelu, “mapesho.”
Mu Kihebelu, “yenka ye ñimanako.”
Mpunzha yajinga mu Samaliya, kampe katumbatumba nangwa nsakwa yakosa.