Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

2 Bamfumu 2:1-25

BIJI MU BUKU

  • Elaija bamusenda mu kanzhimbiji (1-18)

    • Elisha watola kivwalo kya kwa Elaija (13, 14)

  • Elisha wabuka mema a mu Yeliko (19-22)

  • Bambeyala baipaya banyike ba balume ba ku Betele (23-25)

2  Yehoba byo ajinga pepi kutwala Elaija+ mwiulu* na kanzhimbiji,+ Elaija ne Elisha+ bafumineko ku Giligala.+  Elaija wamwambijile Elisha amba: “Napopwela shala konka kuno, mambo Yehoba wantuma kuya ku Betele.” Bino Elisha waambile’mba: “Byonkatu Yehoba byo aji na bumi ne anweba byo muji na* bumi, amiwa kechi nsakwimusha ne.” Byonkabyo, bayijile pamo ku Betele.+  Kepo jibumba ja bangauzhi* bajinga mu Betele baishile kwi Elisha ne kumushikisha’mba: “Nanchi kechi mwayuka’mba lelo Yehoba ubena kusenda nkambo yenu, aye ntangi wenu nenyi?”+ Aye wibakumbwile’mba: “Nayuka kala byobyo. Zhindamaipo.”  Kabiji Elaija wamwambijile’mba: “Elisha, napopwela shala konka kuno, mambo Yehoba wantuma kuya ku Yeliko.”+ Bino aye waambile’mba: “Byonkatu Yehoba byo aji na bumi ne anweba byo muji na* bumi, amiwa nkemulondelangatu.” Byonkabyo, bayijile pamo ku Yeliko.  Kepo jibumba ja bangauzhi bajinga mu Yeliko jaishile kwi Elisha ne kumushikisha’mba: “Nanchi kechi mwayuka’mba lelo Yehoba ubena kusenda nkambo yenu, aye ntangi wenu nenyi?” Aye wibakumbwile’mba: “Nayuka kala byobyo. Zhindamaipo.”  Kabiji Elaija wamwambijile’mba: “Napopwela shala konka kuno, mambo Yehoba wantuma kuya ku Yodano.” Bino aye waambile’mba: “Byonkatu Yehoba byo aji na bumi ne anweba byo muji na* bumi, kechi nkemusha ne.” Byonkabyo, bayijile pamo.  Kabiji bangauzhi 50 ba mu jibumba ja bangauzhi nabo bayile ne kukemana palepa byobya saka batalako, bano bonse babiji byo baimene kwipi na Yodano.  Kepo Elaija ashikwile kivwalo kyanji+ ne kwikivunga ne kwikipuma pa mema, kabiji mema efungijile ku kipiko ne ku kilujo, kabiji bonse babiji baabukile pa mushiji wauma.+  Aku babukatu, Elaija waambijile Elisha amba: “Ndombe kintu kyo ukeba’mba nkupe saka bakyangye kumfumya kwi obewa.” Onkao mambo, Elisha waambile’mba: “Napopwela, mpepoi bipimo bibiji*+ bya mupashi wenu.”+ 10  Aye waambile’mba: “Wandomba kintu kyakatazha. Inge ummone byo basakumfumya kwi obewa, kikakumwekela byonkabyo; bino inge ubule kummona, kechi kikamweka ne.” 11  Byo baendejilenga pamo, saka baya na kwisamba, ponkapo kalaki wa mujilo ne bambili ba mujilo+ bapichile pakachi kabo, kabiji kanzhimbiji kamutwajile Elaija mwiulu.*+ 12  Elisha byo amwenenga kino, wajijile’mba: “Tato, tato! Kalaki wa Isalela ne bantu banji benda pa bambili!”+ Byo alekele kumumona, wakwachile bivwalo byanji ne kwibitabula pabiji.+ 13  Kepo atolele kivwalo+ kya kwa Elaija kyaponejile panshi kabiji wabwelelemo ne kukemana kwipi ku kitulu kya Yodano. 14  Kabiji watolele kivwalo kya kwa Elaija kyaponejile panshi ne kwikipuma pa mema ne kwamba’mba: “Kwepi kuji Yehoba, Lesa wa kwa Elaija?” Byo apumine pa mema, mema ejingijile ku kipiko ne ku kilujo, kabiji Elisha waabukile.+ 15  Jibumba ja bangauzhi bajinga mu Yeliko byo bamumwene palepa byobya, baambile’mba: “Mupashi wa kwa Elaija waiya pe Elisha.”+ Byonkabyo, bamutundaijile ne kumufukamina. 16  Bamwambijile’mba: “Atweba bakalume benu tuji na banabalume 50 bakosa. Baswishai baye nakukeba bankambo yenu. Kampe mupashi* wa Yehoba waji kwibashikula ne kwibataya ku bushiya bwa mutumba umo nangwa mu musanza umo.”+ Bino aye wibambijile’mba: “Kange mwibatume ne.” 17  Nangwa byonkabyo, bakoselepotu na kumukanjikizha kya kuba waumvwa ne bumvu, onkao mambo, wibambijile’mba: “Batumai.” Batumine banabalume 50, kabiji bamukebele pa moba asatu, bino kechi bamutaaine ne. 18  Babwelele ko aikajilenga mu Yeliko.+ Kepo ebambijile’mba: “Nanchi kechi nemubuujile namba kange muye nenyi?” 19  Mu kuya kwa moba, bantu ba mu muzhi bamwambijile Elisha amba: “Nkambo mwamona’mba muzhi waikela pawama;+ bino mema atama, ne mushiji naye wakota.”* 20  Ponkapo wibambijile’mba: “Ndetelai nsanyi icheche yakatataka mubikemo ne mukele.” Byonkabyo bamuletejile. 21  Kepo ayile ku nsulo ya mema ne kutayamo mukele+ ne kwamba’mba: “Yehoba waamba’mba, ‘Nawamisha ano mema. Kechi akaletapo jibiji lufu nangwa kubula kusema baana ne.’”* 22  Kabiji mema beawamisha kufikatu ne lelo jino monka mwayijile byambo byaambile Elisha. 23  Wafumine kokwa ne kuya ku Betele. Byo ayilenga mu jishinda, banyike ba balume bamo balupukile mu muzhi ne kutendeka kumuweleleka,+ kabiji bamwambijilenga’mba: “Yanga, obewa muntu wa jibala! Yanga, obewa muntu wa jibala!” 24  Kepo aalulukile ne kwibatala kabiji wibafingile mu jizhina ja Yehoba. Ponkapo bambeyala bakazhi babiji+ bafumine mu jisaka ne kutabaulapo baana 42.+ 25  Watwajijile kuya ku Mutumba wa Kamela,+ kabiji kufuma kokwa wabwelele ku Samaliya.

Tubyambo twa munshi

Nangwa’mba “jiulu.”
Nangwa’mba “mweo wenu byo aji na.”
Kyamweka “baana ba bangauzhi” babena kwimenako sukulu wa bangauzhi nangwa kipamo kya bangauzhi.
Nangwa’mba “mweo wenu uji.”
Nangwa’mba “mweo wenu uji.”
Nangwa’mba “mbaji ibiji ya.”
Nangwa’mba “jiulu.”
Nangwa’mba “mwela.”
Nangwa, “ulengela kupulumuna.”
Nangwa, “kupulumuna.”