Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

1 Samwela 11:1-15

BIJI MU BUKU

  • Saulo washinda bena Amonyi (1-11)

  • Bufumu bwa kwa Saulo bebwitabizha (12-15)

11  Nahashi mwina Amonyi+ waishile ne kwinengezha kulwa na bena Yabeshi+ mu Gileada. Bantu bonse ba mu Yabeshi baambijile Nahashi amba: “Layañanai lulayañano* ne atweba, kabiji tukemwingijilanga.”  Nahashi mwina Amonyi wibambijile’mba: “Nsakulayañana nenu inge mube kino: inge bonse nemusabe meso enu a ku kilujo. Nkooba kino kuba’mba ndengeshe bena Isalela bonse bumvu.”  Bakulumpe ba mu Yabeshi bamukumbwile’mba: “Mwitupe moba atanu na abiji kuba’mba tutume baluwe mu nyaunda yonse ya bena Isalela. Inge tukabule kutaana muntu wa kwitupokolola, tukepana kwi anweba.”  Kabiji miluwe yafikile ku Gibea+ kwaikalanga Saulo ne kubuula bantu bino byambo, kabiji bantu bonse bajijile bingi.  Bino Saulo wafuminenga mu jisaka saka alondela jitanga panyuma, kabiji Saulo washikishe’mba: “Ñanyi lukatazho luji na bantu? Mambo ka o babena kujijila?” Kepo bamubuujile byambo byaambile bena Yabeshi.  Saulo byo aumvwine bino byambo, mupashi wa Lesa wamupele bulume,+ kabiji wazhingijile bingi.  Ponkapo washikwile bañombe balume babiji ne kwibachibaula mu bipimvwa, kabiji watumine baluwe kutwala bipimvwa mu nyaunda yonse ya bena Isalela, baambile’mba: “Yense usakubula kulondela Saulo ne Samwela ayuke’mba bañombe banji bakeboba byonkabye!” Kabiji bantu bamuchiine bingi Yehoba, kya kuba bonse baishile na muchima umo.*  Kepo ebabajile mu Bezeke, bena Isalela bajinga 300,000 ne banabalume bena Yuda bajinga 30,000.  Kabiji baambijile baluwe baishile amba: “Abino byo byo musakubuula bangikazhi ba mu Yabeshi ku Gileada amba, ‘Kesha inge mute wazonga, bakemupokolola.’” Ponkapo baluwe bayile na kubuula bena Yabeshi, ne abo basangalele bingi. 10  Onkao mambo, bena Yabeshi baambile’mba: “Kesha tukepana kwi anweba, ne anweba muketube kyonse kyo mukamona’mba kyawama.”+ 11  Juba jalondejilepo, Saulo waabenye bantu mu mabumba asatu, ne abo bayile mukachi ka kampu ku makya* ne kutapa bena Amonyi+ kufika ne mute byo azongele. Aba bapulukile bapalañenejilemo, kya kuba kafwako bantu bashajile babiji babiji ne. 12  Kepo bantu baambijile Samwela amba: “Bañanyi baambilenga’mba, ‘Nanchi Saulo wafwainwa kwikala mfumu wetu nyi?’+ Baletai kuno, twibepaye.” 13  Pano bino, Saulo waambile’mba: “Kafwako muntu ye bafwainwa kwipaya lelo ne,+ mambo juba ja lelo Yehoba wapokolola bena Isalela.” 14  Kepo Samwela aambijile bantu amba: “Twayai ku Giligala+ tukambe jibiji amba Saulo ye mfumu.”+ 15  Byonkabyo, bantu bonse bayile ku Giligala, kabiji konkakwa ku Giligala ko ko bakamubikile Saulo pa bufumu ku meso a Yehoba. Kepo batapishishe bitapisho bya mutende kwi Yehoba,+ kabiji Saulo ne bena Isalela bonse baikele na kijiilo ne kusangalala bingi.+

Tubyambo twa munshi

Nangwa’mba “Umvwañanai ne.”
Mu Kihebelu, “baishile nobe muntu umo.”
Ko kuba’mba, kufuma 2 koloko wa ku makya kufika 6 koloko wa lukelo.