Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

1 Bamfumu 2:1-46

BIJI MU BUKU

  • Davida wakambizha Solomone (1-9)

  • Davida wafwa; Solomone waikala pa jitanda (10-12)

  • Bintu byalangulukilenga Adoniya byamuletela lufu (13-25)

  • Abiata bamufumyapo; Yoaba bamwipaya (26-35)

  • Shimei bamwipaya (36-46)

2  Davida byo ajinga pepi kufwa, wapele mwananji Solomone ino mikambizho amba:  “Amiwa njitu pepi kufwa.* Onkao mambo, wafwainwa kukosa+ ne kuchinchika.+  Wafwainwa kukookelanga Yehoba Lesa wobe, kupichila mu kwenda mu mashinda anji ne kulama malamuna anji, mikambizho yanji, mizhilo yanji ne bya kuvululako byanji byonkatu byo byanembwa mu Mizhilo ya Mosesa;+ inge wauba bino ukobanga bulongo* mu bintu byonse byo ukobanga ne konse ko ukayanga.  Kabiji Yehoba ukafikizha mulaye wanji ye andayile’mba: ‘Inge baana bobe bakateshe muchima ku jishinda jabo kupichila mu kuñingijila mu bukishinka na muchima wabo yense ne na mweo* wabo yense,+ mu kisemi* kyobe kechi mukabula muntu wa kwikala pa jitanda ja bena Isalela ne.’+  “Kabiji obewa wayukishatu bulongo kintu kyangubile Yoaba mwana wa kwa Zeluya, ne kyo aubile bakulumpe babiji ba mazhita a bena Isalela, Abina+ mwana wa kwa Nela ne Amasa+ mwana wa kwa Yetela. Wibepayile, kabiji mashi+ o afwainwe kwichila mu kimye kya nkondo wiechijile mu kimye kya mutende, kabiji mashi afwainwetu kwiechila mu nkondo wiashingile ku mushipi wanji wajinga mu musana ne ku makwabilo anji o avwajile ku maulu.  Wafwainwa kuba bintu monka mwayila maana obe, kange ukamuleke uno mukote akaye mu mutende mu Kilende* ne.+  “Bino baana ba kwa Bazilai+ mwina Gileada, wafwainwa kwibamwesha butemwe bubula kwaluka, kabiji bakekale pa boba baja ku tebulu wobe, mambo ne amiwa byo byo bankwashishe+ kimye kyo nanyemene kolojobe Abisalomo.+  “Kabiji kuji ne Shimei wikala kipikipi mwana wa kwa Gela mwina Benjamina wa ku Bahulimu. Ye wamfingile jifingo jatama+ juba jo nayilenga ku Mahanaimu;+ bino byo aishile na kuntundaila ku Yodano, nachipile kwi aye mu jizhina ja Yehoba namba: ‘Kechi nkakwipaya na mpoko ne.’+  Pano kange ukabule kumukambula ne,+ mambo obewa wi muntu wa maana kabiji wayuka kyo wafwainwa kumuba; kange ukamuleketu uno mukote akaye mu Kilende* kwa kubula kwichila mashi anji ne.”+ 10  Kepo Davida bamutwajile na kulaala kwalaala bashakulu banji kabiji bamuzhiikile mu Muzhi wa Davida.+ 11  Davida walamine bena Isalela myaka 40. Mu Hebulona+ walaminemo myaka itanu na ibiji, kabiji mu Yelusalema walaminemo myaka 33.+ 12  Solomone waikajile pa jitanda ja shanji Davida, kabiji bufumu bwanji bwayilenga na kukosa.+ 13  Mu kuya kwa moba Adoniya mwana wa kwa Hagita waishile kwi Batesheba, inanji Solomone. Aye wamushikishe’mba: “Waiya mu mutende nyi?” Aye wamukumbwile’mba: “Ee mwane, naiya mu mutende.” 14  Adoniya waambile’mba: “Kuji kintu kimo kyo mbena kukeba kwimubuula.” Ne aye wamwambijile’mba: “Ambanga.” 15  Waambile’mba: “Mwayukishatu bulongo kuba’mba bufumu bwafwainwe kwikala bwami, ne bena Isalela bonse baketekejile* amba nsakwikala mfumu;+ bino bufumu bwamposomokele ne kwikala ke bwa nkasami, mambo kino kyafumine kwi Yehoba kuba’mba bwikale bwanji.+ 16  Pano kujitu kintu kimo kyo mbena kulomba kwi anweba. Kange munkaine ne.” Batesheba wamwambile’mba: “Ambanga.” 17  Kepo aambile’mba: “Mwane mwambile ba Solomone ba mfumu, mambo kechi basakwimukaina ne, amba bampe Abishagi+ mwina Shunema ekale mukazhami.” 18  Ponkapo Batesheba waambile’mba: “Kijitu bulongo! Nsakukwambilako kwi ba mfumu.” 19  Byonkabyo, Batesheba wayile kwi Mfumu Solomone na kumwambilako Adoniya. Ponkapo mfumu waimene ne kumutundaila inanji ne kumufukamina. Kabiji waikele pa jitanda janji ne inanji mfumu bamuletejile mupando, kuba’mba ekale ku kilujo kyanji. 20  Kepo inanji amwambijile’mba: “Kuji kintu kimo kicheche kyo mbena kulomba kwi anweba. Kange munkaine ne.” Byonkabyo, mfumu wamwambijile’mba: “Mama, ambai kyo mubena kukeba; mambo kechi nsakwimukaina ne.” 21  Aye waambile’mba: “Swishai Abishagi mwina Shunema kuba’mba ekale muka kolojenu Adoniya.” 22  Ponkapo Mfumu Solomone waambijile bainanji amba: “Mambo ka o mubena kulombela’mba Abishagi mwina Shunema ekale muka Adoniya? Nanchi mumulombeleko ne bufumu,+ mambo aye ye kolojami,+ kabiji Abiata ñanga ne Yoaba+ mwana wa kwa Zeluya bakwatankana nanji.”+ 23  Ponkapo Mfumu Solomone wachipile mu jizhina ja Yehoba amba: “Lesa kine ankambule inge Adoniya abule kufwa* na mambo a kundomba kino kintu. 24  Byonkatu Yehoba byo aji na bumi, yenka wangikazha+ ne kumbika pa jitanda ja batata ba Davida kabiji yenka wanshimikila nzubo*+ byonkatu byo alayile, Adoniya usakufwa lelo.”+ 25  Ponkapo Mfumu Solomone watumine Benaya+ mwana wa kwa Yehoyada, ne aye wayile kabiji watapile* Adoniya, ne kufwa wafwile. 26  Kabiji mfumu waambijile Abiata+ ñanga amba: “Yainga ku mpunzha yenu ku Anatota!+ Anweba mwafwainwa kufwa; bino juba ja lelo kechi nsakwimwipaya ne, mambo mwasendanga Jikwachi ja Nkambo Mfumu Yehoba byo mwajinga ne batata ba Davida+ kabiji mwapichile mu binkunka byonse byapichilemo batata.”+ 27  Onkao mambo, Solomone wamupangile Abiata pa mwingilo wa buñanga kwi Yehoba, kuba’mba byambo byaambile Yehoba pa mambo a ba mu nzubo ya kwa Eli+ mu Shilo bifike.+ 28  Yoaba byo aumvwine kino, mambo Yoaba wakwatankankene ne Adoniya,+ bino kechi wakwatankene ne Abisalomo+ ne, wanyemejile ku tente wa Yehoba+ ne kukwata ku nsengo ya kya kusokelapo bitapisho. 29  Kabiji Mfumu Solomone bamubuujile’mba: “Yoaba wanyemena ku tente wa Yehoba, kabiji waimana ku kya kusokelapo bitapisho.” Onkao mambo, Solomone watumine Benaya mwana wa kwa Yehoyada ne kumwambila’mba: “Yanga ukamutape!” 30  Byonkabyo, Benaya wayile ku tente wa Yehoba ne kumwambila’mba: “Mfumu waamba’mba, ‘Lupukamo!’” Bino aye waambile’mba: “Ine! Nsakufwila monka muno.” Kepo Benaya abwezhezhe mawi kwi mfumu amba: “Abino byo byaamba Yoaba, kabiji byo byo aji kunkumbula.” 31  Kepo mfumu amwambijile’mba: “Uba byonka byo aamba; umutape Yoaba ne kumuzhiika ne kufumya mashi o aichijile pa kubula mambo pe amiwa ne pa ba mu nzubo ya batata.+ 32  Yehoba usakumushinkamika mashi anji pa mutwe wanji, mambo batata ba Davida byo babujile kuyuka, waipayile na mpoko banabalume babiji baoloka kabiji bawama kukila aye: Abina+ mwana wa kwa Nela, mukulumpe wa nzhita ya bena Isalela,+ ne Amasa+ mwana wa kwa Yetela, mukulumpe wa nzhita ya bena Yuda.+ 33  Mashi abo akashinkamana pa mutwe wa kwa Yoaba ne pa mitwe ya baana* banji myaka ne myaka;+ bino pe Davida, pa baana* banji, ne pa ba mu nzubo yanji ne pa jitanda janji, pekale mutende ufuma kwi Yehoba myaka ne myaka.” 34  Kepo Benaya mwana wa kwa Yehoyada ayile ne kutapa Yoaba ne kumwipaya, kabiji wamuzhiikile ku nzubo yanji yajinga mu kiselebwa. 35  Kabiji mfumu watongwele Benaya+ mwana wa kwa Yehoyada kwikala mukulumpe wa nzhita kupingakena pe aye, kabiji mfumu watongwele Zadoka+ ñanga kupingakena pe Abiata. 36  Kepo mfumu aichile Shimei+ ne kumubuula’mba: “Ishimikile nzubo yobe mu Yelusalema kabiji wikalenga monka; kange ukafumemo ne kuya ku mpunzha ikwabo ne. 37  Juba jo ukafumamo ne kwabuka Kimpachiko kya Kedolona,+ kine ukafwa. Mashi obe akakushinkamana obewa mwine.” 38  Shimei waambijile mfumu amba: “Kyo mwaamba kijitu bulongo. Amiwa kalume wenu nsakuba byonka byo mwaamba anweba nkambo mfumu.” Byonkabyo, Shimei waikele mu Yelusalema moba avula. 39  Bino ku mpelo ya myaka isatu, bazha babiji ba kwa Shimei babombokele ne kuya kwi Akishi+ mwana wa kwa Maaka mfumu wa Gata. Shimei byo bamubuujile’mba: “Umvwai! Bazha benu baji mu Gata,” 40  ponkapo Shimei wabikile kya kwikalapo pa mbongolo wanji ne kuya na kumonañana ne Akishi mu Gata kuba’mba asende bazha banji. Shimei byo abwelele na bazha banji kufuma ku Gata, 41  Solomone bamubuujile’mba: “Shimei wafuminemo mu Yelusalema ne kuya ku Gata kabiji wabwela.” 42  Ponkapo mfumu waichile Shimei ne kumwambila’mba: “Nanchi kechi nakuchipishe mu jizhina ja Yehoba ne kukujimuna namba: ‘Pa juba jo ukafuma muno ne kuya ku mpunzha ikwabo kine ukafwa’ nenyi? Ne obewa nanchi kechi wañambijile’mba, ‘Kintu kyo mwaamba kijitu bulongo; nsakukookela’ nenyi?+ 43  Pano mambo ka o wabujila kulama luchipo lo wachipile kwi Yehoba ne mukambizho ye nakukambizhe?” 44  Kepo mfumu aambijile Shimei amba: “Wayukishatu mu muchima wobe bintu byonse byatama byo waubile batata ba Davida,+ kabiji Yehoba usakukushinkamika obewa mwine bintu byatama.+ 45  Bino amiwa Mfumu Solomone bakangubila bibusa,+ ne jitanda ja Davida, Yehoba ukejikajika myaka ne myaka.” 46  Ponkapo mfumu wakambizhe Benaya mwana wa kwa Yehoyada, ne aye wayile na kumutapa ne kufwa wafwile.+ Onkao mambo, bufumu bwakosele bingi mu maboko a kwa Solomone.+

Tubyambo twa munshi

Mu Kihebelu, “Mbena kuya mu jishinda jiyamo bantu bonse pano pa ntanda.”
Nangwa’mba “ukoba bintu na maana.”
Mu Kihebelu, “kafwako muntu ye bakachibako mwi obewa ne.”
Nangwa’mba “Shelo,” ko kuba’mba, kilende kya bantu bonse. Monai Mutanchi.
Nangwa’mba “Shelo,” ko kuba’mba, kilende kya bantu bonse. Monai Mutanchi.
Mu Kihebelu, “bantazhizhe bilungi byabo.”
Nangwa’mba “abule kwipayisha mweo wanji.”
Nangwa’mba “wanengezhejile bufumu.”
Nangwa’mba “waponejile pe Adoniya.”
Nangwa’mba “kisemi kyanji.”
Nangwa’mba “kisemi.”