MONAI
Byambo
Kipikichala

Yehoba Lesa ye wafwainwa kulama. Jishinda jo alaminamo jo jawama. Kyaswa muchima wanji ku ntanda ne ku bantu kikafika.

Panyuma ya 4026 B.C.E.

“Muloolo” wazhinaukile luusa lwa Yehoba lwa kulama ne jishinda jo alaminamo. Yehoba walayile kuleta “mwana,” nangwa’mba “lukunwa,” ukafumpa muloolo, aye Satana. (Ntendekelo 3:1-5, 15, tubyambo twa munshi) Nangwa byonkabyo, Yehoba waswisha bantu kwilama abo bene na lutangijilo lwa muloolo.

1943 B.C.E.

Yehoba wabuujile Abalahama amba ‘mwana’ walayiwe ukafuma mu ba mu kisemi kyanji.—Ntendekelo 22:18.

Panyuma ya 1070 B.C.E.

Yehoba waambijile Mfumu Davida ne mwananji Solomone amba “mwana” walayiwe ukafuma mu ndonda ya kisemi kyabo.—2 Samwela 7:12, 16; 1 Bamfumu 9:3-5; Isaya 9:6, 7.

29 C.E.

Yehoba wasolwele Yesu amba ye “mwana” walayiwe ukekala Nswanyi pa jitanda ja kwa Davida.—Ngalatiya 3:16; Luka 1:31-33; 3:21, 22.

 33 C.E.

Muloolo, aye Satana, wakozha “mwana” walayiwe kupichila mu kwipaya Yesu. Yehoba wasangwile Yesu ne kumutwala mwiulu kabiji waswile buneme bwa bumi bwa kwa Yesu bwalumbuluka, onkao mambo, wanengezha kintu kilengela mambo kulekelwa ne kulengela baana ba kwa Adama kukekala na bumi bwa myaka ne myaka.—Ntendekelo 3:15; Byubilo 2:32-36; 1 Kolinda 15:21, 22.

Nobe mu 1914 C.E.

Yesu waelele muloolo, aye Satana pa ntanda, ne kumulekela ponka pa kakimye kacheche.—Lumwekesho 12:7-9, 12.

Kulutwe

Yesu ukakasa Satana pa myaka 1,000, apa bino akamonaune, mu bukifwanyikizho kumufumpa ku mutwe. Byakebelenga Yehoba patanshi ku ino ntanda ne bantu bikafika, ne mwenga ye baleta pa jizhina janji ukafumapo, ne jishinda janji ja kulaminamo jikatumbijikwa.—Lumwekesho 20:1-3, 10; 21:3, 4.