Pa 22 October mu 2014, kafulumende wa kyalo kya Turkmenistan wakasulwile Bakamonyi ba kwa Yehoba bobakashile na mambo a kukana kutwela bushilikale nangwa na mambo a kwibabepelatu. * Kabiji pa 2 September mu 2014, bakulumpe ba mu kafulumende wa kyalo kya Turkmenistan bakasulwile ba Bibi ba muka Rahmanova, nabo Bakamonyi ba kwa Yehoba. *

Jibumba Jitangijila ja Bakamonyi ba kwa Yehoba jatumijile nkalata ya kusanchila Ndamakyalo wa kyalo kya Turkmenistan pa byo akasulwile Bakamonyi ba kwa Yehoba kufuma mu kaleya. Kabiji mu ino nkalata balombele ne kuba’mba Bakamonyi babiji bakijinga mu kaleya nabo bebafumye. Bakamonyi ba kwa Yehoba bakebesha bingi kwikala panshi na kwisamba na bakulumpe ba mu kafulumende pa bintu bimo ne pa luusa lo baji nalo pa kuba’mba Bakamonyi bakasuluke.

Kechi Banemeka Luusa lwa Bantu lwa Kwifuukwila Bintu ne lwa Kwisajila Bene Bupopweshi Ne

Bino kyatamakotu ke kya kuba’mba, kyalo kya Turkmenistan kyatwajijila kukasa Bakamonyi ba kwa Yehoba bakyanyike na mambo a kukana kutwela bushilikale. Bakana kutwela mingilo ya bushilikale kechi bebatwezha nkito ikwabo ne, kabiji bebakasa bañondo 12 kufika ku bañondo 24. Inge bebafumya mu kaleya, javula bebatotolwesha jikwabo amba “bansatuki babula kuleka kulenga mambo” ne kwibakashila mu tuleya twatama bingi.

Ano mambo a kino, Bakamonyi 15 bobakashile na mambo a kukuna kutwela bushilikale banembele makalata a kwijizhanya ku kipamo kya United Nations Human Rights Committee (CCPR). * Bakamonyi bakwabo babiji, bobakashile na mulanguluko wa kukeba kulekesha mingilo ya bya bupopweshi nabo banembele makalata akwijizhanya ku kipamo kya CCPR.

Mu April mu 2012, kije kya CCPR kyaambile pa bibena kuba kafulumende wa kyalo kya Turkmenistan na luusa lwa bantu kuba’mba, “bafwainwa kupitamo jikwabo mu mizhilo ne kupa mingilo ikwabo aba bakana kutwela bushilikale. Kipamo kya kyalo kyafwainwa kumona kuba’mba mizhilo yapa bantu luusa lwa kukana kutwela bushilikale.” Pa kwamba pa bya bupopweshi, uno sawakya watundaikile kafulumende “kumona kuba’mba mizhilo ne mikambizho yaamba pa bya kunembesha bipamo bya bupopweshi yanemeka luusa lwa bantu lwa kukasuluka mu bya bupopweshi byonka byo bafwachikile mu Lulayañano.” Bakamonyi ba kwa Yehoba ba mu kyalo kya Turkmenistan bakatemwa bingi inge banembesha kipamo kyabo mambo bakatendeka kwingila mu mutende mingilo yabo ya bya bupopweshi.

Kyamweka Bintu Kulutwe Bikawama

Bakamonyi ba kwa Yehoba baketekela kuba’mba kyaubile kafulumende wa kyalo kya Turkmenistan kikalengela bantu kukasuluka, kikatakata kukasuluka kwifuukwila bintu, kukasuluka mu bya bupopweshi ne kulondela byo baitabilamo. Shabyambo wa Bakamonyi ba kwa Yehoba waambile’mba: “Bakamonyi ba kwa Yehoba baketekela kuba’mba, kwisamba bulongo na kafulumende wa kyalo kya Turkmenistan kukalengela kafulumende kwi baswisha Bakamonyi kwingila mingilo yo basala bene yaswañana na bwikalo bwabo bwa kwakamwa Lesa.”

Ndonda ya Byamwekele

  1. Pa 19 May mu 2015

    Ba Bahram Hemdemov bebapelemo mambo a kuba bya bupopweshi ne kwibakasa myaka ina. Besakashile panyuma ya kwibalama mu kaleya pa bañondo babiji saka bakyangye kwibatotolwesha.

  2. Mu February ne mu March mu 2015

    Bakamonyi ba kwa Yehoba babiji bobakashile na mambo a kukana kutwela bushilikale bebafuminye mu kaleya.

  3. Pa 18 November mu 2014

    Bakamonyi babiji bo bakashile na mambo a kukana kutwela bushilikale.

  4. Pa 22 October mu 2014

    Ndamakyalo wa kyalo kya Turkmenistan wakasulwile Bakamonyi ba kwa Yehoba batanu na basatu.

  5. Pa 30 September mu 2014

    Bakamonyi batanu na bana bebakashile, batanu na babiji bebakashile na mambo a kukana kutwela bushilikale ne bakwabo babiji bebapelemo mambo a bubela ne kwibamanyika na mambo a kulondela byo baitabilamo.

  6. Pa 2 September mu 2014

    Babinemanga ba mu kyalo kya Turkmenistan bakasulwile ba Bibi Rahmanova ne kwibakashila pangye myaka ina yo bakebelenga kwibakashila mu kaleya.

  7. Pa 18 August mu 2014

    Ba Bibi Rahmanova bebakashile myaka ina na mambotu a kwibebepela.

  8. Pa 25 July mu 2014

    Bakamonyi batanu na babiji bebakashile, batanu bebakashile na mambo a kukana kutwela bushilikale ne bakwabo babiji bebapelemo mambo a bubela ne kwibamanyika na mambo a kulondela byo baitabilamo.

  9. Pa 6 April mu 2014

    Bakamonyi 26 bebakwachile, pa bano bakashilepo 13. Bano Bakamonyi 13 bo bakwachile bebambijile kupana mali.

  10. Mu November mu 2013

    Bakamonyi batanu na bana bakiji mu kaleya, batanu na basatu bebakashile na mambo a kukana kutwela bushilikale ne umo bamukashile na mambo a bubela pa kulondela byo aitabilamo.

  11. Pa 29 August mu 2013

    Bakamonyi basatu batumine makalata a kwijizhanya ku kije kya CCPR mambo kya kyalo kya Turkmenistan kyakana kulondela muzhilo wa kupa bantu luusa lwa kukana kutwela bushilikale.

  12. Pa 1 May mu 2013

    Bakamonyi babiji batumine makalata a kwijizhanya ku kije kya CCPR mambo kya kyalo kya Turkmenistan kya kana kulondela muzhilo wapa bantu luusa lwa bakana kutwela bushilikale.

  13. Pa 24 January mu 2013

    Bakapokola 30 balukukile nzubo ya ba Navruz Nasyrlayev milungu icheche kufuma po bebabujile kuba’mba batumine nkalata ya kwijizhanya ku kije kya CCPR pa byaubile kafulumende wa Turkmenistan. Bakapokola bapumine kisemi kyonse ne benyi babo pamo.

  14. Pa 7 September mu 2012

    Bakamonyi jikumi batwajile makalata a kwijizhanya ku kije kya CCPR mambo kya kyalo kya Turkmenistan kya kana kulondela muzhilo wapa bantu luusa lwa kukana kutwela bushilikale. Ba Navruz Nasyrlayev bobajinga kulutwe pa banembele ino nkalata.

  15. Pa 21 August mu 2008

    Bakamonyi ba kwa Yehoba batumine nkalata ya kukeba kunembesha bupopweshi bwabo mu kyalo kya Turkmenistan.

^ jifu. 2 Monai kibaba kya kuba’mba: “Bakamonyi ba kwa Yehoba Bebakasulula mu Turkmenistan”

^ jifu. 2 Monai kibaba kya kuba’mba, “Mwanamukazhi Bamukasulula mu Turkmenistan”

^ jifu. 6 Kije kikatampe kya Human Rights Committee, kitelwa’mba CCPR kyo kitangijila bingila kije kya International Covenant on Civil and Political Rights (ICCPR). Kyalo kya Turkmenistan kyalayañene na kino kipamo mu mwaka wa 1997 kabiji mu yenka uno mwaka baikajikile luno lulayañano na kipamo kya ICCPR’s First Optional Protocol kuba’mba kechi bakelulondelanga ne.