Ba Jorim, Christiane, ne ba Andreas Bonk. Ba Andreas bajinga mu mwanya kimye kwajinga kino kijilo.

BANGIKAZHI, ba ku Germany ba Andreas Bonk, Bakamonyi ba kwa Yehoba ne mwanabo aye Jorim batambwile bilambu pa 16 April, 2015, pa kupulusha banabalume basatu bajinga mu motoka wapilenga. Bino bilambu bebapele pa kijiilo pajinga ne kilolo utala pa Federal State wa Baden-Württemberg, wa ku kabeta ka bulenge muzhika wa Germany, bakulumpe babiji bemenako kafulumende kufuma mu muzhi wa Obersulm ne Waiblingen, mwikala bano bantu batambwile bilambu. Kilolo utala pa Interior Reinhold Gall (kipikichala kiji peulu, wa busatu kufuma ku kilujo) wapele ba Andreas Bonk kilambu pa kupulusha bumi bwa bangikazhi ba ku Federal State of Baden-Württemberg (Lebensrettungsmedaille des Landes Baden-Württemberg). Bakazhi baba Bonk abo ba Christiane (baji pakachi pa kipikichala kiji peulu), bo batambwijile balume babo kino kilambu na mambo a kuba’mba abo bajinga mu mwanya pa kyokya kimye. Pa kyonka kino kijiilo, mukulumpe wimenako kafulumende ba Obersulm, ba Tilman Schmidt (baji pa kipikichala kiji peulu ku kipiko), popo bapele ba Jorim Bonk (kipikichala kiji peulu, pakachi) Kipepala kya Munema (Ehrungsurkunde).

Pa 11 May, 2014, ba Andreas ne Jorim Bonk bayilenga ku kupwila kukatampe kwa Bakamonyi ba kwa Yehoba ako ba Andreas ko bayilenga na kwamba jashi ja Baibolo. Kimye kyo bayilenga, bataaine motoka wajinga mu mapuso apa mukwakwa. Mu uno motoka, mwajinga bashilikale bena America bana bajinga mukachi. Ba Bonk ne mwanabo kubikapotu ne bantu babiji bapichilenga baimene pa kuba’mba bakwashe bano bantu bajinga mu mapuso. Ba Andrea babikile bumi bwabo mu kizumba pa kufumya bano bantu bajinga mu motoka wapilenga kufikilatu ne kimye kyaishile bakapokola, bazhima mujilo ne motoka usenda balwazhi. Kyatamineko ke kya kuba’mba mushilikale umo pa bano bana wafwile. Kimye kyo banembelenga jino jishimikila, pepala wa byambo utelwa’mba Sulmtaler Woche washimwine’mba ba Gall bambijile bano bapulwishe bantu amba, “Mwaingijile bingi na ngovu yenu yonse kwakubula kunemeka bumi bwenu.” Kilolo wimenako kafulumende abo ba Schmidt banungilepo amba, “Atweba bonse twikala mu uno muzhi wa Obersulm, twatemwa bingi pa kintu kyo mwauba.”

Kipikichala kyo bakopele kimye kya mapuso.

Ba Andreas Bonk balumbulwile kibalengejile kuba bino. Baambile’mba: “Kyandengejile kwimana pa mpunzha ya mapuso ke kutemwa bantu bakwetu. Kwiamiwa bumi bonse bwanema. . . . Inge yami natainwe mu ano mapuso nangwa balongo bami, naketekela kuba’mba inge kwajinga betukwashishe.” Ba Jorim banungilepo amba, “Kechi kyawama kupitaila bantu babena kukeba bukwasho ne.”

Kuno kusekelela ko bebapelenga bilambu kwajinga mu kishimikwa kya Obersulm Town Hall. Pepala wa byambo wa ku German utelwa’mba STIMME.de, waambilepo pa kuno kusekelela kwajingako ne pa byambo byaambile ba Waiblingen, Andreas Hesky (kipikichala kiji peulu, ba bubiji kufuma ku kilujo) bakulumpe bemenako kafulumende. Baambile’mba: “Inge mwalanguluka pa kyo mwaubile kyakonsha kwimuletela bingi lusekelo. Bangikazhi mu uno muzhi wa Waiblingen baumvwa bingi bulongo pa kintu kyo mwauba. Byubilo byenu bisa kulengela bakwenu kufunjilako bintu byavula bingi”

Media Contact(s):

International: J. R. Brown, Office of Public Information, tel. +1 718 560 5000

Germany: Wolfram Slupina, tel. +49 6483 41 3110