Ine. Bakamonyi ba kwa Yehoba kechi jibumba ja muntutu ne. Ke bena Kilishitu bebikako bingi kulondela byubilo bya kwa Yesu Kilishitu ne kuba bintu byo afunjishenga mu bwikalo bwabo.

Nanchi bantu inge baam­ba’mba aje ke jibumba ja muntutu balumbulula ka?

Bantu balumbulwila mwapusana byambo bya ku­ba’mba “jibumba ja muntutu.” Akimonai bantu bamo byo balumbulula mwatala byambo bya ku­ba’mba jibumba ja muntutu ne ene mambo bino kyo byapusena na byo tuji.

  • Bamo balanguluka amba jibumba ja muntutu ke jibumba jilondela muntu nangwa jipatula ku bupopweshi bwa Orthodox. Bakamonyi ba kwa Yehoba kechi besombelatu bupopweshi bwabo ne. Balondela mpopwelo ya bena Kilishitu batanshi bo baambapo mu Baibolo ne byo bafunjishanga. (2 Timoti 3:16, 17) Twaitabila amba Binembelo byazhila byo byo twafwainwa kulondelanga, kechi mpopwelo ya orthodox ne.

  • Bakwabo nabo balangulu­ka’mba jibumba ja muntutu ke bupopweshi bwatama butangijilwa na muntu. Bakamonyi ba kwa Yehoba kechi batangijilwa na muntu ne. Tulondela Yesu byo abujile baana banji ba bwanga, byo aambi­le’mba: “Mujitu na Ntangi umo, aye Kilishitu.”Mateo 23:10.

Bakamonyi ba kwa Yehoba kechi bupopweshi bwatama ne. Ke bupopweshi bufunjisha bakamonyi ne babula Bakamonyi kwikala na byubilo byawama. Kusapwila kwakwasha bantu bavula kupimpula bwikalo bwabo bwatama, nabiji kuleka kwingijisha michi ne malwa mu mashinda atama. Kabiji tufunjisha bantu bavula kutanga ne kunemba mwaya ntanda ne kukwasha bantu bafikilwa na bya malwa. Tuba bintu byawama abyo bilengela bantu kupimpula bwikalo bwabo byonkatu Yesu byo akambizhe baana banji ba bwanga.Mateo 5:13-16.