Bakamonyi ba kwa Yehoba batanga ne kufunda byambo biji mu ma Baibolo apusana pusana. Nangwa byonkabyo, banemeka bingi Baibolo wa Binembelo bya Ntanda Ipya mambo muji jizhina ja Lesa, bamutuntulula bulongo kabiji wapela kumvwa.

  • Jizhina ja Lesa jiji monka. Banembi ba ma Baibolo bamo kechi banemeka mwine nembi ne. Mu Baibolo umo batongola mazhina a bantu 70 baingijileko pa ku­ba’mba atuntululwe. Pano bino, bashapo jizhina ja mwine wanembele Baibolo aye Yehoba Lesa!

    Bino mu Baibolo wa Binembelo bya Ntanda Ipya jizhina ja Lesa bejinemba ponse po jiji byonkatu biji mu mulaka mutanshi kunembelamo Baibolo. Bino mazhina a bene batuntulwile kechi beanembamo ne.

  • Watuntululwa bingi bulongo. Kechi bonse batuntulula bulongo byambo byonka byo biji mu mulaka mutanshi ye banembejilemo Baibolo ne. Mu Baibolo umo Mateo 7:13 bamutuntulula amba: “Twelai pa kibelo kyakepa, mambo kibelo kya kutwelelapo kuya ku helo kyabaya kabiji jishinda japela kwendamo kuya konka.” Bino mu mwine mulaka mutanshi baingijisha “lonaiko” kechi “helo” ne. Kampe bantuntuluzhi baingijishe kyambo kya ku­ba’mba, “helo” mambo baitabiji­le’mba babi bakebamanyikanga myaka ne myaka mu mujilo wa helo. Bino Baibolo kechi waambapo amba byo byo kikekala ne. Onkao mambo, kino kyepelo bekituntulula bingi bulongo mu Baibolo wa Binembelo bya Ntanda Ipya bya Kingiliki bya Bwina Kilishitu. Batuntulu­la’mba: “Twelai pa kibelo kyakepa, mambo kibelo kyabaya ne jishinda jabaya bitwala ku lonaiko.”Mateo 7:13.

  • Wapela kumvwa. Baibolo bafwainwa kumutuntulula bulongo kabiji wafwainwa kupela kumumvwa. Monai byambo byaingijisha mutumwa Paulo mu Loma 12:11. Inge kulondela kyambo pa kyambo waam­ba’mba, “muchima wa lupata.” Na mambo a ku­ba’mba bino byambo byakatazha kwibyumvwa mu Kikaonde, Baibolo wa Binembelo bya Ntanda Ipya bya Kingiliki bya Bwina Kilishitu mo atuntulwilwa mwapela kumvwa. Wabula bena Kilishitu amba “mupashi wazhila emulengele kwikala bamukoyo.”

Mu Baibolo wa Binembelo bya Ntanda Ipya muji jizhina ja Lesa, bamutuntulula bingi bulongo kabiji wapela kumvwa. Kabiji uno Baibolo kechi wa kupotesha ne, wa kusampanya ku bantu. Kino kyalengela bantu bavula kutanga Baibolo mu mulaka wabo, nangwatu boba babula mali a kupota wa kyabo kyabo.