Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

Pweng Wo Sin God Me!

 MWE LUTLUT AHK 4

Suc Jesus Christ?

Suc Jesus Christ?

1. Fuhkah muhtwacwacyen moul lal Jesus?

Efuh kain in mwet, wekuhnacng tuhlihk, eltahl engan in sramsram nuh sel Jesus?MATTHEW 11:29; MARK 10:13-16.

Moul lal Jesus tiac oacna mwet nuhkewa sahyac, el muhta in kuhsrao oacna sie lipufacn meet liki el isuslac facluh. (John 8:23) El pa ma oreklac se meet luhn God, ac el sang kahsruh in oraclah ma nuhkewa sahyac. El muhkwena pa Jeova el sifacna oraclah, pwacnacng arlac fal in pahngpahng el “Wen sefanna” nuhtin God. (John 1:14) Jesus el oacna Mwet in Kahskahs luhn God, pwacnacng el oacyacpac pahngpahng “Kahs.”Riti Soakas 8:22, 23, 30; Colossae 1:15, 16.

2. Efuh Jesus el tuhkuh nuh facluh?

God el suhpwacma wen sefanna nahtuhl nuh facluh ke el sang moul lal nuh insiacn muhtwacn virgin se pahngpahng Mary. Pwacnacng wacngihn Pahpah tuhmwacl Jesus fin facluh. (Luke 1:30-35) Jesus el tuhkuh nuh facluh ke srihpac tolu inge: (1) in luti ma pwacye ke God, (2) in oakiyac mwe srihkasrak wo lah fuhkah in oruh ma luhngse luhn God finne kuht sun ma upac, ac (3) in sang moul suwohswohs lal in “molwelah” mwet uh.Riti Matthew 20:28.

3. Efuh kuht enenuh mwe molwelah?

Mwe molwelah pa molin taltallah luhn sie mwet liki mwe kapihr luhn misac. (Exodus 21:29, 30) Tiac oakwuck luhn God nuh sin mwetuh eltahl in mahtohuh ac misac. Kuht etuh ma inge fuhkah? God el fahk nuh sel Adam lah el fin oruh sie ma suc Bible uh pahngon “ma kuluk,” el fah misac. Pwacnacng fin Adam el tiac oraclah ma kuluk sac, el luhkuhn moul na. (Genesis 2:16, 17; 5:5) Fal nuh ke Bible, misac “tuhkuh” nuh facluh ke srihpacl Adam. Na ma kuluk ac  misac fahsrelihk nuh yurin tuhlihk nuhkewa nahtuhl Adam. Kuht enenuh mwe molwelah in ahksukohsohkyekuhtlac liki misac, suc kuht usrui sel Adam.Riti Rome 5:12; 6:23.

Suc kuh in molikuhtlac liki misac? Ke pacl se kuht misac uh, kuht molwelah ma kuluk lasr sifacna. Wacngihn sie mwet sesuwohs kuh in moli ma kuluk luhn sie pacna mwet sahyac.Riti Psalm 49:7-9.

4. Efuh Jesus el misac?

Jesus el suwohswohs, ac el tiac oacna kuht suc sesuwohs. Pwacnacng el tiac enenuh in misac ke ma kuluk lal, mweyen wacngihn ma kuluk lal. Tuhsruhktuh, Jesus el misac ke ma kuluk luhn mwet nuhkewa. God el ahkkahlwemye luhngse yohk lal nuh sin mwet uh ke el suhpwacma Wen sefanna nahtuhl in misac kacsr. Jesus el oacyacpac ahkkahlwemye luhngse lal nuh sesr ke el ahkos Pahpah tuhmal ac sang moul lal in molwelah ma kuluk lasr.Riti John 3:16; Rome 5:18, 19.

5. Meac Jesus el oruh ingena?

Ke pacl se Jesus el muhta fin facluh, el ahkkweyelah mwet mas, ahkmoulyeack mwet misac, ac sang kahsruh nuh sin mwet. Ke inkacnek inge, el luhmahlah ma el ac fah oruh ke pacl fahsruh nuh sin mwet ahkostwen nuhkewa. (Matthew 15:30, 31; John 5:28) Tukun Jesus el misac, God el ahkmoulyelack oacna sie lipufacn kuhlacna. (Sie Peter 3:18) Tukun ma inge, Jesus el muhta ke lacpo lacyot sin God sano nuh ke pacl se Jeova el ac sang kuh nuh sel in kol oacna sie Tohkohsrah fin facluh nohfohn. (Hebrew 10:12, 13) Ingena Jesus el kol inkuhsrao oacna sie Tohkohsrah, ac mwet nuhkewa suc fahsr tohkohl elos fahkwack pweng wo inge fin facluh nohfohn.Riti Daniel 7:13, 14; Matthew 24:14.

Ke pacl na sa, Jesus el ac fah orekmakihn kuh lal in oacna sie Tohkohsrah in ahkwacngihnyelah mwe kweok nuhkewa ac mwet nuhkewa suc oruh mwe kweok inge. Eltahl nuhkewa suc luhlahlfongel Jesus ke elos ahksol fah engankihn moul wo ke sie paradise fin facluh.Riti Psalm 37:9-11.