Som nuh ke koano an

Som nuh ke menu ahkluo

Som nuh ke koano an

Mwet Loh luhn Jeova

Kosraean

“Liyekowosyang Sifacna in Muhtana In Luhngse Luhn God”

 SAPTA 1

“Kuht Ahkkahlwemye Luhngse Lasr nuh sin God”

“Kuht Ahkkahlwemye Luhngse Lasr nuh sin God”

“Kuht ahkkahlwemye luhngse lasr nuh sin God ke kuht ahkos ma sap lal. Ac ma sap lal uh tiac toasrlac nuh sesr.”​—SIE JOHN 5:3.

1, 2. Meac mokle kom in luhngse Jeova God?

YAC kom luhngse God? Kom fin wuhlelah tari moul lom nuh sin Jeova, kahlwem lah top lom an pa ahok! Arlacna fal kuht in luhngse Jeova. Kuht luhngse God ke srihpen luhngse lal nuh sesr. Pa inge ma Bible uh fahk kac: “Kuht luhngse, mweyen God [Jeova] el luhngse kuht meet.”​—Sie John 4:19.

2 Jeova el ahkkahlwemye meet luhngse lal nuh sesr uh. El use facl na kahto se nuh sesr kuht in muhta kac. El nuhnkuh ke mwe enenuh lasr uh. (Matthew 5:43-48) Yohk liki ma inge, el acse nuh sesr ma kuht enenuh tuh in karihngihn fototo lasr nuh sel uh. El use Bible nuh sesr ac pa inge Kahs lal uh. In wekuhnacng ma inge, el siyuck kuht in puhruhe nuh sel mweyen el wuhlelah muh el ac fah lohng kuht ac el ac fah acse kuh lal in kahsre kuht. (Psalm 65:2; Luke 11:13) Sahyen ma inge nuhkewa, el suhpwacma Wen kuloh sefanna nahtuhl in molikuhtlac tuh kuht in sukohsohklah liki ma kuluk ac misac. Arlacna yohk luhngse luhn Jeova nuh sesr!​—Riti John 3:16; Rome 5:8.

3. (a) Meac kuht enenuh in oruh tuh kuht in muhtana ke luhngse luhn God? (b) Kihsen siyuck yohk srihpac fuhkah se kuht enenuh in nuhnkuh kac, ac kuht ac konwacack oyac top nuh kac uh?

 3 Jeova el luhngse kuht in engankihn ma wo nuhkewa ma tuhkuh ke luhngse lal uh ne tok ma pahtpaht. Kuht pa ac sulaclah fin kuht ac engankihn ma wo inge kuh tiac. Kahs luhn God uh kwacfe kuht: “Liyekowosyang sifacna in muhtana in luhngse luhn God . . . in usot moul ma pahtpaht nuh suwos.” (Jude 21) Pohloh kahs inge “liyekowosyang sifacna” ahkkahlwemye lah oasr ma kuht enenuh in oruh tuh kuht fah kuh in muhtana ke luhngse luhn God. Kuht enenuh in ahkkahlwemye  in kahlwem luhngse lasr nuh sel uh. Pwacnacng, sie kihsen siyuck na yohk srihpac ma kuht enenuh in siyuck sesr sifacna pa inge: ‘Nga ac ahkkahlwemye fuhkah luhngse luhk nuh sin God?’ Top nuh ke kihsen siyuck se inge oasr ke kahs lal mwet sap John inge: “Kuht ahkkahlwemye luhngse lasr nuh sin God ke kuht ahkos ma sap lal. Ac ma sap lal uh tiac toasrlac nuh sesr.” (Sie John 5:3) Kuht enenuh in tuni ahkwoyac kalmen kahs inge mweyen kuht luhngse in ahkkahlwemye luhngse yohk lasr nuh sin God.

KALMEN “LUHNGSE LASR NUH SIN GOD”

4, 5. (a) Meac kalmen kahs inge, “luhngse lasr nuh sin God?” (b) Ahkuhtweyac lah luhngse lom nuh sin Jeova uh ac yohkwelihk fuhkah.

4 Meac kalmen kahs ma mwet sap John el suhmuhslah inge, “luhngse lasr nuh sin God”? Kalmen ma el suhmuhslah inge oacpacna nuh ke puhlakihn luhn kais sie sesr nuh sin God. Yac kom kuh in esam pacl se ma luhngse lom nuh sin Jeova muhtwacwacack in yohkwelihk?

Wuhlelah ac bacptais luhn sie mwet pa akihlenyac muhtwacwacyen moul in ahkostwen lal nuh sin Jeova

5 Srihke nuhnkuh ke kihtin pacl, ke pacl se kom tuh lotwelah ma pwacye kacl Jeova ac oakwuck lal uh ac ke kom muhtwacwacack in ahkkahlwemye luhlahlfongi lom. Kom lotwelah lah finne wacngihn fototo lom nuh sin God ke pacl se kom isuslac ah, ke srihpen Christ, Jeova el oraclah inkacnek nuh sum in eis moul ma pahtpaht ac moul suwohswohs se ma Adam el sislah ah. (Matthew 20:28; Rome 5:12, 18) Kom muhtwacwacack in kahlwem kac ac ahksacohkye mwe kihsac ma Jeova el oruh ke el suhpwacma Wen kuloh sefanna nahtuhl in misac keim. Insiom mokleyuck ac kom muhtwacwacack in luhngse God ke el ahkkahlwemye luhngse yohk nuh sum.​—Riti Sie John 4:9, 10.

6. Ahkkahlwemyeyuck fuhkah luhngse pwacye uh, ac meac luhngse lom nuh sin God mokle kom in oruh?

 6 Tuhsruhktuh, luhngse se ma kom puhla inge pa muhtwacwaciyen luhngse pwacye lom nuh sin Jeova. Luhngse uh tiac ma mwet uh puhla ac fahk muhkwena. In ahkkahlwemye luhngse pwacye nuh sin God, suhfal kuht in fahk muhkwena, “Nga luhngse Jeova.” In oacna luhlahlfongi uh, luhngse pwacye uh kahlwem ke orekma ma ahkkahlwemyeyuck kac uh. (James 2:17) Kuht ahkkahlwemye luhngse lasr ke kuht oruh ma ac ahkinsewowoye mwet se ma kuht luhngse uh. Pa sis, ke pacl se ma luhngse lom nuh sin Jeova tuhfahna sun insiom, ma inge mokle kom in moulkihn moul lom ke sie inkacnek ma ac ahkinsewowoye Pahpah tuhmom inkuhsrao. Yac kom sie Mwet Loh suc bacptaislac tari? Fin ahok, luhngse pwacye ac oaru lom nuh sin Jeova pa mokle kom in oruh sulaclah se ma yohk srihpac emeet ke moul lom an. Kom wuhlelah moul lom nuh sin Jeova in oruh ma luhngse lal ac kom ahkpwacyeye wuhlelah lom inge ke pacl se kom bacptaislac uh. (Riti Rome 14:7, 8.) Kwacfeacng lom in ahkpwacyeye wuhlelah se lom nuh sin Jeova inge weacng pac nuh ke ma mwet sap John el fahk tok uh.

“KUHT AHKOS MASAP LAL”

7. Meac kuhtuh sin masap luhn God uh? Meac kalmac kuht in ahkos masap lal uh?

7 Mwet sap John el ahkuhtweyac lah kalmen luhngse lasr nuh sin God pa ke: “Kuht ahkos masap lal.” Piyac masap luhn God inge? Jeova el use masap lal uh nuh sesr ke inkacnek luhn Kahs lal in Bible. Ke sie mwe puhpuhlyuck, el sruhnga kain in orekma kuluk inge oacna sruhi, orekma in kosro, alu nuh ke ma sruhloaclah, pihsrapasr ac kikiacp. (Sie Corinth 5:11; 6:18; 10:14; Ephesus  4:28; Colossae 3:9) Kuht fin ahkos masap luhn God, kalmac pa kuht moulkihn moul lasr fal nuh ke ohiyen moul nwacsnwacs ma sihmlac in Bible uh.

8, 9. Kuht etuh fuhkah lah piyac kac ma ac ahkinsewowoye Jeova uh, finne nuh ke ma pucspucs ma wacngihn masap kac in Bible? Sang sie mwe puhpuhlyuck an.

8 Tuhsruhktuh, in ahkinsewowoye Jeova, oasr ma kuht enenuh in oruh sahyacn kuht ahkos ma sap lal uh. Kuht enenuh in etuh nuhnak luhn Jeova uh. Jeova el tiac oakiyac masap nuh ke inkacnek nuhkewa ke moul lasr uh. Oasr pacl ma Bible uh tiac ahkkahlwemye masap nuh ke sie ma. Pwacnacng, kuht enenuh in sifacna sulaclah lah kuht ac eiskuhtyang nuh kac kuh tiac. Bible uh luti kuht in kahlwem ke nuhnak luhn Jeova. Ke pacl se kuht lutlutkihn Bible uh, kuht ac kuh in liye ma Jeova el luhngse ac sruhnga uh. (Read Psalm 97:10; Soakas 6:16-19) Kuht etwaclah ac akihlen ohiyac ac orekma ma el insewowo kac uh. Ke yohkwelihk etwacack lasr ke ohiyac wowo luhn Jeova ac ke inkacnek pucspucs lal uh, ma inge ac fah kahsre kuht tuh sulaclah lasr ac orekma lasr uh in fal nuh ke nuhnak lal uh. Ac ke pacl ma wacngihn ma sap in Bible nuh ke ma kuht ac fah oruh uh, kuht ac kuh in akihlen ‘ma luhngse luhn Leum Jeova’ pacl nuhkewa.​—Ephesus 5:17.

9 Ke sie mwe puhpuhlyuck, wacngihn masap in Bible ma utuckuh nuh sesr in tiac liye petsac kuh program ke tv ma oasr ahkmas kuh orekma in kosro kac. Tuhsruhktuh, yac enenuh in sihmlac kahlwem nuh sesr in tiac liye ma inge? Kuht etuh tari lah meac nuhnak luhn Jeova ke kain in ohiyac inge. Kahs lal uh fahk arlac kahlwem nuh sesr: “[Jeova] El arlacna koase mwet suc luhngse oruh ma suhlallacl.” (Psalm 11:5) El oacyacpac fahk: “God el fah nuhnuhnkaclos nuhkewa suc moul in  elahn kosro.” (Hebrew 13:4) Ke kuht nuhnkuh ke kahs inge nuhkewa, kuht ac kuh in etuh na pwacye ma Jeova el luhngse uh. Pwacnacng, kuht tiac liye petsac ma ahkkahlwemye kain in orekma pucspucs ma God el sruhnga. Kuht etuh lah Jeova el engan ke pacl se kuht fahsr liki orekma fohkfohk nuhkewa ma facl se inge srihke in oraclah muh mwe ahkengan ma wacngihn mwe sensen kac. *

10, 11. Efuh kuh kuht sulaclah sie moul in ahkostwen nuh sin Jeova ac fuhkah ohiyen ahkostwen lasr nuh sel uh?

10 Meac srihpac yohk se ma pwacnacng kuht enenuh in ahkos masap luhn God uh? Efuh kuh kuht ke moulkihn moul lasr ke kais sie lwen in fal nuh ke nuhnak luhn God? Kuht tiac sulaclah in oruh ma inge ke srihpen kuht kahingkihn muhkwena mwe kai kuh ma upac ma ac sun mwet suc pihlesruh ma luhngse luhn God uh. (Galatia 6:7) Tuhsruhktuh, ahkostwen lasr nuh sin Jeova uh pa sie pacl wo in ahkkahlwemye luhngse lasr nuh sel. In oacna ke tuhlihk se luhngse in ahkenganye pahpah tuhmwacl, kuht oacyacpac luhngse in ahkenganye Jeova. (Psalm 5:12) El pa Pahpah tuhmwacsr uh ac kuht luhngse el. Wacngihn kuhtwena ma sahyac kuh in ahkenganye kuht oacna ke kuht etuh lah kuht moulkihn moul lasr ke sie inkacnek ma “God El insewowo” kac.​—Soakas 12:2.

11 Ke ma inge kuht engan in ahkos, tiac ke srihpen oasr ma wo kuht ac kuh in eis kac. * Kuht tiac sulaclah  masap ma kuht ac ahkos kuh tiac ahkos uh. Kuht tiac pac ahkos ke pacl na ma kuht kuh ac ke pacl ma tiac upac nuh sesr uh. Tuhsruhktuh, kuht ahkos ke ‘insiacsr nohfohn.’ (Rome 6:17) Kuht puhla oacna ma mwet sihm luhn Psalm el suhmuhslah inge: “Nga puhlakihn insewowo ke nga ahkos ma sap lom. Mweyen nga arlacna luhngse kahs lom.” (Psalm 119:47) Pwacye lah kuht luhngse in ahkos Jeova. Kuht akihlen lah arlac fal kuht in ahksol ke insiacsr kewa. Ac pa inge ma el siyuck kuht in oruh uh. (Deuteronomy 12:32) Kuht luhngse Jeova elan sruhmuhn kuht oacpacna ma Kahs lal uh sruhmuhn kacl Noah, sie mwet kuhlwacnsap oaru in pacl meet ah, suc ahkkahlwemye luhngse nuh sin God ke ahkostwen lal ke lusen yac pucspucs. Bible uh fahk: “Noah el oruh ma nuhkewa ma God el sapkihn.”​—Genesis 6:22.

12. Ke pacl fuhkah ahkostwen lasr uh ahkenganye Jeova?

12 Meac puhlakihn luhn Jeova ke kuht engan in ahkos ma nuhkewa el sapkihn? Kahs lal uh fahk lah ke kuht oruh ma inge, kuht oruh insiacl in “arlacna engan.” (Soakas 27:11) Yac pwacye lah ahkostwen lasr uh ahkenganye insiacn Leum Fuhlwactlacna lasr inkuhsrao ac facluh? Ahok, ac oasr srihpac na wowo luhn Jeova! Jeova el orekuhtlac tuh kuht in sukohsohk in oruh sulaclah lasr sifacna. Kalmen ma inge pa, oasr sukohsohk lasr in ahkos kuh tiac ahkos God. (Deuteronomy 30:15, 16, 19, 20) Ke pacl se kuht ahkkahlwemye lah kuht engan in ahkos Jeova ac ke srihpac se ma mokle kuht in oruh sulaclah se inge uh pa luhngse yohk lasr nuh sin God, ma inge ac arlacna ahkenganye Pahpah tuhmwacsr inkuhsrao. (Soakas 11:20) Ke kuht oruh ma inge, kuht oacyacpac sulaclah inkacnek in moul se ma wo emeet uh.

 “MASAP LAL UH TIAC TOASRLAC NUH SESR”

13, 14. Efuh kuh kuht kuh in fahk muh ‘masap luhn God uh tiac toasrlac nuh sesr’ ac meac ma inge kuh in puhpuhlyuckkihnyuck nuh kac?

13 Mwet sap John el ahkkahlwemye nuh sesr sie mwe ahkkweye ke ma Jeova el siyuck sesr uh: “Masap lal uh tiac toasrlac nuh sesr.” Sie pac lweng luhn Bible fahk ohinge: “Masap lal uh tiac ahktoasrye kuht.” (New English Translation) Ma Jeova el siyuck sesr uh tiac upaclac kuh ahktoasrye kuht. Masap lal uh tiac ahluhkwelah ma mwet sesuwohs uh kuh in oruh.

14 Kuht kuh in puhpuhlyuckkihn nuh ke kawuck fototo se lom ma siyuck kom in kahsrel moklaclah ma lal nuh ke lohm sasuc se sel. Puhs pohk ma komtacl ac enenuh in mokle ac sruhklah. Kuhtuh pohk inge muhlahlah nuh sin mwet sefanna in sruhklah, tuhsruhktuh oasr pohk ma toasrlac ac enenuh mwet luo in sruhk. Ke kawuck se lom ingacn sulaclah pohk ma el ac ke kom in sruhk an, yac el ac siyuck sum in sruhk pohk ma ac toasrlac nuh sum? Moh. El ac sruhnga kom in ngalyak ke kom muhkwena sruhk uh. In oacpacna, God na kuhlwacng ac luhngse se lasr inge tiac siyuck sesr in ahkos masap ma ac upaclac nuh sesr. (Deuteronomy 30:11-14) Wacngihn sie pacl el ac muh siyuck kuht in oruh sie ma upaclac nuh sesr in oruh. Jeova el etuh kuhiyacsr, mweyen “el etuh lah meac kuht oreklac kac, El esam lah kuht oreklac ke kutkut.”​—Psalm 103:14.

15. Efuh kuh kuht kuh in luhlahlfongi lah masap luhn Jeova uh ma ac wo nuh sesr ac kahsre kuht?

15 Masap luhn Jeova uh tiac toasrlac, ma inge ma ac wo nuh sesr ac kahsre kuht. (Riti Isaiah 48:17.) Ke ma inge, Moses el kuh in fahk nuh sin mwet Israel in pacl meet ah: “Jeova el sapkihn nuh sesr in oruh masap inge nuhkewa, in sahngweng sin Jeova God lasr, tuh in wo  yohrohsr pacl e nuhkewa, tuh el fah kuh in karuhnguhnwacng moul lasr, oacna mihsenge.” (Deuteronomy 6:24, BMK) Kuht kuh pac in luhlahlfongi lah ke Jeova el acse masap lal inge nuh sesr, el nuhnkuh ke ma ac wo nuh sesr, tiac ke pacl inge muhkwena a ke pacl fahsruh uh pac, ac nuh tok ma pahtpaht. Ke srihpac se inge, yac Jeova el kuh in sapkihn kuht in oruh sie ma ma kuht ac kuh in ngalyak kac? Jeova el sie God suc yohklacna lahlmwetmwet la. (Rome 11:33) Pwacnacng, el pa etuh emeet ma ac wo nuh sesr uh. Jeova el oacyacpac mwe srihkasrak se ma wo emeet ke luhngse. (Sie John 4:8) Luhngse lal uh pa kihfucs ac mokle ma nuhkewa ma el fahk ac oruh uh. Pa inge sropon masap nuhkewa ma el oakiyac nuh sin mwet kuhlwacnsap lal uh.

16. Kuht finne rauniyucklac ke mwe ahkkuluk pucspucs luhn facl se inge ac kuht mwet sesuwohs, meac ac oruh kuht in ahkos pacl nuhkewa uh?

16 Tiac kalmen ma inge pa fihsracsr in ahkos masap luhn God uh. Kuht enenuh in fahsr liki ac lain mwe ahkkuluk luhn facl se inge ma “oan ye kuh luhn el suc kuluklacna.” (Sie John 5:19) Kuht oacyacpac lain ohiyen sesuwohs lasr sifacna ma oruh kuht in seahkos masap luhn God. (Rome 7:21-25) Tuhsruhktuh, luhngse lasr nuh sin God uh ac kuh in mokle kuht in kuhtanglah. Jeova el ahkinsewowoye mwet suc luhngse in ahkpwacyeye luhngse laltahl nuh sel ke eltahl ahkos. El sang kuh lal “nuh selos suc ahksol.” (Orekma 5:32) Kuh se ma el use nuh sesr inge oraclah fahko na wowo in kuht ke ohiyac ma ac kuh in kahsre kuht in ahkos pacl nuhkewa.​—Galatia 5:22, 23.

17, 18. (a) Meac kuhtuh pac ma ma kuht ac fah sramsramkihn ke puk se inge ac ke kuht oruh ma inge, meac kuht enenuh in esam? (b) Meac kuht ac fah sramsramkihn ke sapta se tok uh?

17 Ke puk se inge, kuht ac tuni kahs in kahsruh luhn  Jeova, oakwuck fuhlwact lal nuh ke moul nwacsnwacs ac kuhtuh pac ma ma ahkkahlwemye nuh sesr ke ma luhngse lal uh. Ke kuht oruh ma inge, kuht enenuh in esam ke kuhtuh ma yohk srihpac. Kuht in esam lah Jeova el tiac pahtok kuht in ahkos masap lal ac kahs in kahsruh lal uh, mweyen el ke kuht in ahksol ke insiacsr. Kuht in oacyacpac esam lah Jeova el siyuck sesr in moulkihn moul lasr ke sie inkacnek ma yohk mwe insewowo kac ke pacl inge ac kol nuh ke moul ma pahtpaht ke pacl fahsruh uh. Pwacnacng, lwelah kuht in ahksacohkye ahkostwen lasr ke insiacsr kewa oacna sie pacl wo nuh sesr in ahkkahlwemye luhngse yohk lasr nuh sel.

18 In kahsre kuht in akihlen ma wo liki ma kuluk, Jeova el use nuh sesr nuhnak ac puhlakihn wo (conscience). Tuhsruhktuh, kuht enenuh in ahkpahye nuhnak ac puhlakihn lasr uh tuh ma inge in luhlahlfongiyuck ac kol kuht in oruh sulaclah wo. Pa inge ma kuht ac fah sramsramkihn ke sapta se tok uh.

^ par. 9 Liye Sapta 6 ke puk se inge nuh ke kuhtuh pac mwe ahkuhtweyac lah kom ac sulaclah fuhkah mwe ahkengan wo.

^ par. 11 Nguhn fohkfohk uh oacyacpac ahkos eltahl finne sruhnga. Ke pacl se Jesus el sapkihn dimon ah in som liki monin mwet suc eltahl ahkkulukye inge, dimon inge akihlen kuh lal ac ahkos, eltahl finne sruhnga in oruh.​—Mark 1:27; 5:7-13.